Read SEBR SÕNGO, 1998 Sira biiga 20 Bible Online

Sira biiga 20 - SEBR SÕNGO, 1998 bible

Sira biiga 20

¹Goam leokre [1] Gom n zabe ka tog wakat buud fãa ye. Sĩndgu beeme sẽn wilgd tɩ f pida ne yam vẽenem.

²Fo sẽn na n gom n são fo sẽn na n kẽnd ne sũ-puuri.

³Sẽn wilgd-a tɩ yẽ maana yelle, põsda sɩbgre.

⁴Sẽn baood-a ne pãnga n na n kõ a meng bʋʋm wẽnda zu-soaba sẽn dat n yõg bi-pugla.

⁵Neb beeme n sĩnd a noore n wilgd tɩ b tara yam, kẽer me beeme tɩ b kis-ba b goama yĩnga.

⁶Nina sĩnda a noore, t'a ka mi a sẽn na leok ye, tɩ yõa soab sĩnd a noore n gũud leokr wakato.

⁷Yam vẽenem soab sĩnd a noore n na n wa leoke, leokr wakat sã n ta; sã n ya gom-toog soaba la gãeenga, bãmb wat n basa wakata t'a looge.

⁸Sẽn gomd-a wʋsgo, b ka nong yẽ soab ye. Sẽn pa rat-a n gome yẽ me soab ka tar pẽgr ye. Ned sẽn pa tẽede

⁹Nina paamda yõodo a zu-beed wakato, tɩ zu-noog ninga wat ne yel-beedo.

¹⁰Kũun kẽer beeme n ka nafd ned ye, tɩ kũun kẽer beẽ n na n paas f paoong naoor a yi.

¹¹Daar ninga pẽgr wata ne yãnde, la neb kẽer paamda zu-zẽkre b yãnd poore.

¹²Nina daada bũmb wʋsgo ne ligd bilf bala: tɩ kẽer daad bõn kãens ne ligd wʋsgo.

¹³Sẽn tar-a yam gomda bilf bala tɩ b nong-a. Yam sẽn ka vẽen soab tara gom noodo la yaa zaalem.

¹⁴Gãeeng kũun ka nafd foom ye, a rata ne a sũur fãa tɩ fo wa lebs-a wʋsg-wʋsgo n yɩɩd yẽ sẽn kõ fooma.

¹⁵A kõt-f-la bilfu la a na n leeg-f-la ne goam bɛda. A na n pora f zugu wa raag-biiga. A pengda foom rũnna, la a yikda beoogo n na n wa reege, neb ka nong ned a woto buud ye.

¹⁶Yalma yetame: mam ka tar zoa ye, m yɛsa ne yel-sõm-zɩtem. Sẽn dɩt-b mam dɩɩbã yaa zɩtba.

¹⁷Mik a sẽn gom woto wã a basa neb ne laado. Gomd pa gomd yaar ye

¹⁸Fo sẽn na n lak kugr sor zugu são f sẽn na n gomd goam n yõsda. Nin-wẽnsa lʋɩɩs na n wẽnega kugr lakre.

¹⁹Ned sẽn ka yãend wubri wẽnda kibar sẽn ka tog ne kelgre la yaool n yaa yẽ bal n be nin-yaalsa noorẽ.

²⁰Neb ka kelgd yalma yelbũnd ye, t'a wẽeda yelbũn yaare.

²¹Nina fara kɩtame t'a põs yel-wẽnde, woto wã a sã n kɩlle, a gõeema sakdame.

²²Nina sãamda a meng yelle, zoe-nif yĩnga, la yaa gãeeng taoor la a yella sãamda.

²³Nina kãabda a zoa bũmb, zoe-nif yĩnga, la beem wat n kẽe sʋka t'a ka tar a sẽn kãaba ye.

²⁴Zirẽ rẽgemda ned al wʋsgo, zirẽ-beed nokda sẽn ka tar-b meng võore.

²⁵Wagdr n são zirẽ-be-naaba, la wagdr ne zirẽ-be-ned wãada taaba.

²⁶Zirẽ yagb ka minungu sõng ye, la a yãnda pʋgd-a-la daar fãa. Yelbũna

²⁷Yam vẽenem soab ka gomd wʋsg ye la b pẽgd-a lame. Ned sẽn ya yẽesem soaba n tat nin-bɛd yam.

²⁸Sẽn mi-a koobo, paamda koodo; ned ninga sẽn tata nin-bɛd yam, n tõe n le wa maneg a yelle.

²⁹Kũun pagda nini, wala yʋk sẽn mumd noore, ka le tõe n togs nin-bɛda kegr ye.

³⁰Yam vẽenem sẽn solge, arzɛk sẽn solge, b yiiba fãa yõod la bõe marsã?

³¹Ned ninga sẽn solgda a gãeemdo, n são sẽn solgd-a a yam vẽenem.