Read SEBR SÕNGO, 1998 Sira biiga 13 Bible Online

Sira biiga 13 - SEBR SÕNGO, 1998 bible

Sira biiga 13

¹Gũusg ne tũud-n-ta-yoodo [1] Fo sã n sɩɩs tɩɩg sũm, a na n tabend-f lame, f sã n dɩk wilg-m-meng soaba n maan f tũud-n-taaga, fo wat n wẽneg-a lame.

²Da tʋk zɩɩb sẽn yɩɩd f pãng ye. Da yõg zoodo ne f pãng sẽn ka ta a soaba la ne arzɛk soab ye. Bõe n maane tɩ fo rɩk kut dʋk n naag ne tãnd dʋko? B sã n koglem taaba, a ye n na n wãage.

³Arzɛk soab maanda yel-kegre, la yẽnda n puugd a sũuri wa yaa yẽ la b paoog yã. Sã n maan sẽn ka zems ne naong soaba, naong soabã n wat n baas n yeel tɩ yẽ n konge.

⁴Arzɛk soab sã n tar fo tʋʋmde, a baooda fo zĩiga, sã n ka rẽ, a toog kaẽ ne f ye.

⁵Fo sã n tar laogo, a na sõng-f n sɛɛs-a, a na loog ne f sẽn tare la a sũur kõn kius ye.

⁶A sã n dat n dɩ-fo, a na bels-fo, n laad ne foo la a kãabd-f noogo, a na gom ne f noogo n wa tol n sok fo: «Bõe la m tõe n maan f yĩnga?»

⁷A na bool tɩ f wa rɩ a yiri tɩ yãnd wa rat n yõk-fo, mik yaa sẽn na yɩlẽ tɩ fo boola n lebse n kẽes-f naong ne naongo. A wat n wa bas-f lame n laad-f la a yĩgsd-f, n wa maand waa a ka mi-f ye.

⁸Maan gũusgu, da yɩ yalem ye, da bas tɩ b belg-fo, da maan tɩ b la-f ye.

⁹Nin-kãseng sã n bool foom, da sak ye, bas-a t'a pʋgd n boonnẽ.

¹⁰Da yãg n wa ye tɩ b wa tus-f n lebs poorẽ ye. Da zãag wʋsg me ye, ka rẽ a wat n yĩma f yelle.

¹¹Da leo a goama wa a pa yɩɩd-f ye, da reeg a sẽn togsda fãa wa sɩd ye. A bẽta foom ne a goam n dat n tɩg f pʋga. Ba a sã n laad ne foo, a rat n bãnga f zʋgo.

¹²Sẽn dɩkda fo goam n saad n togds zĩis fãa, ad ka yẽ soab n baood f yell manegre, yaa roog la a baood n na n kẽes-fo.

¹³Gũus f meng wʋsg-wʋsgo ne-a, tɩ y naaga taab n yegd bog-zulunga la a raaba la a tus foom n lub. Arzɛk la naong rãmba

¹⁵Rũng fãa nonga sẽn wẽnd-a, la ninsaal me nonga a to.

¹⁶Bõn-vɩɩl fãa baooda a buudu, la ninsaalb me nong n vɩɩnda ne taaba.

¹⁷Digd-n-yĩidg ne pe-bil kĩ ne taab wãn-wãna? Yel-wẽn-maand me ne nin-sõngo, bõe n be b sʋka?

¹⁸Laafi na n yɩɩ wãna zĩnd katre ne baag sʋka? Zems-taab na n zĩnda wãn-wãna arzɛk ne naong soab sʋka?

¹⁹Bõeens sẽn be weoogẽ ya bõnyẽes dɩɩbo. Arzɛk rãmb me maanda b yam sẽn dat ne naong rãmba.

²⁰Wilg-m-meng soab sẽn kis wa fãa-fãa yaa bũmb sẽn ka zẽkd a yʋʋre, wala arzɛk soab me sẽn kis la naong soaba.

²¹Arzɛk soab sã n lak n na n lʋɩ, tao-tao bala t'a zo-rãmb kok-a lame. Naong soab sã n lʋɩ a ka le tar zoa ye.

²²Arzɛk soab sã n maan sẽn ka neere, a paamda neb sẽn na n yik n yals a poorẽ. Ba a goama sã n ka lebd be, b kõt-a-la bʋʋm. Sã n ya naong soaba, b sãbsd-a lame, a sã n leok tɩ wẽnd me, b ka pẽgd-a ye.

²³Arzɛk soab sã n gomda neb fãa yaa sɩɩ n kelgdẽ, n yet t'a goam yaa sõmbo. Sã n ya naong soba, b yetame: «Kaari! Ãnd n gomdã?» A sã n gom n tudgi, b yetame t'a menem.

²⁴Arzɛk yaa sõmbo, yel-wẽnd sã n ka be sʋka. Yaa wa yõod me sẽn ka be naong pʋgẽ a sã n ya yel-wẽnd sɩbgre.

²⁵Ninsaal neng n wilgd a sũuri, a sũ-noog bɩ a sũ-beedo.

²⁶Neng be laado, sũur n ya noogo. A zagl mi yelbũn wegsgo, a zĩnd n kaaga a tʋʋlgo.