Read SEBR SÕNGO, 1998 Yam vẽenem 4 Bible Online

Yam vẽenem 4 - SEBR SÕNGO, 1998 bible

Yam vẽenem 4

¹F sẽn tar sõmblem são f sẽn tar kamba; sẽn tar-a sõmblem yʋʋr kõn menem abada; Wẽnd la ninsaalb nong-a-la wʋsgo.

²Sõmblem sẽn be zĩig ninga b pʋgd-a lame, a sẽn ka be zĩig ninga, b yãbd n dat-a lame, yaa vɩɩm sẽn ka be sɛɛb pʋgẽ la a fõgnega a pugla n deeg a pẽgre t'a maana raood zabrẽ n pa tol n dẽgem ye.

³Nin-wẽns nong bɩ b rog balbo, yõod kõn zĩnd ye; tɩɩga sẽn ka sõngã, a ka tãood yẽgna sẽn sut tẽng ye, a kõn zĩnd pãng ye.

⁴Ba a sã n wa yik n tãood wila, yẽgna sẽn ka yĩnga, sobg na n kaoo-a lame, sɩlmana na n vik-a lame;

⁵a wila vãad na n tõsame tɩ b ket n yaa lem-lem, biisã ka yõod biis ye, tɩ b ka bɩ n sek rɩɩb ye, n sek bũmb a to ye.

⁶Bʋʋda raare, Naaba-Wẽnd na n dɩɩ kaseto, ba rãmba wẽnem kaseto, kamba nengẽ, ba rãmba tʋʋm wẽns na n puka b kamẽ.

⁷Nin-sõngo sã n ki pẽbgo me a vʋʋsame.

⁸Ziir kʋʋlem pa kʋʋlem ye, ka kʋʋlem ninga sẽn tar daar n sõtã, n tar yʋʋm n sõta ye.

⁹Sẽn tar-a yam vẽenem, a yam vẽenema la a zoob-peendo, vɩɩm sẽn ka rẽgem la kʋʋlem vɩɩm;

¹⁰Wẽnd da nong-a lame t'a modg n tũu bãmb daabo, a sẽn da be yel-maandb sʋk yĩnga, a pʋleng ta-la a daare.

¹¹Nin-sõng loogame, tɩ neb a taaba wẽnem na n wa rẽgem-a, tɩ neb a taaba wẽnem na n wa kẽes-a moogo.

¹²Wẽng tʋʋsda nini n kɩt tɩ f ka ne sẽn ya neer ye. Tʋls wẽns sɩlmana zũndgda yam sugri.

¹³Nin-sõngo pidsa a sõmblem yʋʋm a wãn bal pʋgẽ, n lebg wa sẽn kaoos-a wʋsgo.

¹⁴A vɩɩma da taa Wẽnd yam, yaa rẽ yĩnga la Wẽnd maan yãgbo n yiis-a dũni wẽnga pʋga. Neba geta rẽ n ka tara a võor ye, pa wat b yamẽ ye.

¹⁵Wẽnd sẽn tũus b rãmba dɩta Wẽnd sõm la b nimbãan-zoeere, tɩ Wẽnd nin-sõma paamda b kollgo.

¹⁶Nin-sõng sẽn ki paalgda nin-wẽns sẽn ket-bã. Bi-bɩɩlem sẽn wẽneg n kʋʋg koɛɛga paalgda kʋʋlem sẽn ya wẽnem kʋʋlem.

¹⁷Neba nee nin-sõngo sẽn baasd to-to, la b pa mi Wẽnd sẽn pʋlem-a bũmb ning ye, b pa mi sẽn ya bũmb ning la b bĩng-b zĩ sõngẽ ye.

¹⁸Nin-wẽnsa neeme la sãbsdẽ, mik Wẽnd n na n la bãmba.

¹⁹Bãmb meng ka na n kaoose la b lebg kũum sẽn ka yõoda ye, b na n lebga yãnd bũmbu kɩɩmsa sʋka. Naaba-Wẽnd na n tus-b lame, tɩ b sĩnda, la b sã n lʋɩ, b zugã na n denga taoore. B na n vik-b-la b zĩisẽ, b na n wãa zãnga, b na n yãee toogo, b yʋʋr na n menema moogo.

²⁰B yel-wẽna sõadg sã n sɛ, b na n yɛɛsame, b yel-wẽna na n yikame n paalg-ba.