Read SEBR SÕNGO, 1998 Yam vẽenem 9 Bible Online

Yam vẽenem 9 - SEBR SÕNGO, 1998 bible

Yam vẽenem 9

¹M yaab rãmb Wẽnde, nimbãan-zoet Wẽnde, yãmb sẽn naan dũniya ne y noor gomd pãnga,

²yãmb sẽn naan ninsaala ne y yam kãsenga, n dɩk bũmb fãa n ning a nugẽ,

³t'a yɩ dũni wã naaba, sõmblem la zemsg naaba, t'a rɩ naam ne zʋg-sõngo la zemsgo,

⁴kõ-y maam yam vẽenema sẽn naag-a yãmb n zĩ y zaoorẽ wã, la y ra yiis maam y kamba sʋk ye.

⁵Mam yaa yãmb sõgne la y yem-poak biiga. M ka be pãng ye, m yõor yaa koɛɛga, m ka mi sõmblem, m ka mi noor sẽn ya a soab ye.

⁶Ned bee Adem biisa sʋka t'a yama ka yit yãmb nengẽ, tɩ b get-a wa ned bɩ?

⁷Yaa yãmb n yãk maam tɩ m dɩ naam, tɩ m soog kom-dibli, la kom-pugli.

⁸Yãmb n kõ maam noore tɩ m ti y roogo tãn-songã zugu, tɩ m me maan-kugri tẽng ninga y sẽn wẽ y sika; maan-kugra me sẽn tog n wẽneg a soaba, yaa y sẽn tʋlg a soab al sɩngrẽ wã.

⁹Yãmb ne y yam vẽenema bala n mi y tʋʋma fãa. Yam vẽenema da bee ne yãmb dũni wã naaneg wakato, a mii sẽn tat yãmb daabo, a mii sẽn toge ne yãmb noore.

¹⁰Tʋm-y yã t'a yi yĩngri n sigi, t'a yi y ziir zaoora sɛɛga n wa sõng-ma, n wa pak-ma, tɩ m bãng sẽn tat y yam.

¹¹Yam vẽenem mii fãa la a tõee fãa. A na gãd m nugu tɩ m tʋʋma zemse la m paam n soond a ziira maasmẽ.

¹²Wakat kãng marsã m tʋʋma na ta y yam la m na ges y neba yelle ne zemsgo, la m me tõog n zaond m ba zaoorẽ.

¹³Adem biiga a bõe n tõe n bãng Wẽnd geelse? Ãnda n tõe n bãng Wẽnd daabo?

¹⁴Ninsaal tagsgo yaa koɛɛga la a geels yaa faado.

¹⁵Yĩnga sẽn tõe n sãama zɩsgda yam. Yama ne a tags kʋʋma pagda tãnda roogẽ.

¹⁶Bãng sẽn be tẽng zug menga ka naana ne a-ye, sẽn pẽ tõnd menga, d ka yãet-a tɩ d ka nams ye, d maand a wãn mãrsã n bãng sẽn be yĩngri?

¹⁷Ãnda n na n bãng Wẽnd daabo, yam vẽenema sã n da ka yitẽ bãmb nengẽ, b sã n da ka sikẽ b yĩngri yam vẽenema?

¹⁸Yaa woto la tẽng zug rãmba soy lebgd tɩrse. Yaa woto la Adem biis paamd n bãng y sẽn nonge, la Wẽnd maag yam vẽenema, yaa woto la b paamd fãagre.