Read SEBR SÕNGO, 1998 Yam vẽenem 7 Bible Online

Yam vẽenem 7 - SEBR SÕNGO, 1998 bible

Yam vẽenem 7

¹Mam me yaa neda, n wẽnd m taaba, n tõe n ki, mam yaa pipi rao a Adem biiga, Wẽnd sẽn yag a soab pipi ne tãndã biiga. M yaga ne nemdo m ma pʋgẽ;

²m paa m ma pʋgẽ kiis piiga, m ma wã zɩɩmẽ, m waa n lebga bõn vɩɩga, la tũu ne ba pãnga la gõeem sũ-noogo.

³M sẽn doge m vʋʋsa pemsem wa m taaba, tẽnga reeg-m-la wala a sẽn deegd kamba taaba, la wala kamb a taaba mam me kelmame.

⁴M yãee yãasã fãa põnegre la b pɛta.

⁵Dĩm ba a ye ka rɩk sor a to n wa moog ye.

⁶Dũni wã kõom la a yiibu yaa a ye d fãa yĩnga.

⁷M sẽn pʋʋse, Wẽnd kõ-m-la yam, m bõsame la yam vẽenem sig-m lame.

⁸M pẽgd-a lame, n yɩɩd naam dasaare la a zaoore. M gesa arzɛk wala zaalem, yam vẽenem taoore.

⁹M pa saag n mak-a ne sãnem gilg ye, tɩ dũni wã tõr sãnema yaa wala bĩisr bala yam vẽenem taoore, la wanzurf yaa wala begd bala.

¹⁰M nong-a lame n yɩɩd neerem la laafi, m yãk-a lame wala m wĩntoogo, t'a yãgba ka be sɛɛb ye.

¹¹La m sẽn paam-a, m paama bõn-sõma a taaba fãa, m paama arzɛk ka tɛka.

¹²Bõn-kãens fãa noogda m sũuri tɩ yaa yam vẽenem n deng taoore, tɩ bãmb yaool n pʋge. Sɩngrẽ wã m yaool n da ka mi tɩ yam vẽenema n wa ne b ye.

¹³La m sẽn bãng tɩ ka tũ mam bolgre, mam me wilg-a-la m taaba, la m sũur yɩɩ noogo m sẽn pa sak n solg yõod a woto buudu.

¹⁴A yaa ninsaalb arzɛka b sẽn ka tõe n dɩ n sɛ ye, sẽn paam-a taka Wẽnnaam zood a zugu, Wẽnd ka yĩmd sẽn tar-a yam vẽenem yell ye.

¹⁵Wẽnd bas-m tɩ m gom m yam, b bas-m tɩ m pẽge wala sẽn segde, kũuna m sẽn paam b nengẽ, b bas-m tɩ togse tɩ bãmb meng n lʋɩt taoore n wilg yam vẽenem sore, n tat yam vẽenema rãmba.

¹⁶Tõnd saga Wẽnd nugẽ, tõnd ne d goama, ne d yama, ne d minima fãa.

¹⁷Bãmb n kõ maam yɛla fãa bãngre, bãmb n wilg maam dũni wã sẽn ya to-to, bũmb kam fãa ne a yalẽ.

¹⁸Bãmb n wilg zamaana sɩngre, a tẽnsʋka, a baasgo; wĩntooga kɩllgo, sẽoog la sɩpaolgo,

¹⁹yʋʋma, kiuugu, yĩngri ãdsã zĩisi,

²⁰rũng kam fãa ne a yalẽ, we-rũmsã ne b minungu; yam dãmb pãnga, ninsaalb tagsgo. Tɩɩsã buud toɛ-toɛ yã ne b yẽgna sẽn tɩpd bãas niynsi.

²¹Sẽn solge, sẽn ka solge, m bãngame tɩ yaa yam vẽenem sẽn zĩnd bũmb fãa sɩngrẽ wã n zãms-b maam.

²²A yaa yam sẽn ya yam sõngo, n tar bãngre, n yaa a ye, n ya kʋʋma, ka tõe n sɩɩse, ka yɛs zĩ-yɛng ye, n welg ne bõn-yood a taaba, n ya vẽenega, n tõe n teem nenga, n nong neere, n tʋʋla.

²³A le yaa pa-kɩɩsde-n-le-gõmse, n ya kõata, n ya zood ne ninsaala, n yɛs a zĩ yɛnga, n mi a sẽn yete, n ka mi yɩɩr ye, n tõe fãa, n gũusd goabg la rɩtgo, n mi ned tagsgo, n mi yam dãmba, pʋ-peelem dãmba, sẽn tagsd-a yɩɩg soaba.

²⁴Yam vẽenem tʋʋlame n yɩɩd bũmb fãa sẽn lukd a naoore, a tõe n kẽe bũmb fãa n sãag n looge, bõn-dẽgd sẽn ka naag-a wã yĩnga.

²⁵A yaa bũmb sẽn yit Wẽnd pãngẽ, yaa b ziira sula la Wẽnd tãoosda. Bõn-dẽgd bʋʋg pa kalem-a ye.

²⁶A yaa Naaba-Wẽnd vẽenem sẽn ka sɛtã sulli. A yaa nin-gɛtg sẽn wilgd vẽenega Wẽnd tʋʋma. A yaa b nonglma sẽn ka be sɛɛba kaseto.

²⁷A yaa a ye, la a tõe fãa. A paada zĩig a ye, la a tedgda dũni wã nenga. Zamaan sẽn tong taaba, a paam n kẽe nin-sõma sɩɩse n paam zo-rãmba la bãngdba, n kõ Wẽnde.

²⁸Wẽnd sẽn nong b rãmba, yaa sẽn tar-b yam vẽenem.

²⁹A neerem yɩɩda wĩntoogo, a yɩɩda ãdsã fãa, sã n mak-a ne wĩndga vẽenem, yẽnda n yɩɩde.

³⁰Bãng-y tɩ yʋngo wat n deeg vẽenem zĩiga; bũmb yaool ka reegd yam vẽenem zĩig ye, wẽnem ne a pãnga sẽn ya kẽengã ka tõe-a ye.