Read SEBR SÕNGO, 1998 Sira biiga 39 Bible Online

Sira biiga 39 - SEBR SÕNGO, 1998 bible

Sira biiga 39

¹Sɛb mitba tʋʋmde [1] [29†] Yam vẽenem sẽn pidi ya f sã n naag ne sɛb a taabã n gãd sẽn be Noora la bãngdba rẽnnẽ.

²A bĩngda nin-bɛd sẽn togs bũmb ning fãa a yamẽ, a baoodame n na n bãng b soalma võore.

³A baoodame n na n bãng yelbũna sẽn dat n yeel tɩ bũmb ninga.

⁴A maanda a tʋʋmde nin-bɛd sʋka, la b yãet-a-la nanams sʋka. A toga sore n kẽng tẽn-taasẽ, a bãnga neere la wẽng sẽn yaa a soab neb sʋka.

⁵Yibeoog pĩnda a modgdame n tat a Naanda taoore, la bãmb taoore a pʋʋsdame, a yaagda a noore la a yõkda b sɛɛg a yel-wẽna yĩnga.

⁶Naaba-Wẽnd sã n data, b na pids-a ne yam vẽenem, bãngr goam na rʋʋg wa saaga, a pʋʋsga na tõog n yɩ pẽgr pʋʋsgo.

⁷A na n paama sɩd togsgo kũuna, la bãngre, a na bʋgsa a yamẽ Wẽnd yɛl solgdi.

⁸A na n wilga zãmsgo ninga a sẽn paame, la a na n nooga a sũuri, Soaala zood yĩnga.

⁹Wʋsg na n pẽg-a lame, a yam yĩnga, la b kõn yĩm a yell abada, a yʋʋr na n yii al wʋsgo, la b kõn tol n yĩm a yell ye.

¹⁰Tẽns na n moona a yama vẽenema, la neb kʋʋng na n pẽg-a lame.

¹¹A sã n vɩɩnd n kaoose, a yʋʋra pẽgr kõn zĩnd taar ye, a wakata sã n ta a loogda ne laafi la yõodo. Wẽnd pẽgre

¹²M tagsa neere la ne rẽ fãa m datame yɛsa, n wilg m tagsga sẽn ya a soaba, tɩ m pida ne vẽenem wa kiu-peoolgo.

¹³Kelg-y m goama, m kom-sõma, la bɩ-y zãnga wala koom noor pu-neere sẽn bɩt to-to.

¹⁴Wẽnd tɩdare, kɩt-y tɩ y yũ-noogã piuug zĩis fãa; ning-y puudu, pu-peels wa lɩɩnse. Zẽk-y y koeese, naag-y taab n yɩɩle la y pẽg Wẽnde b tʋʋma fãa yĩnga.

¹⁵Kils-y Soaala yʋʋre la pẽg-y-ba. Pẽg-y ne y noor yɩɩla la ne y yʋʋm teedo. Pʋd-y bark pʋʋsg yɩɩla la y yeel woto:

¹⁶Soaala tʋʋma fãa pida ne neerem. B sẽn tʋlga fãa pidsa a wakato.

¹⁷Ka tõe n yeel b poorẽ: «Woto yaa bõe? Woto yaa bõe yĩngã?» Bũmb fãa wata a zĩigẽ la a wakato. Soaala sẽn gome, ko-zoetem yaasa zĩ-yende n lebg wa lalga. B sẽn gome, koom tẽgna zĩ-koeemsẽ.

¹⁸B sẽn dat tɩ bũmb ning yɩ, yɩtame, ned ka be n tõe n gɩdg-b ye.

¹⁹Tʋʋm niyns fãa ninsaalba sẽn maand dɩga bãmb taoore, bũmb ka be tɩ b ka mi ye.

²⁰B nee bũmb fãa, wakat buud fãa, al dũni sɩngrẽ n digd a sɛɛbo, bũmb ka be n yɩkd b pɛleng ye.

²¹Ka tõe n yeele: «Wã yaa bõe? Woto ya bõe yĩnga?» Tɩ bũmb fãa tara a võore.

²²Bãmb barka wẽnda kʋɩlga sẽn fudg n daannẽ, wẽnda ko-kãseng sẽn yũnug tẽnga.

²³Boto me b sũura sã n puugi a na n dɩɩ tẽnsa fãa wa bugum; yaa wa yamsem la b na n dalg tẽngã n kʋɩɩs-a.

²⁴B soya yaa tɩrse nin-sõma yĩnga, b pida ne kuga la londo nin-wẽns yĩnga.

²⁵Al sɩngrẽ, b naana bõn-sõma nin-sõma yĩnga, la sẽn ka yõodo, nin-wẽns yĩnga.

²⁶Bũmb niyns sẽn ya pakre ne ninsaal vɩɩm, yaa koom, bugum, kutu la yamsem, zom, bĩisim la sɩɩdo, rãam, kaam la futu.

²⁷Dẽ fãa yaa neere nin-sõma yĩnga, la sã n ya yel-wẽn maandba b tõe kɩtame tɩ b lebg bũmb sẽn wat ne nin-wẽnsa bõne.

²⁸Sobd kẽere naana sɩbgre yĩnga, b sã n yiki, b sãamda bũmb wʋsg-wʋsgo, b sã n waa paam sore n na n sãame b wata ne b pãng fãa, la yaa woto me la b sigsd b Naanda sũuri.

²⁹Bugum, sapɩlem, kom, la kũum, woto fãa naana sɩbgr yĩnga.

³⁰We-rũms yẽna, namse, la wiisi, sʋʋse sẽn saas nin-wẽng menesg yĩnga,

³¹Bãmb fãa maanda ne sũ-noogo Soaala sẽn kõ-b noor ningã. Tẽng zug ka b seglame n gũudẽ; wakat sã n ta fãa, b tũuda Soaala yam bala.

³²Yaa m sẽn da mi rẽ fãa al sɩngrẽ la m tags yã la m yet tɩ m na n gʋlsa woto:

³³«Wẽnd tʋʋma fãa yaa sõmbo. Fo sẽn tar b kũuna tʋʋmd wakat ninga f paamd-b lame tɩ b yaa kõata.

³⁴Ka tog n yeele: woto n ya wẽng n yɩɩd ye bũmb fãa neerma tara a pukr daare.

³⁵La marsã, ne y sũur fãa, yɩɩl-y al wʋsgo n pʋʋs Soaala barka.»