Read SEBR SÕNGO, 1998 Sira biiga 17 Bible Online

Sira biiga 17 - SEBR SÕNGO, 1998 bible

Sira biiga 17

¹Wẽnd sẽn kõ ninsaala [1] Soaala yiisa ninsaal tõmẽ n na n wa kɩt t'a leb be.

² [14†] Soaala kõo ninsaal fãa dasem sõor a sẽn na n vɩɩnde, la b rɩka tẽng zug bõn-naandsã n ning a nugẽ.

³Soaala kõo neba pãnga, wala b menga, n naan-ba n wẽneg b menga.

⁴B kɩtame tɩ bõn vɩɩl fãa zoet ninsaala, b kɩtame tɩ ninsaal soog we-rũmsi la luiili fãa. B kɩtame tɩ fãa rigd rabeem ninsaal taoore.

⁶B kõo ninsaalb zelemde la nini, n kõ-b tʋba, n kõ-b zug sẽn vɩ.

⁷B pids-b lame ne yam la bãngre. B wilg-b-la neer la wẽng n bake.

⁸B sũurẽ wã b pʋdga b vẽenem, tɩ b ges la b bãng tɩ b sẽn maand fãa yɩkda pɛlenga.

¹⁰Woto b tõe n pẽga b yʋʋre la b wilg tɩ b tʋʋma labsa. Zooda noya

¹¹Wẽnd pidsa ninsaalb ne bãngre, n le kõ-b noor sẽn ya vɩɩm.

¹²B yõga zood ne bãmba, zood sẽn ka tõe n sãam ye. B wilg-b-la b sẽn yalse.

¹³B puka b nin tɩ b yãend b ziiri, b tʋb wʋma b koɛɛga sẽn sãte, n sãt ne pãng la naam.

¹⁴B yeel-b lame: «Gũus-y y meng ne yel-wẽng buud fãa.» B kõ-b-la noya sẽn get bãmb ne b taab yelle. Bũmb ka põsd Wẽnd nif ye.

¹⁵Wẽnd nee ninsaalba wakat buud fãa, bũmb ka solg b nif ye.

¹⁶[B rɩkda wẽng sore tɩ b nan paooda la b sũura sẽn zoe n kʋɩ wã kõn teem ye tɩ pʋɩɩr ning b sẽn paam sɩngrẽ wã, yaa sũur ning sẽn teesa wẽngã.]

¹⁷B kõo buud kam fãa a naaba, la a Israyɛl pʋɩɩr la Naaba-Wẽnde.

¹⁸[Naaba-Wẽnd wubd-a-la wala b bi-kẽenga, n kõt-a wakat fãa b vẽenem la b nonglem kaseto.]

¹⁹B kamba tʋʋma fãa rɩga b taoore wala wĩndgẽ; b nif teega b yel-manesem wakat buud fãa.

²⁰Bũmb ka be n ya kegre tɩ b pa neẽ ye, ninsaalb yel-wẽna fãa puk n dɩgame. [Tuubg la b yẽrg n kolg b kamba, pagb la rapa.]

²¹[Soaala mi-la b pʋɩɩre la b yaa sõngo, b ka basd b nebã, b ka gind-ba b zãad-b-la ne nonglem.]

²²Wẽnd nifẽ f sã n maan ned yel-sõmde, yaa wala f menga la f kõ yã, la b pẽgdame wa ned sẽn pẽgd a nin-biiga.

²³B na n wa yika daar a yembre n dol-ba. B na n dɩka b rolbã n tʋk-ba.

²⁴B kõta neb niyns sẽn mi-b tuubgã tɩ b le paam n kolg bãmba, la sẽn da bas-b raooda le yikda ne raoodo. D lɛɛg n kẽ Wẽnde

²⁵Wẽnemd f neng n tees Soaala, n zãag f meng ne wẽnga, f sã n pʋʋs bãmba f woogda f yel-wẽnda zɩɩbo.

²⁶Lɛɛg n wa kẽ Yĩngr-Soaala, zãag f meng ne wẽnga, kisg bãmb sẽn kis bũmb ning wa fãa-fãa.

²⁷Kɩɩmsẽ, ãnd n na n pẽg Yĩngri-Soaba, sẽn vɩ-ba sã n ka pẽgd-b tẽng zug ka?

²⁸Ned sã n ki, a ka le tõe n pʋʋs bark ye. Yaa a sẽn vɩ-a ne laafi n tõe n pẽg Wẽnde.

²⁹Soaala nimbãan-zoeer ka tɛk ye, la sẽn lɛɛg n kẽed-b bãmba paamda sugri.

³⁰Ninsaal ka be n ya sõng zãng ye, ninsaal ka be n ka kiid ye.

³¹Bõe vẽenem n ta wĩntoogo? La ne rẽ fãa a wat n kẽeme la a menemdame; ninsaal ne a wẽnema me yaa boto.

³²Wẽnd sã n sokd yĩngr ãdsã b sore, d kõn gom ninsaal sẽn ya tãnd la tom ye!