Read SEBR SÕNGO, 1998 Sira biiga 3 Bible Online

Sira biiga 3 - SEBR SÕNGO, 1998 bible

Sira biiga 3

¹D tʋʋm-pakre ne d ba rãmba [1] [4†] M kamba kelg-y m goama, mam yaa yãmb ba, maan-y m sẽn sagend yãmb bũmb ningã, woto y na paam fãagre.

²Soaala pẽgda ba a kamb manesmẽ, la b paasda ma pãnga a kamb gʋʋlgẽ.

³Biig ninga sẽn waoogd-a a ba, paamda a yel-wẽna yẽesgo.

⁴Sẽn waoogd-a a ma tigsda arzɛk n bĩngdẽ.

⁵Sẽn waoogda a ba, na paam sũ-noogo a meng kambẽ, la a sẽn pʋʋs Wẽnd daare, b reegda a kosgo.

⁶Sẽn waoogd-a a ba na paam yõ-woko, sẽn deegd-a Soaala noor noogda a ma sũuri.

⁷A maanda ne a ba wã wa a sẽn tog n maan ne a zu-soaben-dãmba.

⁸Waoog f ba ne f tʋʋma, ra yɩ ne goam bal ye, woto f na paam a barka.

⁹Ba kãab nood viginda a kamb yiri, la ma kãab beedo vikda a biig yiri.

¹⁰F ba sã n yãend paoogre, da noog f sũur dẽ yĩng ye; f ba paoogr ka tõe n wa ne fo zu-zẽkr ye.

¹¹Ad d f ba sẽn paamd waoogre n wat ne fo zu-zẽkre, ma me sẽn ka tar waoore, ningda a kamb yãnde.

¹²M biiga, sõng f ba a kʋʋlem wakato. A vɩɩm fãa pʋgẽ, da sãam a sũur ye.

¹³Ba a yam sã n ka leb n waoogẽ, zoe a nimbãanega, fo sẽn ket n tar pãnga da sãbs-a ye.

¹⁴Fo sẽn maan f ba yel-sõmd ninga, yaa bũmb sẽn ka tõe n yĩmi, la a na n sõnga foom ne f yel-wẽna sugr paoongo.

¹⁵Yell sã n wa pak-fo, Wẽnd na n tẽega f yelle, la f yel-wẽna na n sẽegame n bas-fo, wala ko-kɩd sẽn boogd wĩntoogẽ.

¹⁶Ned toog sẽn ka be ne a ba, yaa wa Wẽnd yʋ-sãamda, la sẽn sãamd-a a ma sũuri, Wẽnd yãka a soab barka. Yam sulgri

¹⁷M biiga, maan bũmb fã ne sũ-maasem, woto sẽn nong-a Wẽnd me na nong-fo.

¹⁸Fo sã n ya nin-kãsenga, bɩ f sulg-f-menga me yɩ kãsenga, tɩ f yell na n manega Soaala taoore.

²⁰Soaala ziira labsa la b pa zãgsd sulg-m-meng rãmb waoogr ye.

²¹Da bao sẽn ya toog ne foom wʋsg ye, la f da vɛɛs n bao sẽn yɩɩd f pãng ye.

²²Deng n ges noor ning b sẽn kõt-fã, da bao n bãng sẽn yɩɩd f pãng ye.

²³Da sɛɛs f pãng ne tʋʋm sẽn yɩɩd-f ye. F sẽn zoe n mi bũmb ninga zʋʋga ninsaal sẽn tõe n bãng ne a yam.

²⁴Kẽer baoome n na n wʋm b sẽn pa tõe n wʋm la b kẽe moogo, bãmb n lɛɛg n tudg b mense. Wilg-m-menga

²⁶Sũur sẽn pa rat tekr fãa, baasda yellẽ, sẽn baood-a yelle, yell lʋɩta a soab zugu.

²⁷Sũur sẽn pa rat tekr, kẽesda a meng namsgẽ, yel-wẽn-maand na n maana yel-wẽna n sam taaba.

²⁸Wilg-m-meng soab yɩɩr ka be woogr ye, tɩ wẽnem kɩɩ yẽgna a sũurẽ.

²⁹Gũus-m-meng soab bʋsgda Wẽnd goama a yamẽ. Yam vẽenem soab sẽn baoode yaa kelg-b neere. Naong rãmb nonglem

³⁰Koom kiisda bugum, wẽn-kosg yẽesda yel-wẽna.

³¹Sẽn maand-a neb neere, tagsda beoog yelle, yell sã n wa pak-a, a paamda sõngre.