Read SEBR SÕNGO, 1998 Sira biiga 24 Bible Online

Sira biiga 24 - SEBR SÕNGO, 1998 bible

Sira biiga 24

¹SAK A TÃAB SOABA: YAM VẼENEM PẼGRE [1] [18†] Yam vẽenem n pẽgd a menga, buuda sʋka, la a pẽgd a menga.

²Yĩngr zãma wã sʋka la a yaagd a noore, Pãng-Soaba taoor la a kilsd a menga, la ad a sẽn yete:

³«Mam yii Yĩngri-Soaba noorẽ, la wala wulgu m waa n luda tẽngã.

⁴M ti-la m doogo la yĩngr saasa la m kẽeda la m naama goeel dɩgla sawad-taok zugu.

⁵Maam m toore m karga yĩngrã n sege, mam saaga bog-zulumsã pʋs fãa.

⁶Mogra ko-wiisi, la tẽnga fãa bãnga m pãnga, m naama m da rɩt-a-la buud fãa zugu.

⁷M kẽe tẽnsa fãa n bao m vʋʋsg zĩiga, m bao zĩig ning m sẽn na n tilg m zaka.

⁸La bũmb fãa Naanda kõ-m-la noore; sẽn naan-a maama n wilg maam m zaka. B yeel-m lame: tɩ kẽ a Zakoob tẽn-peelmẽ, la f reeg a Israyɛl wala f pʋɩɩre.

⁹B naana maam al tɩ dũni wã nan ka sɩng ye, la m sẽn be la m sẽn be.

¹⁰Sɛka roogẽ, maam n da be taoore n kõt Wẽnd b waoogr kũuni, n tãag m sẽn waa n dʋʋs m meng Siõ tãnga zugu.

¹¹Yaa woto la Soaala kẽes maam b tẽn-nongrẽ, b kẽes-m-la Zerizalɛɛm, na-tẽngẽ. Be la m ket n dɩt m naam.

¹²Mam kɩɩ yẽgna neb sẽn paam pẽgr sʋka, Soaal soolmẽ la m deeg m pʋɩɩre.

¹³Mam bɩɩ wala kʋka, wa Libã tɩ-bedre, wala Ermo tãng zug tɩɩs sẽn ka namsd ware.

¹⁴Mam bɩɩ wala En-Gedi koanga, wala Zeriko tɩ-puugu, mam bɩɩ wala oliviye, mam bɩɩ wala tɩɩs sẽn tão n kul sa-gãnẽ.

¹⁵Mam kõo yũ-noog wala gondreyẽego, wala yulunyuuga, mam kɩtame tɩ yũ-noog wulumdi, wa pɛlga, naglɛng, wisao, rõosen-kila, tɩdare wa wẽnd doogẽ dẽnna sẽn wisdi.

¹⁶Wala kʋka m tão-la m wila, wil sẽn tar pãng la neerem.

¹⁷Mam wẽnda bugsuntungu, m puuda womda biisi sẽn noome biis neb fãa sẽn pẽgda.

¹⁹Yãmb fãa sẽn dat maam, wa-y yã! Wa-y n pids-y y pʋga ne m sẽn kõt-y biis niynsi!

²⁰Mam tẽegr noog yɩɩda sɩɩdo; a noog yɩɩda sɩvaka.

²¹Sẽn dɩt-b maam, m kom na n leb n yõk-b lame. Sẽn yũud-b maam, m ko-yũud na n leb n yõk-b lame.

²²Sẽn deegd-a mam noore, yãnd kõn dɩ yẽ soab ye, la sẽn maan-b mam tʋʋma, kõn maan yel-wẽnd ye.» Yam vẽenem la Wẽnd noore

²³Woto fãa bee Yĩngri-Soaba zood sebre, sebr ninga a Moyiiz sẽn bas ne-do, a sẽn bas wala a Zakoob buuda pʋɩɩre.

²⁵Noora pidame n daannẽ ne yam vẽenem, a pida wala Pizõ kʋɩlga, n pid wala Tigr kʋɩlga sa-sik wakato.

²⁶A pʋɩta yam wa Efrat sẽn yɛdgd a koom la wa Zʋrdẽ, tigsgu wakato.

²⁷Yẽ n kɩt tɩ noya paamd zãmsgo zãmsg sẽn saagd zĩis fãa, wa Nil, wala Giyõ, bugsuntung tõsb wakato.

²⁸Sẽn karemd-b noorã, sẽn sɩng pipi soaba n wat yaoolem soaba, ned ba a ye nan ka tõog n yeele: Marsã m sõdame la m mii kũuna toor-toor, yam vẽenem sẽn wat ne b rãmbã.

²⁹A sẽn kõt-d tagsg niynsa labsa wala mogre, t'a saglsa zulum wala ko-kãsenga.

³⁰Sã n yaa maam, a Sira biiga, m da yaa wa kʋɩlg naoore, wa ko-sor sẽn wedg n tees googo.

³¹Mam yeelame: «M na n zãgsa m tɩɩse, m na n waala m zẽedo.» Mik vugr bala m ko-sora lebga kʋɩlga, tɩ kʋɩlga me wa lebg mogre.

³²M na n kɩtame tɩ m zãmsga puk wa sõore m na n kɩtame t'a vẽenem zãag zĩiga.

³³M na n kɩtame tɩ m zãmsga wẽneg bãngr pukri zamaana sẽn wata yĩnga.

³⁴Ges-y yã: mam ka tʋm m meng yĩng bal ye, m tʋmda neb niyns sẽn baood-b yam vẽenema yĩnga.