Read SEBR SÕNGO, 1998 Sira biiga 32 Bible Online

Sira biiga 32 - SEBR SÕNGO, 1998 bible

Sira biiga 32

¹Bãng n tall f menga [1] B yãka foom tɩ f yɩ taoor soaba, n ges tɩ bũmb fãa zems rɩɩba roogẽ, da zɛk f meng ye; bɩ f manesem yɩ wa f rɩt-n-taase ges b yelle tɩ bũmb fãa zemse, n yaool n wa zĩndi.

²Fo sã n maan f tʋʋmde n sɛ, bɩ f tɩ zĩnd marsã, tɩ y naag taaba n noog y sũuri, la b wa pẽg-fo, f tʋʋmna sẽn yɩ neera yĩnga, n kõ-f naam pugla.

³Fo sã n kẽem ne yʋʋma, foo n segd n gome la gom f sẽn mi yell bala, la gom ne gũusgu, n da rig bõn-wẽedi wẽeb ye.

⁴Dɩɩb wakato, da tar goam bal ye, da tãs yaare, tɩ neba rat n kelga yɩɩl la reem. Ka wakat kãng la f tog n yiis f bãngr ye.

⁵Yɩɩn-noodo sẽn naag ne rãam sẽn ya noogo wẽnda kug neer sẽn pɩnda, sãnem nug-bĩng zugu.

⁶Yɩɩn-noodo sẽn naag ne rãam sẽn yaa noogo wẽnda kug neere sẽn kõog ne sãnem.

⁷M zoa, f yʋʋma sã n nan zemsame, da gom sã n ka pakre la b sã n kos-f-la naoor a yiib bɩ a tãabo.

⁸Da bao goam wʋsg ye, la yɩ yella nifu; gom wa ned sẽn mi n yaool n pa na n togs gilli, tɩ b bãng tɩ f tõe n sĩndame.

⁹F sã n be ne nin-bɛdã da bao n lʋɩɩs f meng taoor ye; nin-kẽems sã n be sʋka da gom perer ye.

¹⁰Wala saag yãgb sẽn dengd a kɛlengã, woto me neba dengd n wilga b nonglem la b pẽgr tɩ sẽn tar-a sulg-m-menga nan ka gom ye.

¹¹Wakat sã n ta yik la f ra pa poorẽ ye; kul f yiri la f da pa sor zug n deemnẽ ye.

¹²F sã n ta yiri, deeme, maan sẽn ta f yam la f da maan yel-wẽnde ne f wilg-m-meng goam ye.

¹³Dẽ yĩnga pẽg Soaala sẽn naan fooma la sẽn pids foom ne b kũuna. SAK A NAASE: REEG TƖ WẼND N SO-FO

¹⁴Ned ninga sẽn deega tɩ Soaalã n so-a kelgda b goama; sẽn sãt-b beoog n na pids b raabã, mikdame tɩ b segd-b-la ne b sõngre.

¹⁵Sẽn bilgda Noorã n dat n bãng-a, na n paam n bãng-a lame. Sẽn baood-a ne zãmb dɩka a lʋɩɩs sore.

¹⁶ [24†] Sẽn deeg-b tɩ Soaala n so bãmba, paamdame n bãng sẽn segde la b tʋʋm sõma wã na n wida wa bug-kẽengo.

¹⁷Yel-wẽn-maand ka rat tɩ b yeel-a tɩ bũmb ye, la a gõdgda noorã n tees a sẽn datẽ.

¹⁸Ned ninga sẽn mi a taab saglgo modgdame n deng n zĩnd n tagse. Sãana la wilg-m-meng soab bala n ka mi rabeem.

¹⁹Da maan bũmb tɩ f ka deng n tags n ges ye, woto fo kõn waa n yet tɩ f bãngẽ ye.

²⁰Da tũ so-rʋd ye, tɩ f na n wa lak kugri.

²¹Gũus f meng ne so-saalga.

²²La f gũus ne f kamba.

²³Fo sẽn na n maan bũmb ning fãa, gũus f meng neere. Dẽ me yaa Soaala noya deegre.

²⁴Ned ning sẽn tũuda noore, a tũuda b sẽn yet t'a maan fãa. Sẽn teeg-a Soaala, bũmb ka tõe n sãam a soab yell ye.