Read SEBR SÕNGO, 1998 Sira biiga 43 Bible Online

Sira biiga 43 - SEBR SÕNGO, 1998 bible

Sira biiga 43

¹Yĩngr la wĩndgẽ yɛla [1] [34†] Bõe n be n tar neerem wala saaga sẽn yɛdg yĩngrã? Bõe n tog ne gesgo la pẽgre?

²Wĩntoog sã n puki ad a sõora moondame: Yĩngr-Soaala tʋʋma toga ne pẽgre.

³Wĩntoog sã n ka a baafo, tẽnga kʋɩtame. Ãnda n tõe n yaas a waolgẽ wã?

⁴B tusda wʋng bugum t'a wɩng wʋsgo, la ade, wĩndg walem yõogda tãmse n yɩɩd wʋng rẽnd naoor a tãabo. A yiisda waolg n yõogd fãa, n tãood a kãna; la ka bũmb nif sẽn tõe n nodg n gesg ye.

⁵Soaala sẽn naan wĩndga, pãng labsa, Soaala n naan-a la b kõt-a noor t'a kẽn a kẽnde. Kiuugu

⁶Kiuugu me tara a wakat n yita; yẽ n sõt daara sẽn loogdã, n wilgd sẽn kaoosde bɩ sẽn wẽnegd n looge.

⁷Kiuuga boogda a vẽenema n dabda n wa lebg ki-lika. La yẽ n tar kibs sɩngre la a baasgo.

⁸A raara sẽn sõd n pid pis-tã me boondame tɩ kiuugu. Kiuuga be yamleoogo, a bee yĩngri n yãngdẽ la a boogd a vẽenem. Yẽ n lʋɩt ne a bugma ãdsa taoore, yẽ n be yĩngri n pelgd sa-gãna. Ãdse

⁹Ãds n wat ne yĩngri neerma bãmb n yeelgd-a ne faongo n paasd-a ziiri

¹⁰Soaala sẽn dat tɩ b zĩnd zĩig ningã b bee be bala n ka viigd b zĩigẽ ye. Yĩngr te-neeba

¹¹Ges saag gomtɩʋʋgo, la f pẽg sẽn naan-a, a yaa neere n sakd gesgo al wʋsg-wʋsgo.

¹²A bee yĩngri n kargd a gãag ne vẽenem, Yĩngri-Soaba nugu n kargd vẽenem gilgã.

¹³Soaala kõta noore, tɩ sapɩlem dʋʋge Wẽnd wat n paka b zab-teeda roogo, tɩ saaga na n tigs a sʋʋse tɩ b wa pids b sẽn date.

¹⁴Ko-yũusa me na n pagsame tɩ sawat na n sɩng n laand wala luiili.

¹⁵Soaala pãng kɩtdame tɩ sawat lebg tagdo, n wa lebg sapɩlem n dʋʋgdẽ.

¹⁶Tãmsa dĩmda b taoore, tɩ sobg me na n fʋʋs rɩtgo

¹⁷Saaga sã n kelem, tẽnga rigda waoodo tɩ goabg sob-raado la sɩlman na n sɩnge, tɩ sapɩlma na n dʋʋg wa watrpendse, n na n dʋʋg wa sʋy sẽn dʋʋgde.

¹⁸B kɩtame tɩ ko-pɛɛlga sigda, la a peelma yɩkda pɛlenga, n pidsd sũur ne sũ-noogo, f sã n ne-a t'a rʋʋgdẽ.

¹⁹Bũmb n dʋʋgd tẽnga zugu wala yamsem, tɩ koom sẽn gũs pusd gõose, gõ-peelse, gõ-sɩlemse, a faong bũmbu.

²⁰ [35†] Sob maasga sẽn yɩt goabg fʋʋsdame, tɩ kooma zug gũsi, wa waood sẽn gũsd kaam; Koom sẽn tẽgnẽ fãa, boto la a maanda, la yaa wa kut fuug la a bao n yeelg-a.

²¹Sobga kʋɩɩsda tãmsa zut la we-raoogã, a rɩta mooda wa bugum sẽn yõoge.

²²Wulga na n tiig n waa ne rẽ fãa tɩɩm tʋʋlg kãsenga poore, meenem na n dʋʋgame n wa ne bʋgsgo, tɩ b yĩm tʋʋlga kara-namse.

²³Naanda tõoga mogra wa b sẽn date b kẽ-la a pʋgẽ n puk tẽnse.

²⁴Neb niyns sẽn kẽnd b mogra zugu ne koom-koglgo, yik n gomdame tɩ zĩis kẽer beeme sẽn ya dabeem zĩisi, la b sẽn togsda yɩkda tõnd pelense, d tʋbra sẽn wʋmda yɛɛsd-d lame.

²⁵Yaa bõn-bãn zĩiga, ya bõn-neeb zĩiga. Yaa rũms buud toor-toor zĩiga, yaa bõn-nindi zĩiga.

²⁶Wẽnd maasem yĩnga bũmb ka maand a to ye. Wẽnd maag b gomda pãnga, b sẽn naana na n kell n yalsa ne neerem.

²⁷D na kʋʋga koɛɛg bala, tɩ d ka tõe n togs fãa tɩ sɛ ye, woto bal la d na n yeele: «Bũmb fãa bee Wẽnd nugẽ.»

²⁸D na n yãenda pãng yɛ n tõog n pẽg-ba? B zʋʋga b sẽn naana fãa.

²⁹Soaala sɩd kẽesda rabeem wʋsgo, b labsa, b ka tar mak-n-taaga, b Pãnga ka tõe n bilg ye.

³⁰Y sã n dat n pẽg Soaala, kils-y-ba wa y sẽn tõe tɛka, tɩ b labsa. B na n kell n zʋʋga y pẽgra sẽn yet tɩ b yaa a soabã. Yik-y n pẽg-b ne y pãng tɛka la y ra vʋʋs ye. Rẽ fãa ya makre, ka na n kolg weoog ye.

³¹Ãnna n yãend bãmb n tõe n togs b sẽn yaa a soaba? Ãnna n tõe n pẽg-ba wala b sẽn tog ne pẽgr ningã?

³²Bũmb wʋsgo ketame n solge tõnd yĩnga; yaa bõn-bãn sẽn yɩɩd d sẽn gom b rãmb yellã, yaa bõn-bãn d sẽn ka ne.

³³Yaa Soaala n naan bũmba fãa, yaa bãmb n kõ b nin-sõma yam vẽenem.