Read SEBR SÕNGO, 1998 Sira biiga 31 Bible Online

Sira biiga 31 - SEBR SÕNGO, 1998 bible

Sira biiga 31

¹Arzɛk zãabo [1] Bũmb pa rigd arzɛk soab gõeem n zʋʋg a arzɛka tagsg ye.

²Bũmb me ka rigd naong soab gõeem, n zʋʋg bõe la m na n dɩ tagsgo. Rẽ me wẽnda bã-toogo.

³Arzɛk soab sɛta a pãnga ne arzɛk baoobo, a sã n yalse, lebga a sũ-nood yaalsa zɛɛbo.

⁴Naong soab namsdame n na n bao n kõ a noore, la a sã n wa ka leb n baoodẽ lebga fare.

⁵Sẽn nong-a ligdi ka tõe n põs yel-wẽnd ye, sẽn baood-a arzɛkã, arzɛka wat n kẽes-a-la moogo.

⁶Sãnem pʋgbo sãama neb wʋsg yelle; b waa mikame tɩ b pida ne yɛla.

⁷Arzɛk wẽnda bẽdgo f sã n dɩk f meng n kɩs-a sẽn ka mi-a gũusg fãa, lʋɩta a pʋgẽ.

⁸Sũ-noog soaba la arzɛk soab sẽn yaa pʋ-peen-neda, la a ka zoet n pʋgd a arzɛka ye.

⁹A soab yaa ãnna tɩ d pẽg-a? A yaa bõn-bãnde a taab sʋka.

¹⁰Sẽn maan-a woto, wilga a sõmblem, a toga ne pẽgre, a da tõe n maana yel-wẽnde, n ka maan ye, n tʋm tʋʋm wẽnga n ka tʋm ye.

¹¹Dẽ me la a paoonga ka na n sɛ ye, la neb fãa na n sõdga a yel-sõma. Rɩɩb zĩigẽ

¹²B boola foom nin-bɛda zakẽ tɩ f wa rɩ, da yaag f noore n pẽg ye, da yeele: «Yaa noog ne noog ye.»

¹³Tẽeg tɩ nodg nini n getẽ ka neer ye. Bõe n be n tar wẽnem wa nifu? Yaa rẽ la a sẽn ka zɛɛd nintãm kiigrã.

¹⁴Da tẽeg f nug n yãk f to sẽn gẽend ye; ka rẽ y nusa wat n tõga taab laaga pʋga.

¹⁵Bãng ne f meng yam f to sẽn date. F sã n na n maan bũmbu, deng n tags neere n yaool n maane.

¹⁶Tall f meng wa ned sẽn yãend wubri, da vel muma tɩ b wa sãbsdẽ ye.

¹⁷Da pa laagẽ ye, deng tɩgbo, tɩ yaa woto la sẽn paama wubr maanda. Da rɩ ne yãoodo, tɩ ned wa yɛɛs ye.

¹⁸Sẽn bool b rãmba sã n ya wʋsgo da reng f taab n tʋm laagẽ ye.

¹⁹Bũmb bilfr bal seka sẽn yãee-a wubri, a pʋg ka wɩkd t'a gãee n sesdẽ ye.

²⁰Sẽn dɩt-a bilfu, a gõeem yaa noogo, a yikda pĩnda ne laafi; a ka ne bũmb sẽn keoosd a yĩngẽ ye. Sẽn dɩt-a ne yãoodo, ad-y gõeem ka ye, yaa wʋbdo, yaa pʋ-zabre!

²¹Sã n modg foom tɩ f rɩ tɩ looge, yik n tɩ wʋbe, n paam laafi.

²²M biiga, kelg m goama neere, da sãbs-b ye, sã n kaoose fo na wa n bãng tɩ m goama yaa sɩda. Fo sẽn maand bũmb ning fãa, maan-a ne gũusgu, woto bãag kõn yõk-f ye.

²³B pẽgda ned ning sẽn sakd n bool tɩ b wa rɩ a sẽn yiis wʋsg n dɩgle, b tara a nonglma kaseto.

²⁴Ned nug sã n pa tẽegdẽ, tẽnga rãmb fãa wɩt-a lame, la rẽ me yaa a nug pa kõta kaseto. Rãam

²⁵Da maan wakre ne rãam ye, tɩ rãam sãama neb wʋsg yelle.

²⁶Wʋnga bugum kɩtdame tɩ b bãng sẽyã tʋʋmd sã yɩɩ tʋʋmd sõngo. Rãama tʋʋmda me wẽnda rẽnna: a pukda zab-zabdba zʋgo, b wilg-m-mengã.

²⁷Sã n yũud rãam tɩ zemsdẽ, a manegda ned yelle. Rãama sẽn da waa n kaẽ vɩɩma vɩɩ wãn-wãna? Sɩngrẽ wã Wẽnd naan-a-la ninsaal sũ-noog yĩnga.

²⁸Sã n yũud rãam n yaool n ka yũud tɩ looge, a wata ne laado, la sũ-noogo.

²⁹Sã n yũud rãam ne yão-beedo a wata ne yam beedo rã-tɩgr tusda nebã, a tusdame n lubdẽ.

³⁰Rã-tɩgr bõnda gãeenga n paasd a gãeemdo. A woogda a pãnga tɩ b paamd-a n kutẽ.

³¹Dɩɩb kãseng zĩigẽ, la rãama yĩnga da bao f yak noor ye, da bao n paoog-a, a sã n yũ t'a sũur noome ye, da yiis gomd sẽn tõe n sãam a sũur ye da yaal-a n yet t'a kõ-f f ligd ye.