Read SEBR SÕNGO, 1998 Yam vẽenem 6 Bible Online

Yam vẽenem 6 - SEBR SÕNGO, 1998 bible

Yam vẽenem 6

¹Dĩm biisi, kelg-y la y wʋm, zãms-y mooga satmẽ dĩm dãmba,

²yãmb fãa sẽn dɩt naam, kelg-y, yãmb sẽn yet tɩ y soolem dãmb sõor labsa.

³Yaa Naaba-Wẽnd n kõ yãmb naam, bãmb n kõ yãmb tõogo, bãmb n na n ges y vɩɩma sẽn yaa a soaba, bãmb n na n ges y raab sẽn yaa a soaba.

⁴Bãmb n so b rĩungã, n dɩk-a n gũnug yãmba, la yãmb sã n ka zãad-a ne zemsgo, yãmb sã n ka tũud noorã, yãmb sã n ka tũud b raabã,

⁵b na n fõda yãmb zugu ne pãng kẽenga, b na n bira pãn-dãmbã, na n yɩɩ toog ne-ba.

⁶B na kõo nin-bi wã sugri, la pãn-dãmba na n deega sɩbgre kãsenga.

⁷Pãng-Soaba-Wẽnd ka tard ned ba a ye taoor ye, b ka yɛɛsd ned ba a ye pãng ye; bãmb n naan nin-kooam dãmba la pãn-dãmba, la b zãada b fãa gilli zãab yɛnga.

⁸B na fɛɛsa pãn-dãmba sõma-sõma.

⁹Yaa yãmb la m gomd ne, dũni soaalba, m na n zãms-y-la yam wẽenem, tɩ y ra lʋɩ ye.

¹⁰Neb niynsi sẽn deegd-b noy sõma neere, b na n gesa bãmb dãmba wa nin-sõma; neb niyns sẽn sakd-b zãmsgo, b kõn gom n lub bãmb ye.

¹¹Tʋlg-y m goama bãngre, bao-y kelgre tɩ b na pa y yamẽ.

¹²Yam vẽenem pɩndame, a ka basd tɩ bũmb sob-a ye. Sẽn nong-a, yãet-a lame tɩ ka tũ toog ye, sẽn baood-a, paamd-a lame.

¹³A meng yit n sega sẽn dat-a yẽnda, yẽ n dengd n wilg a menga.

¹⁴F sã n sɩng a baoobo tɩ zĩig nan pa yẽege, ad f kõn bao-a n nams ye. F na mik-a f dignoorẽ.

¹⁵Sẽn tar-a yam ka yɛɛd ne a baoob ye, sẽn bas-a a gõeem n bao-a, põsa yɩɩr buud fãa.

¹⁶A meng yit n saadame n baood sẽn tog-b ne-a. A likda a menga ne yamleoogo b soya zutu, a rengda b raab pidsgu tɩ b nan pa yaag b noor ye.

¹⁷Yam vẽenem paoong ka tũud ne bũmb a to n zʋʋg tʋlg a zãmsg ye, fo sã n dat n zãms-a, fo zoe n nong-a lame.

¹⁸A nonglem yaa a noya deegre, a noya reegre wata ne vɩɩm sẽn ka tõe n sãam.

¹⁹Vɩɩm sẽn ka tõe n sãam ka bũmb a to sã n ka paam zĩig bala Wẽnnaam sɛɛgẽ.

²⁰Yam vẽenem n wat ne naam.

²¹Dẽ yĩnga y sã n baood naam zaoore, naam dasaare, dũni wã soolem bɩ y pẽg yam vẽenem, tɩ y naam kõn zĩnd sɛɛb ye.

²²Yam vẽenem sẽn yaa a soaba, a sẽn wa dũni to-to, yaa rẽ la m na n wilg yã. M pa na n solg-y baa fɩ. M na n tũ a nao al sɩngrẽ, t'a bãngre yɩ vẽeneg ne yã, m kõn togs sẽn ka wẽnd sɩd ye.

²³M kõn saag n kees bũmb m meng yĩng ye, m maan dẽ m zãaga m meng ne yam vẽenem.

²⁴Yam vẽenem rãmba sã n ya wʋsgo, dũni wã fãagame. Dĩm sẽn tar yam, manegda a soolem dãmba.

²⁵Bas-y tɩ m gom n zãms-y, tɩ y rɩ yõodo.