Read SEBR SÕNGO, 1998 Sira biiga 18 Bible Online

Sira biiga 18 - SEBR SÕNGO, 1998 bible

Sira biiga 18

¹Soaala ziira labsem [1] Sẽn vɩ-a t'a vɩɩm ka be sɛɛbã, naaga bũmb fãa n naane.

²Soaala bala sõmblem la b tog n kilsi,

³[Wẽnd a to ka be n paas bãmb ye. Bãmb n zãad dũni wã la bũmb fãa reegda b noore. Bãmb la dũni dĩma, n bakd bõn-zaalle la bũmb sẽn dɩk n kõ Wẽnde.]

⁴B ka na n kos ned ba a ye t'a wilg b sẽn na n maan ye, la sɩda, ãnd n tõe n puk b yel-bãna?

⁵Ãnd n tõe n mag b pãnga sẽn ka be tɛkã? La ãnd n tõe n togs b yel-sõma wã fãa?

⁶Ka tõe n woog bũmbu, ka tõe n paas fɩ. Ka tõe n wʋm Wẽnd tʋʋm bãna zãng ye.

⁷Fo yetame tɩ f mii Wẽnde la f bãngra taa bãngr tɛka, mik fo nan bee sɩngrẽ. Fo sẽn yet tɩ f pida ne bãngra wakato, la f sẽn lɛɛg n pid ne pɛlen-yɩka. Ninsaal yaa bõe?

⁸ [15†] Ned yaa bõe, a bee bõe yĩnga? A tʋʋm sõma wã yõodo, a tʋʋm wẽnsa yõod la bʋgo?

⁹A vɩɩma sã n ta yʋʋm koabga, yaa wʋsgo.

¹⁰Sã n yegl vɩɩm tõt sɛɛbã yaa ko-beelle ne mogra tõre, yaa bĩisr beelle ne bĩisr saongo.

¹¹Yaa rẽ yĩnga la Soaala ka maand yãgb ne ninsaal ye, n pidsd ninsaal ne b kũun sõma.

¹²B neeme, b miime t'a baasgo bee nimbãanega. Pʋs n yaa rẽ yĩnga, la b ka zãad-b ne toolem ye.

¹³Ned bʋgsa ne a roagda, sã n ya Soaala bãmb bʋgsa ne dũni rãmba fãa. B sã n ka tũud so-sõngo, Wẽnd wilgd-b lame, b sagend-b lame, b nekda b yam, b lebd n tall-b lame n wa b nengẽ, wala pe-kɩɩm sẽn maand ne a pesg sẽn meneme.

¹⁴B zoeta neba nimbãanega, sẽn maood-b n na n paam zãmsga nimbãanega. Taab sõngre

¹⁵M biiga, fo sã n sõngd f to bɩ sõngra ra naag ne zabr ye. F sã n kõt ned bũmbu bɩ f sõngra ra naag ne sagls sẽn zabd a soab ye.

¹⁶Gomd noogo bʋkda sũuri n yɩɩd kũuni. Yaa wa pems maasga sẽn bʋkd yĩnga tʋʋlg sẽn kʋɩɩse.

¹⁷Gomd noogo são kũun kãsenga. Sẽn nong-a a to sõngre naagda a sõngrã ne gom noodo.

¹⁸Bẽer sẽn ka kɛɛg soaba ka sagend ne gũusg ye. F sã n deeg zoe-bõn soab kũuni bɩ f pĩnd n sɩng yãbre. Yam vẽen-ned mii gũusgu

¹⁹Deng n tags neere n yaool n gome, pĩnd n tɩbs f menga tɩ bãaga nan ka lub-f ye.

²⁰Deng n kao f meng bʋʋdo tɩ Wẽnd dẽnd nan watẽ. Woto yɛla pukr daare Wẽnd na kõ-f sugri.

²¹Da bas f bãaga t'a kẽ pãf tɩ f yaool marsã n deeg tɩ foom n bao ye, f sã n lʋɩ yel-wẽnnẽ bɩ f modg ne tuubgu.

²²F sã n pʋlem Soaala bũmbu, pids f pʋlemdã a wakat sã n ta.

²³Deng n bãng f pʋga n yaool n sɩng pʋlengo; da maan wa f rat n kʋɩɩba Soaala ye.

²⁴Tags tɩ f tõe n puuga Soaala sũuri tɩ bãmb me wa yik n yet tɩ b ka mi foom n kong n sɩbg-f ye.

²⁵Tɩgr sã n be f zakẽ, tags kom lʋɩɩs yelle, fo sã n tar arzɛka, tags naongo la nimbãaneg yelle.

²⁶Yibeoog n ta zaabre, bũmb wʋsg tõe n teemame, Soaala taoore bũmb fãa loogda tao-tao.

²⁷Sẽn tar-a yam gũusda a menga bũmb fãa pʋgẽ, kʋɩɩbg wakato, a gũusda a menga n da lʋɩ yel-wẽnd pʋgẽ ye.

²⁸Ned ning fãa sẽn tar yam mii yam vẽenem sẽn ya a soaba, a miime tɩ yam vẽenem soab toga ne pẽgre.

²⁹Sẽn wʋmd-b yam vẽenem dãmba goam neere lebgda yam vẽenem dãmba. B kiigda yelbũn noodo wa saag koom. Tõog-m-menga

³⁰Da bas tɩ f raab wẽnsa vu-f n kẽ moog ye; modg ne tõog-m-menga.

³¹Fo sã n bas f menga n tũ f tʋls wẽnse, fo bɛɛb na n laa foom.

³²Da bao sũ-nood wẽns zĩig ye, da wa sãam f paoong zaalem ye.

³³Fo sã n ka tar lagf f gɩfẽ, da kẽes f meng naongo, n dɩk ligd pɛma n maan kibs rãmb ye.