Read SEBR SÕNGO, 1998 Sira biiga 21 Bible Online

Sira biiga 21 - SEBR SÕNGO, 1998 bible

Sira biiga 21

¹Zoe yel-wẽnde [1] M biiga, fo maana yel-wẽnde? Da leb n paas ye, kos f pĩnd yel-wẽna fãa sugri.

²Zoe yel-wẽnde wala fo sẽn zoet waafo, fo sã n kolg-a, a na n kɛ-f lame, yel-wẽnd yẽna wẽnda bõnyẽeg yẽna sẽn kʋʋd neba.

³Noor tõdgre fãa wẽnda sʋʋg ne noya a yiibu, a sãmpogr ka maagd ye.

⁴Pãn-tõog la wilg-m-menga wãada neda, wakr dãmba loogda ne b laogo la b zak rãmba.

⁵Naong soab pʋʋsgo lʋɩta Wẽnnaam tʋbẽ, la a bʋʋd ka na n bʋ n kaoos ye.

⁶Sẽn kis-a saglgo dɩkda yel-wẽn-maand sore, sẽn zoet-a Soaala, reegda b sẽn sagend-a.

⁷Gom-nood soaba, neb fãa mi-a-la al yɩɩga, la ned ninga sẽn tar-a yam vẽenem neeme t'a goama ka sɩd zãng ye.

⁸Fo sã n deesd neb ligdi n met f roogo, ya wala fo tigimda kuga f yaoog yĩnga.

⁹Yel-wẽn-maandb sẽn tigim taaba wẽnda lam-beedo sẽn sam bugum taoore. Fãa wat n yɩɩ bug-kãseng rɩɩbo.

¹⁰Yel-wẽn-maand sor pamame tɩ ya sõma, la a tãagda bʋg-tẽng bog zulunga. Yam vẽenem soab ne yalma

¹¹Sẽn deegd-a Soaala noore ket n so-la a menga, sẽn zoet-a Soaala nif paamda yẽesem sẽn pidi.

¹²Ned sẽn ka zãmsda bũmb naana wubr yaa toogo. Nina me beeme t'a nug rɩkd tʋʋmd naana-naana la rẽ me tõe n waa ne sũ-toogo.

¹³Nin-vẽen-ned ninga bãngre wẽnda kʋɩlg sẽn pid n daannẽ, t'a sagls wẽnd ko-nifu, ko-nif sẽn ya yɩlemde.

¹⁴Yalma sũur wẽnda rʋg poongo, bãngre buud ba a ye ka tõe n pa be ye.

¹⁵Sẽn paam-a wubri wʋmda yẽesem goama a pẽgd-a lame la a zulgd-a lame. La sã n ya nin-yoaad n wʋm-a, a ka tat a yam ye; a lobd-a-la yõees-tabdo.

¹⁶Yalma goama wẽnda zɩɩb zɩsgo ned sẽn tʋk n togd sore, la goam sã n yit yam soab noorẽ, fo kelgd-b-la ne yamleoogo, faasg-faasga.

¹⁷Yam soab sã n gom neb sʋka b kelgda a goama, ned kam fãa bʋgsda a goama a yamẽ.

¹⁸Yalma nengẽ yam vẽenem ne roog sẽn sirg n dɩg zem taaba. Yalma bãngre ka bãngr zulung ye.

¹⁹Yalma nengẽ ninsaal wubr ka bũmb a to n zʋʋg wĩir sẽn loe nao la nusi.

²⁰Yalma laada yaare, n laad n kaasdẽ, yam soab nengẽ bʋʋr ka naagd ye.

²¹Sẽn paam-a wubri, n tar yẽesem yaa sãnem zũur la ning a kanga. Yaa waa zũuri la a paam n ning a rɩtgo.

²²Yalma kẽeda zak ne bʋ-raase, ned sẽn paam gʋʋlgo, kẽeda ne soosgo.

²³Sẽn ka mi-a vɩɩm yɛsa dignoorẽ n lɩkdẽ n get zakẽ, sẽn paam-a wubr yalsda yɩnga.

²⁴Sẽn yɛs-a dignoorẽ n kelgd goama, yẽ soab ka mi vɩɩm ye, rẽ yaa yãnde ne sẽn tar-a yam vẽenem.

²⁵Gom toog soab tara neb a taab goama n togsdẽ, sẽn tar-a yam, gũusda a meng ne goama.

²⁶Yalma rengdame n gome n yaool n tagse, yẽsem soab tagsdame n yaool n gome.

²⁷Nin-wẽng sã n kãabd sʋtãan beedo yaa a meng la a kãabd beedo.

²⁸Nin-wɩds soab dẽgemda a menga, la a kɩtdame t'a tũud-n-taas kis-a.