Read SEBR SÕNGO, 1998 Sira biiga 37 Bible Online

Sira biiga 37 - SEBR SÕNGO, 1998 bible

Sira biiga 37

¹Zoodo [1] Neb wʋsg n wat n yeele: «Maam me yaa fo zoa!» La nina yaa zoa ne yʋʋr bala.

²Sũ-sãang sẽn zem kũum dẽnna yaa f sã n tar f tũud-n-taaga, bɩ f zoa t'a wa lebg fo bɛyã.

³Tõnd ninsaalb sẽn nong wẽnga yita yɛ tɩ dũni wã zãng fãa wa pid ne tudg taaba?

⁴Nina yaa f zoa n na n dɩ f yõodo, yell sã n pak-fo, a lebgda f bɛyã.

⁵Nina tõe n sakame n nams ne foo, fo sã n dɩlgd-a. Fo sã n yik zabr ne f bɛɛba, bãmb la a sõangda.

⁶Da yĩm f zoa yelle zabra wakat ye, la kell n tẽeg a yelle bɛɛba laoga pʋɩɩb wakato. Sagenda

⁷Sagend fãa sagendame, la a gomd tɩ yẽ saglga la saglgo, la kẽer baooda sẽn na n lɛɛg n naf-b bala.

⁸Gũus-f menga ne sagendba, deng n sok f meng n gese yõod bʋgo la a baooda? Tɩ f mi t'a sẽn sagend fooma ka zaalem yĩng ye. Gũus t'a tõe n yãenda fo bũmb n data.

⁹A tõe n yeela foo: «Fo bãnga yãkre!» n yaool n tar n leb kɛɛnga, n na n ges yell ning sẽn na n pak fo.

¹⁰Ned sã n ka pẽgd-fo bɩ f ra kos-a saglg ye da wilg sũ-ki-neda, f sẽn dat n maan bũmb ning ye.

¹¹Da kos pag saglgo a pʋg-to poorẽ ye. Da sok dabɛɛm maoor sẽn yõgd to-to ye. Da reeg koaas saglgo bũmb raab poorẽ ye. Da reeg lɛɛbd saglgo bõn-koosem poorẽ ye. Da kos zoe-bõn soab t'a sagl-f sõm poorẽ ye. Da kos nin-toaag t'a sagl-f bʋgsem poorẽ ye. Da sok kʋɩɩm daolgo tʋʋmd poorẽ ye. Da sok dakõor sẽn dɩkd ligd yʋʋmde, tʋʋmda sẽn na n baas wakat ning ye. Da sok kʋɩɩma tʋʋmd sẽn kaoosd porẽ ye. Da bao n na n bãng yaa wakat bʋgo la a na n wa ne b sẽn kos-a wã ye. Da reeg nin-bãmba fãa saglg ba a ye.

¹²F sagenda yɩ wẽn-tũuda, ned sẽn tũud noorã, n tagsd wa foo; woto yella sã n ka baas neer me, a kũmd-f lame. Bɩ f tũud-n-taag meng yɩ nin-sõngo.

¹³Kelg f sũura koɛɛg saglgo n yɩɩda, sagend sẽn ya sõng n yɩɩd yẽ ka ye.

¹⁴Ned sũur sagend-a lame n yɩɩd neb a yopoe sẽn zao gaosg zug n gũusdẽ.

¹⁵Sẽn yɩɩd fãa-fãa, kos Yĩngri-Soaba tɩ b sagl f naoor so-sõngẽ. Ned a to n dɩt f yam vẽenema yõodo

¹⁶Tʋʋm fãa yẽsdame n yaool n sɩnge; tagse n yaool n sɩng bũmbu.

¹⁷Yama tagsgda sẽn noom sũurã.

¹⁸Sũura yaa wa tɩɩga, n tãood wil a naase. Yaa neer bɩ wẽnga, vɩɩm bɩ kũum. Naoor wʋsgo zelemd n wat n wilg a sẽn yãke.

¹⁹Nina beeme, n tõe n zãms a taaba tɩ b tʋme, n yaool n ka tõe n maan fɩ a meng yĩng ye.

²⁰Nina beeme n ya goam-mita, tɩ neb yaool n pa nong-a n gãnegd-a kom,

²¹yẽ soab wat n baas n kii kom t'a ka paam Soaala nengẽ gom n noog f to sũur ye, ka paam yam vẽenem pɛdg meng ye.

²²Neb beeme n tar yam vẽenem la yaa b meng bal la b nafda, b sẽn yiisd b yamẽ wã sõngda bãmb bala.

²³Neb kẽer me beeme tɩ b yam vẽenema nafd b taaba. B yama sẽn yiisda yaa bũmb sẽn be yõodo.

²⁴Yam vẽenem soab sã n nafd a meng bala, yaa a meng sũur bal la a noogda la sɩda, sẽn yãet-ba boond-a lame tɩ zu-noog soaba.

²⁵Ninsaal vɩɩm bee tɛka, la sã n yaa a Israyɛl, a vɩɩma yʋʋma ka be tɛk ye.

²⁶Ned ninga yẽesem sẽn nafd a taaba pida ne ziiri la b kõn tol n yĩm a yell ye. Tõog f meng ne rɩɩbo

²⁷M biiga, f vɩɩm wakato, tõog f menga ne bũmb wʋsgo, da sak n bao bũmb ninga sẽn ka tog ne f ye.

²⁸Ka bũmb fãa n tog ne neb fãa ye, ka bũmb fãa n tat neb fãa yam ye.

²⁹Da yãe sẽn noom foom n yet tɩ f na bao-a ye. Fo sã n be dɩɩb taoore, bɩ f tõog f menga,

³⁰tɩ f mi tɩ rɩ tɩ looge ka sõma ye, a wata ne sũ-yaalle.

³¹Neb wʋsgo ki-la b yão-beed kũum; sẽn gũusd-a a menga n tõe a menga, yẽ n wogenda a yõore.