Read SEBR SÕNGO, 1998 Yam vẽenem 8 Bible Online

Yam vẽenem 8 - SEBR SÕNGO, 1998 bible

Yam vẽenem 8

¹Yam vẽenem wilgda a pãnga n tat moogã fãa sɛtmẽ, dũni wã fãa rɩta a yõodo.

²Yaa yẽnda la m da nonga, maam, a Salomo, la m sɩnga a baoobo al m yãadmẽ. M maana mam sẽn tõe t'a lebg m ba, m lebga a neerma baooda.

³A sẽn pẽneg Wẽnd pẽnegre ningã wilgda zĩ-sõng ning a sẽn yitẽ, dũni wã Soaala maana zood ne-a.

⁴N-ye! A paama Wẽnd zãmsgo, dẽ n so t'a yãkd tʋʋmd ninga a sẽn dat n tʋme.

⁵Arzɛk yaa bũmbu d sẽn tog n bao d vɩɩma pʋgẽ, la arzɛk bʋgo n yɩɩd yam vẽenem? Bũmba fãa tʋɩɩsa a zugu.

⁶Sã n yaa yam la tʋʋmde, ãnda n le ya dũni wã viginda n yɩɩd yam vẽenem?

⁷Sõmblem la d pẽgda? D bãng tɩ zʋg-sõng yita a nengẽ, yẽ n zãmsd tõog-m-menga, gũusgu, zemsgo la sũ-keelem; la bõe n be tẽng zugu n manegd ninsaal wala bãmba?

⁸Yaa bãngr zulung la d rata? D bãng t'a mii sẽn looge la sẽn nan wate, a mii yelbũna wegsgo, a pukda sẽn solge, a pĩnd n nee makre sẽn na n mak yĩngri, sẽn na n zĩnd kiuug la ãdsẽ. A nee neer bɩ beed sẽn wat beoogo.

⁹M yeelame tɩ yam vẽenem n na n yɩ m pak-n-taaga, n na n yɩ m sagenda, m sũ-noog wakato, la m belgda, m sũ-sãang la m yɩɩr pʋgẽ.

¹⁰M da yeta m sũurẽ tɩ Wẽnd maag-a, m na paam yʋ-sõngo kʋʋng sʋka, m da tẽedame tɩ ne m sẽn ya bi-bɩɩgã, m na paam waoogre nin-kẽems sʋka.

¹¹Bʋʋd zĩigẽ, b na mik tɩ m yaa mita, tɩ nin-bɛda yɛɛsdẽ.

¹²M sã n ka yaag m noore b gũudame tɩ m gome, m sã n gomda, b yoogda b tʋba, m sã n gomd n noosdẽ b pĩida b noore.

¹³Wẽnd maag-a, mam na paam vɩɩm sẽn kõn zĩnd sɛɛbo, la woto, sẽn na n wa-b mam poorẽ, na kell n tẽeg m yelle.

¹⁴M na n dɩɩ naam tẽnga rãmb zugu, la b fãa na n saka m noore.

¹⁵B sã n wʋm m yʋʋre, na-toosã na n digimdame. M na n yɩɩ na-sõng ne m soolem dãmba, la zabre zĩigẽ m na yɩɩ gãndaoogo.

¹⁶M sã n yi zabrẽ n wa, m vʋʋsda m paga sɛɛgẽ, m vʋʋsda yam vẽenem sɛɛgẽ, tɩ yẽ sɛɛgẽ sũ-sãang ka ye, nen-gãneng ka ye, yaa sũ-noog ne sũ-noogo bala.

¹⁷M da zĩime n bilgd m yamẽ la m nee m sũurẽ, tɩ yam vẽenem wata ne vɩɩm sẽn ka be sɛɛbo.

¹⁸T'a zood wata ne sũ-noog menga, t'a tʋʋmde, wata ne arzɛka sẽn ka tõe n dɩ n sɛ, t'a zĩnd-n-taar wata ne bãngre, t'a sõsd-n-taare wata ne yʋ-noogo. Dẽ la m leb goabg la rɩtgo n baood m sẽn na n maanega t'a wa m zakẽ.

¹⁹M da yaa bi-sõngo, n dog ne zʋg-sõngo.

²⁰M sẽn da ya sõng yĩnga, m waa ne yĩng sẽn ka tar bãnd ye.

²¹La m sẽn bãnge, tɩ sã n ka tũ ne Wẽnd kũuni, m ka tõe n paam yam vẽenem, (ad y bãng kũun kãnga sẽn yitẽ, zoe n yaa yam sõnga tʋʋmde) m wẽnega m nenga n tees Naaba-Wẽnde, n pʋʋs-ba, la ne m sũur fãa m goma woto: