Read SEBR SÕNGO, 1998 Sira biiga 4 Bible Online

Sira biiga 4 - SEBR SÕNGO, 1998 bible

Sira biiga 4

¹M biiga, da mong naong soab rɩɩb ye, la f da bas far soab t'a yaal ye.

²Da nams kom sẽn tar a soab ye, la f da puug naong soab sũur ye.

³Tõog f meng ne sũ-puur soaba, da bas far soaba t'a gẽegd f kũuni n kongdẽ ye.

⁴Naong sã n kẽ neda t'a bõsd foom, da rig a soab ye; fo sã n yãe bõasa da wẽnemd f neng ye.

⁵Fo sã n yãe far soaba, da lob f neng kɛɛng ye, da maan tɩ neb wa kãabd-f kãab-wẽng ye.

⁶Ned sã n kãab foom kãab-wẽnga, a far pʋgẽ, a Naanda na n pidsa a kãab-wẽngã.

⁷Bao tɩ neb fãa nong-fo, sulg f menga sẽn yɩɩd-a foom taoore.

⁸Kelg naong soab goama, la a sã n pʋʋs foom bɩ f reeg a pʋʋsem neere.

⁹Fãag sẽn namsd-a nin-toaag nugẽ, la f kao bʋʋdo ne zemsgo.

¹⁰Yɩ wala ba, kɩɩbsa yĩnga; la kɩɩbda sã n ya ba kɩɩbdo lebg wala sɩda, kɩɩba ma yĩnga. Boto fo na n yɩɩ wala Yĩngr-Soaba biiga, tɩ Yĩngr-Soaba nonga foom n yɩɩd f ma sẽn nong-fo. Kam gʋʋlgo

¹¹Yam vẽenem kamba yʋʋr zẽkdame la a nokda sẽn baood b yẽnda.

¹²Sẽn nong-a, nonga vɩɩm, sẽn yikd-b yibeoog n baood a zĩiga, na n pida ne sũ-noogo.

¹³Sẽn tar-a yam vẽenem na n paama pẽgre wa biig sẽn tog ne a ba raboog pʋɩɩre; a sẽn be zĩig ning fãa a paamda barka.

¹⁴Sẽn vɩ-a ne yam vẽenem mii Wẽnd waoogre, sẽn nong-b yam vẽenema, Wẽnnaam me nonga bãmba.

¹⁵Sẽn kelgd-a, kaooda bʋʋdo ne zemsgo la sẽn tar-a yam vẽenem na n vɩɩnda ne laafi.

¹⁶A sã n teeg-a a na n doka a yõodo, yẽnda kamba n na n soog-a wa b rogem pʋɩɩre.

¹⁷Yaa soya sẽn wẽnd goalma la yam vẽenem na n deng n dɩke, a na n deng n kɩtame tɩ f rig Wẽnd dabeem wʋsgo, n wa ne b noya reegre, bũmb sẽn pa naana, n wa ne f fɛɛsg sõmb-sõmbo, sẽn na yɩlẽ tɩ f bãng f meng võore,

¹⁸t'a yaool marsã n tees-f so-tɩrga, n wa ne a vẽnegra sũ-noogo, la a wilg-f sẽn da solge.

¹⁹Fo sã n zãgs yam vẽenema pʋgbo a basd-f lame tɩ f menem. Yãnde la zoe-nifu

²⁰Ges sẽn ya wakat ninga la yell wata, la f zãag f menga ne wẽnga. Da zoe yãnde ne so-sõnga rɩkr ye.

²¹F tõe n zoe yãnd wakat ninga, n maan yel-wẽnde n zoe yãnd wakat ninga, n paam Wẽnd pẽgr la sõmblem.

²²Da yɩ toaaga ne f meng tɩ loog ye, la f da zoe yãnde n wa kong n lʋɩ ye.

²³Da sĩnd f noore f sã n tog n leok ye.

²⁴F goama n na n wilg tɩ f tara yam vẽenem la yaa goamẽ la f bãngd f minim.

²⁵Da gom n yag zirẽ ye, la zoe f zɩɩlem yãnde.

²⁶Da zoe f yel-wẽna togsg yãnd ye, la f da tẽ tɩ kʋɩlg koom gɩdgda naana ye.

²⁷Da yaal f meng yalem taoor ye, la da maan zãmbo pãng soab sõngr yĩng ye.

²⁸Mao sɩd yĩnga, n tol n ta f kũum, Soaala Wẽnd na sõng-fo.

²⁹Da tãs raoodo ne goama ye, la f da yɩ kʋɩɩma la rabɛɛma f tʋʋm pʋgẽ ye.

³⁰Da yɩ wa bõnyẽega f zakẽ ye, la rabɛɛma ne f rakõap ye.

³¹Da tẽeg f nugu sã n ya bũmb deegr ye, n yaool n mum-a sã n ya bũmb lebsg ye.