Read SEBR SÕNGO, 1998 Yam vẽenem 17 Bible Online

Yam vẽenem 17 - SEBR SÕNGO, 1998 bible

Yam vẽenem 17

¹N-ye! Yãmb tagsgo labsa la a zulma. Rẽ waa ne yam-pa-sek b rãmba tudgri.

²Nin-wẽnsa da tẽeme tɩ b na n tõog n namsa buud sõnga kamba. Mik yãmb pag-b-la likẽ wa bi-beese, tɩ b beoog tõt vẽegre. Y ra pag-b-la rotẽ, tɩ yaa wa y pa le get-b yell bada.

³B ra tẽeme tɩ b na n kell n paa b likẽ tɩ b wẽnema ra puk yɩng ye, tɩ neb yĩm b yelle, mik b waa n yɛɛsa yɛɛsg kãsenga ne b sẽn da ne b yamẽ.

⁴Lik ninga sẽn da gũbg-bã, da paasda b rabeem. Bʋ-raas la b ra wʋmd goabg la rɩtgo la b ra ne bõn-yood sẽn lik-b ne neng sẽn maneg n tak bem-bem.

⁵Vẽenem buud da ka tat-b ye, ãdsa meng yãgba pa tõog yʋn-yoog a woto lik ye.

⁶Bugum bala n mii n wa widg b toore, tɩ rabeem yõkd-ba, la bugma watẽ n le kiime n bas-b ne lika, tɩ b sẽn yãe wã, kɩt tɩ b rigda la b yet tɩ b sẽn yãenda wẽnem n le yɩɩde.

⁷B wɩnga ne b tɩt yiisgu la rẽ wã, b namsa b meng zaalem. B paama yãnde, tɩ b ra tẽedame tɩ b mii fãa.

⁸B sẽn wa n yet tɩ b ratame n zãag bãad dãmba ne b yɩɩrã, yaa bãmb meng n lɛɛg n digd rabeem, n lɛɛg n lebg b bɛɛb laado.

⁹La bũmb sẽn da ka sekd yɛɛsgo, bãng-y tɩ bõn-nindi wã sẽn loodã, tɩ wiisa fuusdã, da kẽesd-b-la rabeem kãsenga,

¹⁰tɩ rabeema kʋʋd-ba, tɩ b pa le rat menga, n puk b nina likẽ, lik sẽn ka tõe n zãag n bas-b ye.

¹¹Wẽnem soab ka tar raood ye, a balga a meng rabeemẽ, a sũura koɛɛg tara a sãbsgo, t'a tẽed wakat fãa t'a beegra toga ne sɩbgre kãsenga.

¹²F sã n bas tɩ rabeem yõk-fo f pa tõe n le paam tags sõngo sẽn na n zãag foo ne f rabeema ye.

¹³F sã n ka le tar bũmb sẽn na n kõ-f saagre f naonga le paasdame, tɩ f ka mi bũmb ning sẽn wat ne-a ye.

¹⁴Yʋng kãng tõre ned ba a ye pa gãanded ne laafi ye, tɩ yʋnga yaa ka yõod yʋngo, yʋng sẽn wat ne bʋg-tẽng meng lika.

¹⁵B ra nee kɩɩms sẽn digd-ba, ka rẽ bɩ b ne tɩ b gĩina maaga zãnga, tɩ b ka tõe n le maan fɩ, b ra neeme tɩ b yika vugr bala n digd rabeem.

¹⁶Woto, sẽn da be-b be wã ra lʋɩtame n gãe wa b pag-b-la bi-bees roogo, tɩ rooga yaool n ka tar kʋɩleng n pagdẽ ye.

¹⁷F yaa ka-koaada, bɩ rũm-kɩɩma, bɩ tʋʋm-tʋmda, vugri bala, f wat n neeme tɩ sẽn maand ka ye.

¹⁸Bũmb sẽn loe-b ne taab wa wĩiri yaa likã. Woto bũmb fãa ra kẽesd-b-la rabeem: sobg sẽn fɩɩnde, luiili sẽn zodgd b yɩɩn-noodo, tɩɩs zutu, tɩɩs sẽn tob zutu, bɩ sa-koom sẽn zoet ne pãnga,

¹⁹kug sẽn dʋʋgd ne bʋ-raase, rũms sẽn zoete, we-rũms sẽn yãbde, tɩ tãmsã reeg n wãgda, bũmb fãa ra kẽesd-b-la rabeem ne rabeem.

²⁰Dũni wã tõre yaool n da yãgda ne vẽenem kãsenga tɩ ned kam fãa ra tʋmd a tʋʋma.

²¹Bãmb bala la yʋnga da zoe n ta, yʋng sẽn makd lik ninga sẽn lebg b pʋɩɩre. La bũmb sẽn da namsd-ba, n yɩɩd lika, yaa b sẽn da ka tar b meng võore.