Read SEBR SÕNGO, 1998 Yam vẽenem 3 Bible Online

Yam vẽenem 3 - SEBR SÕNGO, 1998 bible

Yam vẽenem 3

¹Nin-sõma vɩɩm saga Wẽnnaam nugẽ la namsg bʋʋg pa tat-b ye.

²Nin-wẽns nifẽ, wẽnda b kiime, b sẽn wa n yit dũni kãnga, yɩɩ waa b dɩɩ bõne.

³B loogrã wẽnega sãoongo, mik b kẽe laafi pʋgẽ.

⁴Nin-wẽng nifẽ, wẽnda b paama sɩbgre, mik b saagre yaa vɩɩm sẽn ka sɛɛb saagre.

⁵Namsgã yɩɩ bilfri la dolbã na n yɩɩ kãsenga. Wẽnd mak-b lame la b mikame tɩ b toga ne bãmba.

⁶Wala sãnem, b los-b-la boaagẽ n bãng b sẽn yaa a soab taki, la b taa Wẽnd yam wala yũ-noog maoongo.

⁷Wẽnd sẽn na n sig-b sãand daare, nin-sõma wã na n pɩlame, b na n yɩɩ wa bug-pãrs sẽn zom yãnda.

⁸Bãmb n na n dɩ naam, bãmb n na n soog dũni rãmba, tɩ Wẽnd soog bãmb zãnga.

⁹Sẽn teeg-b Wẽnde na bãnge tɩ b pʋlma sɩda, sẽn na n sak-b n tũ neere paada bãmb nonglma pʋgẽ, Wẽnd sõm la b nimbãan-zoeer pʋgda nin-sõma.

¹⁰Neb niynsi sẽn laad-b nin-sõngo, neb niyns sẽn basd-b Wẽnde, bãmb tagsga menga na n paama sɩbgre.

¹¹N-ye! Zu-beed dãmba la sẽn kis-b nin-sõma la sẽn kẽnd-b tɩrga. B saagre yaa zaalem, b namsgo yaa zaalem, b tʋʋmd yaa zaalem.

¹²B pagb yaa gãeemse, b kamb yaa bi-beese, b buud bark yãka zãnga.

¹³Zu-noog soaba la pag ninga sẽn ka roge, n ket n zĩ ne pʋ-peelem, n ka sak saabo. Wẽnd sẽn na n sig-a raare la a bãngd a yõodo.

¹⁴Zu-noog soaba la zu-soaba sẽn ka mi wẽnga la a ka tʋʋsd Wẽnd a sũurẽ ye! A tũudma yĩnga a na paam kũun kãsenga, a pʋɩɩr na yɩ kãsenga wẽnd do-sõnga pʋga.

¹⁵Tʋʋm sõma wata ne tʋʋm-tʋmda waoogre, yam sõng kɩɩda yẽgna sẽn ka tõe n põog ye.

¹⁶Nin-wẽns kamba kõn yɩ neba, yoaadba kamb na menem moogo.

¹⁷Ba b sã n paam yõ-woko, b kõn sõd-b nin-tɩɩs sʋk ye; b kʋʋlem kõn yɩ ziir kʋʋlem ye.

¹⁸B yõor sã n ka yɩ woko, b looga ne b saagre, n loog ne b na le paam n kelg koe-noogo.

¹⁹N-ye! Buud sẽn wegem pʋlemde kõn tõog n yɩ pʋlemd noog ye!