Read SEBR SÕNGO, 1998 Yam vẽenem 2 Bible Online

Yam vẽenem 2 - SEBR SÕNGO, 1998 bible

Yam vẽenem 2

¹Neba geel yaalsã kɩtame tɩ b gomd ne taaba: «Tõnd vɩɩma yaa koɛɛga, a pida ne sũ-sãanga; kũum sã n ta, tɩɩm ka ye. M ba bõe n fãag kũum nugẽ tɩ d miẽ?

²Yaa wa tõnd tiig n waa moogã, la vɩɩma poore, na n yɩɩ waa d ka zĩnd ye. D vɩɩma vʋʋsem ka bug-zõos bala n yit d yõẽ, d tagsgã ka bug-pãrga bala n yit tõnd sũurẽ?

³Bug-pãrga kiidame tɩ tõnd yĩnga lebg tom, yõora loogda faasg-faasga wa pemsem.

⁴Sã n wa beẽ b na n yĩma tõnd yʋʋre, ned ba a ye kõn le tẽeg d sẽn maan ye; d vɩɩma na n looga wa sawadgo, bũmb kõn paa a poorẽ ye. D vɩɩma na n looga wa wulgu, wĩntoog sẽn wɩlgde, wa meenem sõor sẽn mesgde.

⁵N-ye! Tõnd vɩɩma loogda wa sulunsuku, kũum ka sõt a raarã n yõsd ye; sẽn yalsa yalsame, tarb ka tard ye.

⁶Dẽ yĩnga, ket n yaa nin-wẽnsa goama, yik-y tɩ d bao sẽn be yõodo, d dɩ ne d bi-bɩɩlem pãnga, dũni sẽn tõe n kõ-d bũmb ninga.

⁷D yũ rãam n tɩge, d zɛ d meng ne kaam sẽn tar yʋ-noogo. D da bas tɩgra wakat t'a loog ye.

⁸D bao pu-neeba n zam d zutu tɩ b nan ka zelg ye.

⁹Ned ba a ye ra sak tɩ rɩ-nooda põsg-a ye, zĩis fãa d kõ kaseto tɩ d sũur yaa noog dũnna. Tõnd pʋɩɩrã la woto, tõnd pʋlemdã la woto.

¹⁰D nams naong soaba, ba a sã n yaa nin-sõngo, d da bas pʋg-kõor ye, d da ges nin-kẽem kʋdre zoob peend ye.

¹¹Bɩ pãn-tõog lebg d so-tũudga. Sẽn ka tar-a pãng ka tar yõod ye.

¹²D sãam nin-sõng vɩɩm t'a gɩdgda tõnd daabo, t'a yetame tɩ tõnd vɩɩma ka neer ye, a zabda d sẽn tõdgd noorã, a yetame tɩ tõnd vɩɩma ka sẽn paam-a gʋʋlg vɩɩm ye.

¹³A yetame tɩ yẽ n tar Wẽnd bãngr akɩka, n boond a meng tɩ Soaala biiga.

¹⁴A vɩɩma meng sãsbda tõnd dẽnna, a yãeeb meng zabd-d lame.

¹⁵A vɩɩma ka wẽnd a taab rẽn ye, a vɩɩma ka yɛs tõnd dẽnna sẽn yɛs zĩig ning ye.

¹⁶Sẽn boond-a a meng tɩ nin-sõngã yamẽ wã, tõnd yaa bũmbu sẽn sãbge n ka tar noosem ye. A ka pẽnegd tõnd tɩ d yaa rẽgdo; a yetame tɩ nin-sõma la baas neer dãmba, a yetame tɩ Wẽnd la a Ba.

¹⁷D ges a sã n togsda sɩda, d ges a vɩɩma sẽn na n baas to-to.

¹⁸Nin-sõng sã n ya Wẽnd biiga, Wẽnd na waa n sõng-a, b na n fãag-a a bɛɛb nusẽ.

¹⁹D bao tʋy la namsgo, n nams-a n bãng a sã n ya sũ-bʋgsem soaba, n bãng a sã n sɩd tõe toogo.

²⁰D kɩt t'a kũum yɩ yãnd kũum, d na ges sã n yaa wa a sẽn togsdã, a sẽn yet tɩ Wẽnd na n wa-la a sõngrã.»

²¹Yaa woto la b tagsda, mik b kẽeda moogo, b wẽnema kɩtame tɩ b lebg zoeense.

²²B ka mi sẽn solg Wẽnd sũurẽ ye, b pa gũud vɩɩm sõng rolb ye, b pa tẽed tɩ pʋ-peelem dãmba na n paama rolb ye.

²³N-ye! Wẽnd naana ninsaala t'a ka tõe n sãam zãng ye, Wẽnd kõ-a-la b meng wẽnego!

²⁴Sʋtãana zoe-bõna n kẽes kũum dũni pʋgẽ, sʋtãan sẽn so b rãmba n bãngd a sẽn ya-la.