Read SEBR SÕNGO, 1998 Yam vẽenem 5 Bible Online

Yam vẽenem 5 - SEBR SÕNGO, 1998 bible

Yam vẽenem 5

¹Nin-sõng yẽ na n yaasa yĩngri tɩ rabeem kaẽ ye. B na n yaasa sẽn dag n namsd-b bãmb taoore, sẽn da yaand-b bãmba, namsgã wakato.

²Nin-wẽnsã sã n yãe nin-sõma, dabeem kãsenga na n yõk-b lame, b na yɛɛsa b sẽn paam fãagre, tɩ bãmb yaool n da ka tẽed-b ne rẽ ye.

³B na n goma ne taaba, b sũ-sãang pʋgẽ la b yɩɩr pʋgẽ, n kũsdẽ la b sesdẽ la b tar zabr ne b menga, n yetẽ:

⁴«Tõnd sẽn yaal a soab pĩnda la woto, tõnd maana yalemdo n tʋʋs-a, tõnd yeelame t'a vɩɩma yaa gãeemdo, t'a kũuma yaa yãnde.

⁵Wẽnd maana a wãna n wa sõt-a b kamba sʋka? A yɩ-la wãn n paam nin-sõma sẽn paamdã?

⁶N-ye! Tõnd kẽname n zãag ne sɩd sore; sõmblem vẽenem ka yãg tõnd yĩng ye, wĩndg ka puk a vẽenema tõnd yĩng ye!

⁷Meneng sor zugu, tõnd pidsa d daab-wẽnse, tõnd kẽe we-raadẽ, sor sẽn ka beẽ ye, la Wẽnd sora, tõnd pa yãend-a ye.

⁸Tõnd zẽk-m-menga nafa tõnd wãn-wãna? Tõnd arzɛka la d tɩtaama naf-d-la wãn wãna?

⁹Fãa wɩlga wa lika, fãa looga tʋʋlg wa kibare.

¹⁰Wala koom-koglgo sẽn lengd koom zugu t'a sẽn tũ zĩig ninga ka sõog sore n dɩgã, t'a sẽn wedg kooma ka wedg n dɩgã, yaa woto me la nin-wẽnsa loogda.

¹¹B le loogdame yɛsa, wala luiil sẽn yɩgd yĩngri t'a sẽn tũ zĩig ninga ka sõog sore n dɩg ye. A pɩgsã wẽeda pemsma t'a fõt n loogdẽ; yaa waa a tukda sor n looda la bũmb pa paade n tõe n wilg sora ye.

¹²Yaa wa pĩim b sẽn tão, a wẽdgda pemsma n looge tɩ pemsma lɛɛg n leb a zĩigẽ, la pĩima ka basd sore sẽn tõe n yãend ye.

¹³Tõnd me yaa boto: d sẽn dog la d sẽn ki, d sõmblema ka tuk a sore n dɩgl ye; tõnd wẽnema dɩ-d lame.»

¹⁴N-ye! Nin-wẽng saagre yaa wala ka-fɩɩba sobg sẽn dɩk n looge, wala ko-puudu sob-raoog sẽn tusdi! Nin-wẽng saagre menemda wala sobgo, wala sobg sẽn menesd bug-zõose, a yaa wa sãan sẽn sig foom, daar a ye, n wẽneg n looge tɩ f pa tẽr a yell ye.

¹⁵Nin-sõma vɩɩm ka be sɛɛb ye, b dolb bee Wẽnnaam nugẽ, yaa Yĩngri Soaala n get b yelle.

¹⁶Yaa rẽ yĩnga la Wẽnd meng nug na n fõgneg-ba naam la ziir la neerem pugla. B rɩtg na n kogl-b lame, b na n yɩ-la b gãongo.

¹⁷Zab-teedo na n yɩ-la b nonglma sẽn kɛɛd wakat buud fãa, bõn-naands fãa la b na n dɩke n ning b nugẽ n sɩbg b bɛɛba.

¹⁸Kut fuugu na n yɩ-la b sõmblema tɩ b kut pugla yaa b zemsgo.

¹⁹B gãong na n yɩ-la b sõmblema sẽn ka tõe n teke.

²⁰B sũ-puura n na n yɩ b sʋʋg sẽn ka be sugri. Dũni wã fãa na n naaga nin-sõma n yik zabre ne nin-wẽnse.

²¹Saag sʋʋg na n yãga goalma; wala tãood-mit pɛɛma, b na n yii sawatẽ wã n wa kõs b sẽn tão b rãmba.

²²Sapɩlem na n dʋʋga ne pãnga, wa loaabg kuga, Wẽnd bɛɛba zutu, tɩ mogra ko-wiis yik ne-ba, tɩ kʋɩlsa koom loog ne-ba n pa kees bũmb ye.

²³Sob-raoog na n yikame, sɩlmand na n looga ne-ba. Tẽnga zãng na n lebga zĩ-peen-daaga, neba yel-wẽna yĩnga. Dĩm dãmba me tʋʋm-wẽna na n tusa b naama goeelse n lubi.