Read SEBR SÕNGO, 1998 Sira biiga 1 Bible Online

Sira biiga 1 - SEBR SÕNGO, 1998 bible

Sira biiga 1

¹SEBRA TƲƖƖSGO Bũmb wʋsgo la d paam ne Noora sebre, ne bãngdbã la sẽn pʋg-b bãmbã. Dẽ kɩtame t'a Israyɛl sẽn pid ne bãngre la yam zulung ninga toga ne pẽgr kãsenga. Karem sebre n paam bãngre yaa sõngo la ka sek ye. Sẽn mi-ba tog n modgame n sõng neb a taaba ne b gomde bɩ b sebre. Yaa rẽ n so la m yaab a Zezi modg ne Noorã, ne bãngdbã, la sɛb a taaba karengo al n wa paam bãngr sẽn pidi tɩ yẽ me yeele t'a na n gʋlsa bũmbu neb a taab zãmsgo la b yam vẽnegr yĩnga. A tʋlgame tɩ sẽn dat-b bãngrã minim n tũ sor ninga a sẽn dɩkã, n tõog n vɩɩnd wala Noora sẽn wilgi. M kot-y lame tɩ y me sɩng karengo ne sũ-maasem, la gũusgu, la y me maan sugri, y sã n ta zĩis niyns tõnd sẽn mak ne d pãng fãa n na n lebg goama tɩ yɩ vẽenese, tɩ baas n yaa waa d ka tõog zãngã. Sã n ya sɩda, ad-y paam n lebg bũmb sẽn gʋls ne Ebre rãmb goama tɩ bu-zẽmba tõog n wʋm kɛpi-kɛpi, ka reng-reng-taab bũmb ye. Pʋs n yaa rẽ fãa yĩnga, la f sã n get noora sebre, bãngdba la sɛb a taaba, f neeme tɩ goama pa tũud taab zãng-zãn(...)

²Mogr bĩisri, sa-ko-bɛɛla, vɩɩm sẽn kõn sɛ dasma sõore: ãnd n be n tõe n sõd-ba?

³Yĩngri zãndlem, tẽnga yalem, mogra zulum: ãnd n tõe n bãng b tɛka?

⁴Yam vẽenem n deng bũmba fãa n beẽ, yam sẽn pid ne gũusgã ka yãend sɩngr ye.

⁶Yam vẽenem yẽgre, yaa ãnna la b wilg-a? A sẽn yiis bũmb niyns moogo, ãnd n mi?

⁸Yam vẽenem mita yaa nin-yend bala, la bãmb la bũmb fãa yɛɛsda, b sã n zĩ a naam goeel zugu.

⁹Yaa Naaba-Wẽnde, n yiis yam vẽenem, bãmb mi a yalẽ, a sẽn tõe bũmb ninga, bãmb n dɩk-a n kẽes b tʋʋma fãa pʋgẽ.

¹⁰Bãmb n pʋɩ-a wa b sẽn date, n dɩk-a n kõ sẽn nong-b bãmba. Wẽnd dabeem digbu

¹¹Ned ninga sẽn digd Soaala-Wẽnd dabeem tog n pẽga a menga t'a rɩka zu-zẽkr sore, a sũur pida ne sũ-noog t'a langdẽ.

¹² [2†] Sẽn digd-a Soaala rabeem sũur yaa noogo, rabeema na n waa ne laado, la yõ-woko la a kiisda yɩɩre.

¹³Sẽn zoet-a Wẽnd fãa yẽ soab yell baasda neere, a kũum daare a na n paama barka.

¹⁴Sẽn digd-a Wẽnd dabeem yẽ la yam yẽesem soaba. Wẽnd naaga yam yẽesem ne nin-sõngo n naan-a a ma pugẽ.

¹⁵A tʋɩ-la a gãaga n be neb sʋka, n na n kell n pa ne ninsaalb buudu, daar fãa.

¹⁶Yam vẽenem sẽn pidi yaa rig Wẽnd dabeem. A pida ne yõod n yɩɩd sẽn ket fãa.

¹⁷A kɩtame tɩ zak fãa pid ne arzɛka, tɩ bao pid ne koodo.

¹⁸Yam vẽenem soab naam pugla la Wẽnd dabeem digbu. Dig rabeem Wẽnd taoor n wat ne laafi la yĩn-maasem.

¹⁹A wata ne yẽesem la bãngr zulunga; sẽn zoet-a Wẽnd fãa toga ne pẽgre.

²⁰Wẽnd dabeema zugu la yam vẽenem kɩɩd a yẽgna n tãood wil sẽn womd vɩɩm sẽn kõn sɛ biisi. Sũ-maasem la tõog-m-menga

²²Ned da bas t'a sũur fudg zaalem ye. F maan dẽ f kẽesa f meng moogo.

²³Ned tõogda a meng tɩ kaoos n yaool n ges a meng wa sũ-maasem soaba, n yaool n paam sũ-maasma sẽn wat ne sũ-noog ningã.

²⁴A na n solga sẽn be a sũurẽ tɩ kaoose n yaool n paam tɩ neb a taaba pẽg a yama. Sũ-maasem la zemsgo

²⁵Yelbũn wekre n pid mitba arzɛka koglg. Yel-wẽn-maand bala n get Wẽnd waoogr wa yel-beedo.

²⁶Fo baooda yam vẽenem bɩ f deeg Soaala noya, la Soaala na kõ foom f sẽn date.

²⁷Sẽn zoet-a Wẽnd nif la sẽn deegd-a saglgo yẽ soab n tar yam vẽenem. A sẽn nong wa fãa-fãa, yaa a bʋk a sũuri n pʋg Wẽnde.

²⁸Wẽnd taoore, da maan wa f toog ka be ne b ye, da pẽneg bãmba wa f zoet-b lame n yaool n ka zoet-b ba bilf ye.

²⁹Neba taoore da yɩ ninsaan-kazukemd ye, gũus f sẽn yiisd goam niyns f noorẽ.

³⁰Da bao f toore n dʋʋs f meng yĩngr tɩ f wat n pãs n lʋɩɩme, n lebg bɛɛb laado, n paam paoogre. Wẽnd meng n na n puk sẽn be f yamẽ tɩ f paam yãnde kʋʋnga sʋka. B na puka f sẽn ka rigd bãmb dabeema la f sũura sẽn pid ne zãmb ningã.