Read SEBR SÕNGO, 1998 Sira biiga 36 Bible Online

Sira biiga 36 - SEBR SÕNGO, 1998 bible

Sira biiga 36

¹Pʋʋsgo Wẽnd buuda yĩnga [1] Wẽnnaam, dũni fãa Soaala, zoe-y tõnd fãa nimbãanega

²la y sõng n kẽes yãmb dabeema dũni wã fãa pʋgẽ.

³ [28†] Wilg-y y pãnga ne bu-zẽmbã, tɩ b bãng y pãng sẽn ta zĩig ninga.

⁴Yãmb sẽn sɩbg tõnd beegrã, y wilga bu-zẽmbã y sẽn ya Wẽnd ninga, y sã n sɩbg-ba tõnd me na bãng y sẽn pid ne ziir ninga.

⁵Kɩt-y yã tɩ b fã bãnge wala tõnd fãa sẽn mi wã, tɩ Wẽnd a to ka be sã n ka yãmb bala, Soaala.

⁶Leb-y n maan-y bõn-bãna yɛsa, wilg-y y nug pãnga.

⁷Wilg-y y nug la y kang pãnga.

⁸Nek-y y sũ-puuri, tɩ y sũura fudg n waag-ba.

⁹Menes-y d zabd-n-taagã, menes-y d bɛ wã.

¹⁰Yẽrg-y d wakatã n kolg-do, sõng-y tɩ b kils y tʋʋm-bãna.

¹¹Kɩt-y yã tɩ bugum yõog y sũ-puura sẽn kees b rãmbã, kɩt-y yã tɩ sẽn namsd-b yãmb neba wã zãnga!

¹²Menes-y nanams niyns fãa sẽn yet-ba: «Ned ka be n yɩɩd tõnd ye.» Fiuus-y b fãa zutu.

¹³Tigim-y Israyɛl buuda kamb fãa,

¹⁶lebs-y bãmb tẽng ninga y sẽn da kãab-b al sɩngrẽ.

¹⁷Zoe-y buud ning sẽn ya y pʋɩɩrã nimbãanega, Soaala, zoe-y yã a Israyɛl neba fãa nimbãanega.

¹⁸Zoe-y tẽng ning y sẽn me y rooga nimbãanega, zoe-y Zerizalɛɛm, y vʋʋsga zĩig, nimbãanega.

¹⁹Pids-y Siõ ne yãmb tʋʋm bãna kilsgu, pids-y y rooga me ne yãmb ziiri.

²⁰Wilg-y t'a Israyɛl la y pʋɩɩre la yãmb n naan-a al sɩngrẽ. Pids-y y kãabd niyns bãngdbã sẽn togsã.

²¹Kɩt-y tɩ neb niyns fãa sẽn teeg b yãmb, paam y sẽn kãab-ba. Kɩt-y tɩ b bãng tɩ yãmb bãngdba yaa sɩd dãmba.

²²Soaala deeg-y yãmb neba pʋʋsgo, wala y sẽn sɩng n maand ne y buudã. Woto tẽng zug rãmba fãa na bãng tɩ yãmba, Soaala, la b Wẽnde, zamaan ne zamaana. Bãng n bake

²³Dɩɩb toor-toore kẽeda pʋgẽ, la b noom yɩɩda taaba.

²⁴Wala noor sẽn bakd we-rũng ne yir rũng nemdo, woto me ninsaal sũur kɩtdame t'a bãng n bake goam sẽn ya zirẽ la sẽn ya sɩda.

²⁵Zĩnd ne sẽn ka-a sũ-tɩrg soab ka naana ye; sẽn zĩnda n kaoos ne-a, kõn kong a sẽn na n maaneg ye, a na rol-a wa sẽn segde. Pag tũusgu

²⁶Pag sakda a sẽn paam sɩd ninga, la kom-pugli beeme n são b taaba.

²⁷Pag neerem noogda a sɩd sũuri, a ka rat bũmb a to n zʋʋg rẽnd ye.

²⁸Pag sã n tar zelemd noogo la zelemd bʋgsgo a sɩd sũ-noog yɩɩda a taab fãa.

²⁹Ned ninga sẽn paama paga paama a arzɛk sɩngre, f sã n paam sõangd wa paga f paama f teegda.

³⁰F sã n sel f zeedo n yaool n ka ning yãgre zẽeda lebga sẽn data n zɛ fãa zẽedo. Pag sẽn ka be zĩig ninga, rao me kẽndame la a yãbd a menga, a ka mi a sẽn lebdẽ ye.

³¹Ãnnda n na n saag n pelg a pʋga ne so gɩta sẽn yit tẽng a ye n kẽed tẽng a to? Woto me ãnda n na n pelg a pʋg ne rao sẽn ka tar zaka n gãe zĩig ning wĩndg sẽn sobg-a?