Read SEBR SÕNGO, 1998 Sira biiga 23 Bible Online

Sira biiga 23 - SEBR SÕNGO, 1998 bible

Sira biiga 23

¹Soaala m ba, la m Naanda, da sak-y tɩ m yell sãam ne m noora goam ye, da bas-m tɩ m dɩk so-wẽng ye.

²Wa-y n dems-y n tagsgo, n yũnug m sũura ne yam vẽenem, tɩ m da le minim wẽng pʋgbo la m sak yel-wẽnd ye, n miẽ la m rat ye.

³Woto m kõn zoe rabeem tɩ m tudgra sõor na n wa paas ye, tɩ m yel-wẽna me wa lebg wʋsgo, tɩ m wa lʋɩ m zabd-n-taas nugẽ, tɩ m bɛ wa lang sũ-noogo, a sẽn tõog-ma yĩnga.

⁴Soaala, m ba, la m Wẽnnaam, da sak-y tɩ m yɩ nin-pa-nand bɩ nin-kʋɩɩr ye.

⁵Zãag-y tʋls wẽnsa ne maam,

⁶da sak-y tɩ yão-beedo, la yoodem tõog m ye; da sak-y tɩ m wa lebg b yem-daoog ye. Goam gũusgu

⁷M kamba, zãms-y n tõog y noore. Sẽn tõe-a a noore, b kõn yãend kegr a nengẽ ye.

⁸Wala sẽn nong-a a taab rõadga, wala wakr soaba, nin-yaalg lʋɩta a goama bẽdgẽ.

⁹ [17†] F noor da minim wẽeneg ye, Wẽnnaam yʋ-sõnga wẽeneg da lebg f ninung ye.

¹⁰Wala dakõor b sẽn gũusd neere, sẽn ka tõe n põs pãbre, woto me ned ninga sẽn wẽenda Wẽnnaam yʋʋre la yaa wakat buud fãa la a wẽenda, ka tõe n põs yell ye.

¹¹Ned ninga sẽn nonga Wẽnnaam yʋʋr wẽenego naoor wʋsgo, a soab yaa nin-wẽnga, la a zak rãmb zĩi ne yɩɩre. A sã n wẽene, ba a pa tagse, yel-wẽnde be-la a zugu, a sã n wẽenẽ n na n tãoos raoodo, a yel-wẽna lebga a yiibu; a sã n wẽen n naag ne zirẽ, b na paalg-a bʋʋdo, a zak wat n pida ne yɛla. Gom-yoodo

¹²Goam buud n be n wẽnd kũum, ka tog t'a paam zĩiga a Zakoob buudẽ wã ye, sẽn ya-b nin-sõma ka rat-a ye, b ka rat n lʋɩ yell a woto pʋgẽ ye.

¹³Da sak tɩ f noor paam gom wẽns minung ye, gom wẽns sẽn wat ne yel-wẽnd minung ye.

¹⁴Fo sã n be nin-bɛd sʋka, f wat n tẽega f ba la f ma yelle, n wa maan sẽn ka neere, n wa tʋm yalem-tʋʋma, n wa yet tɩ fo sẽn na n ka rogẽ n sãoẽ.

¹⁵Ned ninga sẽn paam gom wẽns minungu ka leb n tõe n yɩ yam vẽenem soab ye. Yoob yel-wẽnde

¹⁶Neb a yiib n be n maand yel-wẽn n samdẽ, la a tãab soaba takda Wẽnd sũ-fõore: yaa ned ninga sẽn zĩ t'a raab wẽnga wit wa bugum, la a ra-giisa ka rɩ n sɛ, a ka kiid ye. Yaa ned ninga sẽn dɩk a yĩng n kõ yoobo, n ka sakd n zãag ne yooba bugma waolgo.

¹⁷Nin-yoaad yetame t'a sẽn paam fãa yaa sõmbo, sã n ka a kiime, a kõn gom yaams yell ye.

¹⁸Le yaa ned ninga sẽn zãmbda a paga, n yaool n gomd a sũurẽ: «Ãnda n na n yãend ma? Lebga yʋngo, la m dooga ninga lilli, ned ba a ye ka tõe n yãend-m ye, m na n zoe bõe rabeem? Yĩngr-Soaba na yaa n gʋls m yel-wẽna?»

¹⁹A sẽn zoet bũmb ninga yaa neb wee n da yãend-a; n yaool n yĩm tɩ Soaala nin vẽenem yɩɩda wĩntoog vẽenem naoor tusri; b nee ninsaal tʋʋm buud fãa, bũmb ba a ye ka be b nifa sẽn ka ne ye.

²⁰B da zoe n nee bũmb fãa tɩ b nan ka naan-b ye, n ket n mi-ba, b loogr poore.

²¹Wakat ning a sẽn pa tẽed yõkrã la b na n yõk nin-kãnga. Nin-kãnga na n deega a sɩbgre tẽnga rãmb fãa sɛk zĩigẽ. Pʋg yoodre

²²Ad yɛla sẽn na n yɩ a soaba ne pag sẽn bas a sɩda n tɩ rog rao a to biiga:

²³pipi, a tõdga Yĩngr-Soaba noore, a yiib soaba a beega a sɩda, a tãab soaba a sãama a meng ne yoobo, la a roga ned a to biiga.

²⁴B na n tall-a lame n kẽng zãma wã sʋka tɩ b gom a kamba yelle.

²⁵A kambã, b na n yiis-b-la buudẽ, bãmb ne kamb niyns b sẽn na n dogã.

²⁶Pʋg-kãnga yʋʋr sãama daar buud fãa yĩnga, a kũuma poor menga a yell kõn sak tẽegr ye.

²⁷Neb niyns sẽn na n wa yẽ poorẽ, na n bãngame tɩ bũmb ka be n ya sõmbo wa f sẽn deegd tɩ Soaalã n so-f ye, la bũmb ka be n ya noogo wa b noya reegr ye.