Read SEBR SÕNGO, 1998 Yam vẽenem 18 Bible Online

Yam vẽenem 18 - SEBR SÕNGO, 1998 bible

Yam vẽenem 18

¹Sã n ya yãmb nin-sõma wã, bãmb da bee vẽenem pʋga. Ezipt rãmba ra wʋmda b bʋʋre n yaool n ka ne b mens ye, la b ra pẽgd-b lame, b sẽn yãe toogo wa bãmba yĩnga.

²B ra pʋʋsd-b-la barka tɩ b pa sɩbg-b n lebs ye, la b ra kota sugri b sẽn da rɩt beem ne Israyɛl kamba yĩnga.

³Ka likẽ la yãmb neba kẽn b kẽnd ye. Bugum n widig b taoore n wilg b sore, tɩ yaa sor b sẽn zɩ n dɩk ye; bugma yɩɩ wa wĩnto maasga n yãag-b tɩ b ta kãabg tẽnga.

⁴La sã n ya ne Ezipt rãmbã, da togame tɩ b momg-b vẽenem la b pag-b likẽ wa bi-beese tɩ bãmb me da paalga yãmb kamba yembdẽ. Yaool n da yaa yãmb kamba n da na n kõ dũni wã, vẽenem ninga noorã sẽn wa ne a soaba, vẽenem sẽn ka tõe n sob bada la bada bilã.

⁵B wa n yeelame, tɩ b na n kʋʋ nin-sõma wã kom-peelse, b biig a ye sẽn los koomẽ, b biig a ye bala n paam n põse. Yell kãng sɩbgr yĩnga, yãmb kʋ-la b kamb ka tɛka; yãmb kɩtame tɩ mogr puug a sũuri n dɩ-ba.

⁶D yaab rãmba ra zoe n bãnga yʋng kãnga tiiri, rẽ n so tɩ Israyɛl sũur da tosd kaam, b sẽn wa n yãe tɩ yella taasame wala b sẽn da wilgã.

⁷Yaa bũmb a yiibu la b ra naag n gũudẽ: nin-sõma fãagre la bɛɛb kũum.

⁸Yãmb sɩbga y bɛɛba la y zẽka d zugu n bool tõnd y sɛɛgẽ.

⁹Yaa rẽ yĩnga la nin-sõma wã kamba soos n kʋ b maando, la b naag taab n pʋlem tɩ b na n yɩɩ bõn-yɛnga, b sũ-noog wala b sũ-beed pʋgẽ, la b naaga taaba n pʋd yɩɩlle, yɩɩl ning b yaab rãmba sẽn da yɩɩndã.

¹⁰B ra wʋmda b bɛɛba yãbre, bɛɛba ra naaga kom-kẽemsa ba rãmba n yãbd b kʋʋre.

¹¹Zu-soaba wala yamba paama sɩbgr yɛnga; talg ra yãbda wala dĩma.

¹²Zak fãa pʋgẽ, kũuma da yaa ka tɛka, la b fãa da kii kũ-yɛnga. Yaada tũudb paoongo wa n lebga toogo, tɩ vugri bala nin-tɩɩsã tũu taaba n looge.

¹³Woto, wẽnd makr dãmba sẽn ka tõog tɩ b reeg bũmb ninga, b kom-kẽemsa kũum kɩtame tɩ b moone tɩ Israyɛl kamba yaa Wẽnd kamba.

¹⁴Tẽnga fãa da zoe n kẽe gõeem la yʋn sʋk da zoe n taame.

¹⁵Tɩ yãmb gomnã na n sig ne pãnga y naama zaoorẽ, al yĩngri, wala tãb-biiga sẽn ka be sugri, n wa kẽ b tẽnga sẽn da tog ne wãabã.

¹⁶B kɩtame tɩ tẽnga tõre, pid ne kũum, yãmb gomnã zĩnda yĩngri n sig tẽnga.

¹⁷Y bɛɛba sɩnga zãmsdo, la b zãmsdã yɛɛs-b-la yɛɛs-yoodo, rabeem kẽ-b lame.

¹⁸B sẽn lʋɩ tẽnga n dat n ki, b zãmsdã wilg-b-la sẽn ya bũmb ning yĩnga la b kiida.

¹⁹B sẽn da paam vẽnegre ne b zãmsdã, da yaa sẽn na n yɩlẽ tɩ b ra looge n ka bãng b kũuma võor ye.

²⁰Yaa sɩda kũuma wa n dɩɩ nin-sõma menga. Wʋsg waa n kii we-raoogẽ wã, la ad-y Wẽnd sũ-puura pa kaoos ye.

²¹Nin-sõng a ye, ned sẽn da ka tar a toorẽ yelle n yik n lʋɩ nin-sõma wã taoore, n na n ligl tɩ b põs sɩbgre. La a lʋɩɩ taoore ne a tʋʋmda zab-teedo: pʋʋsgo la wisdu sẽn maagd sũuri. A yii n sega y sũ-puura sẽn tʋm a soabã la tẽn-kũuma wẽneg n sɛɛme.

²²A tõoga tẽn-kũuma la ka tũ ne a yãoog pãng ye, ka tũ ne sʋʋg bɩ kãnd ye, yɩɩ ne a gomd pãnga la a tõog a-kʋʋd-n-ka-keesdẽ, y sẽn tʋm a soabã.

²³Tẽn-kũuma wa n zabda wʋsgo, kũuma vɩlmame n dɩga, la a kẽe sʋka n sigs Wẽnd sũuri tɩ b pa sɩɩs sẽn ket-ba ye.

²⁴A fuyorg kãsengã da tara dũni wã makre, b ra pɛɛ kug neeba, rũns a naase, a zugu, n gʋls yaab rãmb yʋy rũnug-rũnuga. A menga rĩirã ra mobga ne sãnem paklga, la Wẽnd yʋʋra ra gʋlsa a zugu.

²⁵Rẽ fãa kɩtame tɩ ka-sugr-malɛka yɛɛse la a tare n leb poorẽ. Neba bãngame tɩ y sũur ka noom ye, la rẽ ra seka Naaba-Wẽnde.