Read SEBR SÕNGO, 1998 Sira biiga 29 Bible Online

Sira biiga 29 - SEBR SÕNGO, 1998 bible

Sira biiga 29

¹Pengre [1] Fo sã n sak n pengd f to, f maanda nimbãan-zoeere. Sẽn sõngd-a naong soaba, reegda Soaala noore.

²Sak n peng f to, fo sã n yãe t'a tara zu-loɛɛga, la sã yaa foo n tɩ reeg ned a to ligdi, wakat sã n ta bɩ f tɩ lebse.

³Da teem goam ye, la yɩ pʋ-peen-neda, woto, fo zu-loees wakato, f na n paama f sẽn date.

⁴Neb wʋsg geta bũmb sẽn penge wala bõn piisga, wala bũmb b sẽn tõe n sooge, n yaool n sãamd sẽn sõng-b bãmba sũuri.

⁵Ligda pengr wakato, fo sulgda f meng a soab taoore, n gomd ne yẽesem n pẽgd arzɛka soaba. Lebsg wakat sã n wa ta, fo kaoosda lebsgo, la fo wat n lebsame la f guglumnẽ n yet tɩ woto ne woto n zĩndi.

⁶Fo sã n tar n yaood sẽn peng-a fooma a na ges a meng wa zu-noog soaba a sã n paam a ligdã pʋɩ-sʋka; zu-nooga sã n ka sege, a kõn deeg fɩ la yaa bɛɛba sõor n le paas bala. Fo sẽn da tog n waoog la f pẽg f sõm soabã, lebga tʋʋre la kãab wẽnse, lebga sãbsgo la yĩgsgu.

⁷Dẽ me yĩng la neb wʋsg zãgsd pengre, la ka bũmb a to, ka yet tɩ b rat n lebga nin-toos ye, ya b pa ratame bala tɩ b fã-b zaalem. Wẽn-kosgo

⁸Sẽn na n peng a soaba sã n ya naong soab, da bas-a t'a fĩin n kaoos ye, da bas-a t'a gũ f sõngr n kong ye.

⁹Sẽn na n yɩlẽ n deeg Wẽnnaam noorã, tẽeg naong rãmba yelle; bũmb sẽn ka b nugẽ wã, ra bas-b tɩ b leb zaalem ye.

¹⁰Sak n dɩ bõne ne f ligdi, n yãk n kõ f saam-biig la f zoa. Dẽ n são f sẽn na n bas ligda kugr tẽngr t'a kẽ piisem bɩ n wa sãam zaalem.

¹¹Dɩ f paoonga wala Yĩngr-Soaba sẽn datã la a na zĩnd yõod ne foo n yɩɩg sãnema f sẽn bĩngã.

¹²Bao kũun niyns sẽn na n yols f taabã n bĩngi; rẽ n na n zãag-fo ne yel-beed buud fãa;

¹³rẽ n na n sõng-f n zab ne f bɛɛba; rẽ la f gãong sẽn ya taoko, la f kãnde sẽn tar zɩslem. Sõngre

¹⁴Nin-sõng be-la a to poorẽ, n sõngd-a; yaa sẽn ka zoeta yãnd soaba n basd-a.

¹⁵Ned sã n deeg fo zĩiga n na n yao f sama a maan-f-la yel-sõmd f sẽn ka tog n yĩm ye, a sak n na n dɩɩ bõn fo yĩnga.

¹⁶Ned sẽn ka tar pʋg bala n pa tẽegd f sõm soab yelle.

¹⁷Yel-sõmd-zɩt bala n yĩmd sẽn fãag-a yẽ zaamẽ.

¹⁸B yaool n yɩɩ wʋsgo, neb niyns sẽn tʋlg n sõng b taaba n wa lebg naong rãmb zãngã. Naonga leng-b-la wala sob-raoogo sẽn lengd koglg, mogr zugu. Woto neb sẽn da ya nin-bɛd kong n zoeeme, b zoeeme n zãag ne b tẽnga, n tɩ kẽ tẽn-zẽngẽ n saad yaare.

¹⁹Sẽn yeel-a t'a na n deega naonga soab zĩiga n sõng-a wã sã n ka nin-sõngo, yaa a meng bõne la a baooda, bʋʋda rãmb ka na n bas-a t'a rok yõod ning a sẽn da tẽeda ye.

²⁰Sõng f to wa f sẽn tõe tɛka, la gũus f menga n da wa pa bẽdgẽ ye. Sek-m-menga

²¹Bũmb niyns f sẽn tog n paam n tõog n vɩɩnde: yaa koom, dɩɩbo, fuugu la roog sẽn na n gãande.

²²F sẽn na n zĩ ne f naongo f roog pʋgẽ, são fo sẽn na n tɩ rɩt rɩ-noodo kɛɛnga.

²³Fo sã n tarẽ, tɩ ya biflu, tɩ ya wʋsgo, da guglum ye, woto fo noakensã kõn wɩd-f ye.

²⁴Fo sã n gõod n yeemd zagse, dẽ ka vɩɩm sẽn be sũ-noog ye, fo sẽn ta zĩig ning fãa, b kõn bas-f tɩ f noor yiis gomd ye.

²⁵Fo na n kõo neb tɩ b rɩ la b yũ la b kõn pʋʋs-f bark meng ye. F pʋs n na n wʋma b sẽn be be n gomd beedo:

²⁶«Wa ka, noaka, segl dɩɩba roogo, wa ne fo sẽn zãad f nugẽ wã tɩ m dɩ!

²⁷Yi yɩnga, noaka, nin-kãseng la m bool yã! M gũuda m saam-biiga, yɩ la f bas roogo!»

²⁸Fo sã n mi f menga, wã yaa goam sẽn pa sakd kelgre, b yaand-f lame tɩ f yaa noaka la sam dɩta.