Read SEBR SÕNGO, 1998 Sira biiga 35 Bible Online

Sira biiga 35 - SEBR SÕNGO, 1998 bible

Sira biiga 35

¹Maand la to yaoogre [1] Fo sã n deegd noore yaa maanda la f kʋʋd n yɩlemnẽ,

²fo sã n sakd noya reegre neer-neere, dẽ yaa wa laafi kosg maoongo.

³Fo sã n maan wẽn-kosgo dẽ wẽnda maoong sẽn tũnug ne zom pɛɛlga.

⁴ [27†] Fo sã n pʋɩt ne naong soaba dẽ yaa wa pẽgr maoong la f kõta.

⁵Sẽn noom Wẽnnaam, yaa fo sẽn zãagd f meng ne yel-wẽna; fo sã n kis yɛl kɛga, dẽ yaa wa sugr kosg maoongo.

⁶Da kẽn Soaala taoore nug zaal ye.

⁷Noya datame tɩ d deeg-b zãnga.

⁸Nin-sõng kũun wẽnda nem-kaam sẽn dɩgl maan-kugra zugu. A tata Wẽnnaam yam, a yũ nooga tata Yĩngr-Soaba nengẽ.

⁹Nin-sõng maoongo noogda Wẽnd sũuri, la a yaa wa pʋtẽer nekr bũmbu.

¹⁰Pẽg Soaala ne f sũur fãa, la f da yɩ beed soaba ne f kood rẽemsa kũun ye.

¹¹Fo sã n na n kõ kũuni, da gãnem f neng ye, fo sã n pʋɩ f kooda zĩis piiga, n na n yãk pʋɩɩr a yembr n kõ, bɩ f kõ ne sũ-noogo.

¹²Kõ Yĩngr-Soaba wala b sẽn kõ fooma, kõ ne f sũur fãa, wa f sẽn tõe tɛka.

¹³Soaala na n lebsa foom tɩ yɩɩg fo sẽn kõ bãmba naoor a yopoe.

¹⁴Da mak n belg-b ne ligd ye, tɩ b ka na n deeg ye.

¹⁵Da teeg kũun sẽn ka pʋ-peelem kũun ye. Soaala ya bʋ-kaooda, b kaooda bʋʋd ne zemsgo, ka be tɩ yaa a zagla bɩ a zagl ye, sẽn be-a bʋʋm paamda bʋʋm.

¹⁶Naong soab sã n tar bʋʋm b ka na n mong-a bʋʋm n sõng neb a taab ye, b maanda sẽn zemsd bala.

¹⁷B kelgda kɩɩb kosgo, la pʋg-kõor kũmkũma.

¹⁸Pʋg-kõora nintãm pa zoet n sigd a yɛg bɩ?

¹⁹A kɛleng na n monga sẽn yãbs-a wã bʋʋm.

²⁰Sẽn tʋmd-a Wẽnnaam tʋʋmde ne a sũur fãa, yẽ yell manegdame, la a kɛleng tata Wẽnnaam nengẽ.

²¹Sulg-m-meng soab pʋʋsgo tata Wẽnnaam nengẽ, a ka tar vʋʋsgo a pʋʋsga sã n ka ta b nengẽ ye, n paam a sẽn datã n wa kõ-a ye, a ka vʋʋsd ne a kosgã Yĩngr-Soaba sã n ka leok ye.

²²Yĩngr-Soaba na n lebsa nin-tɩrga a sẽn tog n paam. Soaala ka kaoosd leokr ye, b ka basd sẽn wãad-b nin-tɩrga ye. Neb niyns sẽn ka kũmd b taab nimbãanega bãnge tɩ b na n wa rũma bãmb n pʋdg b seese wa kãnenkãaga.

²³B na n doka b sũur ne bu-zẽmbã, al n wa menes nin-yooda buudu, la b kao na-yooda naam dasaare,

²⁴al n wa dol ned kam fãa a tʋʋm-sõma, n dol ninsaalba tʋʋm-sõma wã fãa b sẽn dag n dat n tʋme,

²⁵al n wa sõng b buudã, n sik b nimbãan-zoeerã a zugu, t'a sũur maage.

²⁶Nimbãan-zoeer sã n sig yɩɩr wakato, a wẽnda sawat sẽn wat ne saaga war wakato.