Read SEBR SÕNGO, 1998 Sira biiga 27 Bible Online

Sira biiga 27 - SEBR SÕNGO, 1998 bible

Sira biiga 27

¹Neb wʋsg sẽn tʋlg tɩ b paoonga fɩɩge sakame m maan wẽnga. Sẽn baood-a n na n paas a arzɛka ka le lʋɩɩsd bũmb a to taoor ye.

²Wala baafo sẽn tõe n ka lalg kug a yiib sʋka, woto me koaasa ne raada sʋka yel-wẽnd tõe n wẽdg n kẽeme.

³Fo sã n ka modg n sulg f meng Soaala taoore, f zak kõn kaoos lʋɩɩs ye. Gomde

⁴Sã n tar goaadg n goodẽ, rẽgda paada a pʋgẽ, woto me ned zʋg-wẽng pukda a goamẽ.

⁵Wʋnga bugum n wilgd yagdã a laasa sã n yaa sõmbo, ned me gomde n wilgd a sẽn yaa a soaba: sõng bɩ wẽnga.

⁶ [21†] B bãngda tɩɩg biisẽ tɩɩga koaada sẽn ges a yell to-to; woto f sã n kelgd neda f mi-la a sẽn tagsd a sũurẽ.

⁷Da yãg n pẽg ned t'a nan ka gom n sɛ ye. A sã n gom n sɛ la fo yaond n bãng a sẽn ya-la. Vɩɩm sõng yõodo

⁸Fo sã n digd zemsgo, f na waa n paam-a n yõke, la f na waa n dɩk-a n yeelge wa ned sẽn yer naam fuugu.

⁹Luiili sẽn ya buud a ye baooda taab zĩiga n na n vʋʋse. Fo vɩɩma sã n zãr ne zãmbo, ned me kõn kẽ sʋk n zãmb-f ye.

¹⁰Wala bõnyẽeg sẽn lame n gũusd a rũnga, yel-wẽnd me kuiisa sẽn baood-b wẽnga.

¹¹Nin-sõng goam kalma ne yam vẽenem la nin-yaalg rẽnd teemdame, rũnna la beoogo.

¹²Fo sã n kẽng zu-lɛbg soab nengẽ, da bao n sõs n kaoos ye. Fo sã n vɩ ne ned sẽn tar yam vẽenem, y paada ne taab n kaoos tɩ rabeem kaẽ ye.

¹³Yalma goam puugda sũuri, a pusgda laado, yel-wẽnd sẽn noogd a sũur yĩnga.

¹⁴Neb niyns sẽn nong n gomd la b wẽendẽ yɩkda neb pɛlenga; b sã n zabdẽ neb pĩida b tʋba.

¹⁵Wilg-m-meng rãmb zabre wata ne zɩɩm daagre, la b tʋʋr kelgre wata ne sũ-sãanga. Yɛla solgre

¹⁶Ned ninga sẽn nonga n puk sẽn solge, neb pʋg ka leb n pɛɛl ne-a ye, la yẽ soab me leb n paam zoa sɩd-sɩd yaa toogo.

¹⁷Fo sã n tar f zoa, n nong-a ne f sũur fãa, pelg f pʋg ne-a, da lak n bas-a ye, la fo sã n dɩk a yɛl n yelg yɩnga, da leb n bao a zĩig ye: zood sɛɛme.

¹⁸Wala fo ned sẽn ki sẽn menem f yĩnga woto me foo ne f tũud-n-taaga menema taab yĩnga.

¹⁹Fo sã n zãad luiil n wa bas-a t'a yɩke f kõn le paam-a ye, woto me me ne f tũud-n-taaga fo sẽn bas tɩ looge: f kõn le paam-a ye.

²⁰Da bao n le paam-a n yõk ye, a zĩig zoe n zãagame, a zoe wala yãk b sẽn yõk ne bẽdgo t'a fãage.

²¹Ned sã n paam sãmpogre, b tõe n tɩp-a lame, neb sã n tʋʋs taaba, b tõe n kõo taab sugri, ned ninga sẽn dɩka yell solgdem n yelge b ka leb n tõe n teeg yẽ soab yɛs ye. Zãmb goama

²²Sẽn kamsd-a a nini raab ka tɩrg ye; a sã n watẽ bɩ f leb kɛɛnga.

²³Zãmb soab sã n be ne foom yaa gom-noodo, fo sã n gomda a pẽgdame, la a sã n tud a kãar n sɛ, lebga wɩdga, la a tũuda fo sẽn togsã n na n lɛɛg n sãam f yelle.

²⁴Mam kisa bũmb wʋsgo, la ned a woto la m kis n yɩɩda, la Soaala me na n kisg-a lame. Wẽng fãa ne a yaoodo

²⁵Kugr sẽn lobg yĩngr lʋɩta a loabda zugu. Fo sã n zãmb ned n wẽ-a b na zãmb n wẽ foom me.

²⁶Sẽn tuud-a boko, na n lʋɩ-la a pʋgẽ, sẽn bẽt-a bẽdgo lʋɩta a bẽdgẽ.

²⁷Sẽn maand-a wẽnga, wẽng rɩta a soaba, la a ka na n bãng a sẽn yitẽ ye.

²⁸Wilg-m-meng soab tʋʋmde yaa neb laado, la neb tʋʋre; mik a sɩbgre na n tiig-a-la wa bõnyẽega.

²⁹Neb niyns sẽn kɩdemd-b nin-sõma lʋɩɩs yĩnga, bao yelle n kõ b menga, b na n zoe n wʋma toogo tɩ b kũum nan pa ta ye. Sugr kũuni

³⁰Tʋlg n lebs ned wẽnga n puug f sũur ne-a, dẽ me yaa wẽnga, la fãa yaa yel-wẽn-maand tʋʋmde.