Read SEBR SÕNGO, 1998 Yam vẽenem 19 Bible Online

Yam vẽenem 19 - SEBR SÕNGO, 1998 bible

Yam vẽenem 19

¹Wẽnd sũ-fõorã sẽn lʋɩ nin-wẽnsa zugã, yaa b sẽn da zoe n mi nin-wẽnsa sẽn na tʋm tʋʋm niynsi n paase.

²B waa n basa Israyɛl kamba tɩ b looge, b pʋs n pĩng-b lame tɩ b yi, n le wẽneg n teem yam, n na n yik n pʋg-ba.

³B ra ket n zĩi ne b zaamẽ toogo, b ra nan ka yãb b kũuma n sɛ ye, la b yik n kõo b meng yam yoogo, b sẽn fĩin n kos b rãmb tɩ b loogã, b yik n zoe n pʋg-b-la wa neb sẽn zoete.

⁴Ad-y yaa kãab wẽng n da pʋgd-ba tɩ b yĩm sẽn pak-b zaamẽ. Ad-y yaa namsd niynsi b sẽn da ka namse la b bao n na n leke.

⁵La woto, yãmb neba kẽndã sẽn na n yɩ kẽnd bãndã, yãmb bɛɛba na n dɩka b sãmpog-kũum sore.

⁶Nee waa y le yik n naana dũni paalga tɩ bũmb fãa reegd y noore, sẽn na n yɩlẽ tɩ bũmb da maan y neba ye.

⁷Yaa woto la sawadgo lud b sika zĩiga n kõ-b maasem tẽn-koɛɛng puka koom sʋka, sor tuka Rudum Mogra pʋga, koom basa zĩiga tɩ moog yi n lengd a yam.

⁸Buud sõnga paama y gũudem n kẽn a kẽna, la a pẽgd bõn-bãna sẽn da maand a nifẽ.

⁹Wala wiidi b yɛdgame n pid bãoogo, wala pe-bi, b ra yɩgd n tirsdame n pẽgd b Fãagda ne sũ-noogo.

¹⁰B ra ket n tẽra yɛl niyns fãa sẽn maan yembda wakato, tẽnga meng sẽn waa n deeg rũmsa zĩiga n wekd rũm-pigli balbo. B ra ket n tẽra kʋɩlga sẽn waa n deeg koomẽ rũmsa zĩiga n yiis lomse wala a meng n wek-b ka tɛka.

¹¹Sẽn wa n kaoos bilfu, b yãee luiili wekre buud a to. B yão-beedã sẽn waa n kɩt tɩ b kos rɩ-noodo.

¹²Wẽnd sẽn tʋlg n yiis b kom, b kɩtame tɩ pɩtr-lʋɩɩse rʋʋg mogre n dʋʋg b sikẽ.

¹³Sɩbgre n yaool n lʋɩ nin-wẽnsa zutu, la sa-tãse n deng taoore n wilgi t'a bee sorẽ n watẽ. Ra segdame tɩ b reeg b sɩbgre la ra segda wʋsgo, tɩ b da rɩɩ beem ne sãamba.

¹⁴Sãamba n wa neb kẽer tẽngẽ tɩ b pa sak n deeg-b ye. La sã n ya Ezipt rãmbã, bãmb yõga b yel-sõm dãmba n kẽes yembdo.

¹⁵Sɩda b ka na n pa n ka sɩbg pipi rãmba ye, tɩ b ka sak n deeg sãamba ne zood ye.

¹⁶La sã n ya Ezipt rãmba, b reng n deeg-b-la ne sũ-noogo, n tol n maan kibsa, n pa tol n zẽng-b ne neb a taab ye, n yaool n wa yik marsã n na sɛɛs b pãnga ne tʋʋm toodo.

¹⁷Yaa rẽ la Wẽnd fẽeg-b zondo wala b sẽn fẽeg pipi rãmba, nin-sõma zak noorẽ, tɩ b babend likẽ n baood b sore n na n zoe n looge.

¹⁸Ges-y kʋnde, a gĩsa paada b zĩigẽ n pa teemnẽ ye la b sã n wẽed-ba n sokd taaba, b maanda noogo sẽn sakd kelgre. Dũni wã bõn-yoodã me waa n yikame n deesd taaba, n zemsd taaba.

¹⁹Tẽng zug rũms wa n lebga koomẽ dẽnna, tɩ koomẽ rũms wa lebg tẽng zug rẽnna.

²⁰Bugma ra bee koomẽ t'a pãng paasdẽ, tɩ kooma da ka le tar pãnga sẽn na n kiis bugum ye.

²¹Bugma yaool n da ka rɩt rũm-yaalse sẽn da lʋɩ a walmẽ n da ket n kẽnd la b watẽ ye. Walma ra pa yẽnegd yĩngri dɩɩba meng ye, bũmb sẽn yaool n wẽnd ko-kɩda n ka zɛɛd boogre ye.

²²N-ye, Soaala, ya ne bũmb ka tɛka la y zẽk y buuda yʋʋre, n kõ a ziiri! Yãmb ka bas-a ye, yãmb zĩnda a poorẽ wakat fãa, la zĩis fãa!