Read SEBR SÕNGO, 1998 Sira biiga 2 Bible Online

Sira biiga 2 - SEBR SÕNGO, 1998 bible

Sira biiga 2

¹Maan daood namsg wakato [1] [3†] M biiga, fo sã n dat n yɩ Wẽnd tũuda bɩ f pĩnd n segl f menga n gũ namsgo.

²Bao sũ-tɩrga la raoodo, da bas tɩ f sũura kius yel-pakr wakat ye.

³Dɩk f menga n kɩs Wẽnde, da zãag f meng ne b ye, tɩ f vɩɩma na baas neere.

⁴Yell ning fãa sẽn na n pak-fo, bɩ f sake, la f maan tõog-m-menga.

⁵B ningda sãnem bugmẽ n bãng a sã n yaa sõmbo; la sulg-m-meng n pukd f sã n tara Wẽnd zoodo.

⁶Teeg Wẽnde, tɩ b na sõng-fo. Dɩk f sor tɩrga, la dɩk f meng n kɩs-ba.

⁷Yãmb sẽn zoet-b Soaala, teeg-y b nimbãan-zoeere, da bʋdg-y ye tɩ y wat n lʋɩɩme.

⁸Yãmb sẽn zoet-b Soaala, teeg-y-ba tɩ y na paam dolbo.

⁹Yãmb sẽn zoet-b Wẽnde, saag-y tɩ y arzɛka na paase, tɩ y na paam sũ-noogo la nimbãan-zoeer sẽn ka be sɛɛbo.

¹⁰Tags-y n ges sẽn deng-b tõnd moogã: ãnd n kɩs Soaala sɩda tɩ Soaala bas t'a yell sãam? Ãn n kell n dig Soaala rabeem tɩ Soaala ka ges a soab yelle? Ãnd n kos b sõngre n ka paame?

¹¹Ad Soaala yaa nimbãan-zoeta la b kũmda neda; b kõta yel-wẽna sugri, la d paamda b sõngre, d yɩɩr pʋgẽ.

¹²Zu-bʋk rãmba la rabɛɛmba, sẽn ka tar-b raoodo, zu-bʋk soaba la yel-wẽn-maanda, ninsaan-kazukemdi!

¹³Zu-bʋk rãmba la neb niyns sũur sẽn ka kẽnkẽ, tẽeb kaalem yĩnga, tɩ b ka na n paam koagend ye!

¹⁴Yãmb yaa zu-bʋk rãmba, yãmb sẽn basd raood tao-tao wã! Yãmb na n maana wãna, Soaala sẽn na n wa ges-y raare?

¹⁵Sẽn zoet-b Soaala ka kɩɩsd b goama ye, sẽn nong-b Soaala maanda b sẽn date.

¹⁶Sẽn zoet-b Soaala dabeem, maanda b yam, sẽn nong-b Soaala deegda b noya.

¹⁷Sẽn zoet-b Soaala, baooda Soaala sũ-noogo; la b sakdame n sulg b mense bãmb taoore.

¹⁸B yetame: «D da lʋɩ ninsaalb nusẽ ye, d lʋɩ Soaala nusẽ, tɩ b pãnga sẽn ta zĩig ningã b sugrã la b bas-taala me taa zĩ-kãnga.»