Read SEBR SÕNGO, 1998 Sira biiga 12 Bible Online

Sira biiga 12 - SEBR SÕNGO, 1998 bible

Sira biiga 12

¹Yel-Sõma [1] Fo sã n maan neere, bãng fo sẽn maand a soab neerã, woto f yel-sõmda kõn pa zaalem ye.

²Maan nin-sõng neere, a na lebs foom, sã n ka yẽ meng me, na yɩ Yĩngri-Soabã.

³Sẽn be-a wẽng pʋgẽ n ka rat n yi be, la a ka rat n maan a to neere, yẽ soab ka tar yel-sõmd ye.

⁴Kõ nin-sõngo la f da sõng yel-wẽn-maand ye.

⁵Maan sẽn yaa sulg-m-meng soab neere, la da kõ nin-wẽng ye, mong-a rɩɩbo, ka boto a pãng na n yɩɩga foom, a wẽnema yĩnga, a na n yɩɩ yel-sõm-zɩta n wa maan-f wẽnga.

⁶Yĩngr-Soaba menga yam yita yel-wẽn-maanda, la b sɩbgda nin-wẽnse.

⁷Kõ nin-sõngo, la f da sõng yel-wẽn-maand ye. Zood sõngo

⁸F sã n tar naare, f bɛ meng lebgda f zoa. Yel-beed sã n lʋɩ f zugu, f bɛɛba pukda b mense.

⁹Ned sũur sã n noomẽ a bɛɛb sũur sãamdame, la a sã n wa be naong pʋgẽ, a zoa meng basd-a lame.

¹⁰Da teeg f bɛyã abada; a wẽnema, bãng zũudu sẽn sob ne piisem.

¹¹Ba a sã n sulg a menga n kẽnd n kũudẽ, gũus f meng ne f bɛyã. Maan ne-a wa ned sẽn duud zũudu, n dat t'a piisma meneme; ka tõog rũnna, wat n tõoga beoogo.

¹²Da sak tɩ bɛ wã zĩnd n yegl-f ye, t'a tõe n wa tusa foom n lubi n deeg f zĩiga. Da kɩt t'a zĩnd f rɩtg ye, a wat n baood n na n deega f goeele; tar n tarẽ f na wa n yet tɩ f bãngẽ. Ad m sẽn wilg-f tɩ f maan gũusgã, m tara bʋʋm.

¹³Waaf sã n kɛ sẽn deemd-a ne wiisi, ãnd n na n kũm a soaba? La sẽn be-a we-rũms sʋka tɩ we-rũng wa pogl-a, ãnd n na n kũm-a?

¹⁴Yaa woto me ne ned ninga sẽn dɩk-a yel-wẽn-maanda n maan a tũud-n-taaga, n be ne-a daar fãa, n naagd-a n maan yel-wẽna.

¹⁵Fo sã n ket n yɛs yĩngri, f tũud-n-ta-wẽnga kõn puk a wẽnem ye, la fo sã n sɩng lʋɩɩse, a basd-f lame tɩ f lʋɩ. Fo sã n ket n yɛs yĩngr fãa a kõn puk a wẽnema ye, la salg sã n gũug f naoore, a yetame: m wẽnema n lub-f tẽnga.

¹⁶Bɛyã tara gom nood a noorẽ bala, la a sũurẽ wã, a baooda a sẽn na n maan bũmb ninga n sãam f yelle. Nintãm be-la a nini, mik yaa zɩɩm la a baood n na n daage.

¹⁷F sã n seg zu-beedo f na yãenda f taoore; a maanda waa na n sõng-f lame mik a rat n gũuga f naoore n lub-fo.

¹⁸Dẽ marsã la a likd a menga a na n laame la a yĩgs-fo la a na n sɩnga f wɩdga.