Read SEBR SÕNGO, 1998 Sira biiga 45 Bible Online

Sira biiga 45 - SEBR SÕNGO, 1998 bible

Sira biiga 45

¹Ninsaalba ra naaga Wẽnde n nong-a. Nin-kãng la a Moyiiz la a yʋʋra ket n pida ne pẽgre, ka tẽegd a yelle n ka pʋʋs Soaala bark ye.

²B kɩtame t'a paam ziiri wala malɛgse la a Israyɛl bɛɛba da rigda a taoore.

³ [37†] A sẽn kos wẽnd makr ning fãa Wẽnd maan-a lame la b puka a pãng Ezipt dĩma taoore. Yẽnda la Wẽnd yeel yã t'a reeg b noya n taas b buudã. Yẽnda nenga waa n tʋʋsda Wẽnd vẽenem.

⁴A Moyiiz yɩɩ sakda, n yɩ nin-bʋgsgo dẽ me la Wẽnd tũus-a la b welg-a toore.

⁵B zĩnda sawad-taok pʋgẽ n taas-a b koɛɛga; a nenga togla bãmb dẽnna la a reega b noya; yɩɩ noy sẽn wa ne vɩɩm la yam vẽenem. Yɩɩ woto me la a taas a Zakoob yagensã Wẽnd zooda sẽn da rat-b ne vɩɩm ninga, la a gɩdg-b yɛl yood niynsã. A Aarõ

⁶Wẽnnaam zẽka a Aarõ, n kõ-a sõmblem wala a Moyiiz, a yao a Moyiiz, a Levi sakẽ.

⁷Yẽ la b yãk yã t'a na n yɩ buuda maan-kʋʋd, daar fãa yĩnga. B yeelg-a-la fu-neeba n pids-a ne sũ-noogo, b yeelg-a-la fu-wok sẽn ka be taare.

⁸ [38†] B faas-a-la ne te-neeba, teed sẽn wilgd a tõogo: ad kur-koees sẽn wʋg ne gĩs peelse, ad fu-koɛɛga, sãnem-pɛ-m-poore.

⁹Fuug a yiib soaba noorã da gilga ne tɩ-biisi sẽn wẽnd poaloang biisi, n paas sãnem loamba bõoneg ka tɛka, t'a Aarõ sã n kẽnd wẽnd dooga pʋga, bɩ loamba wã tar wẽebo, n tẽegd Wẽnde tɩ b buuda neb be-la b sɛɛgẽ.

¹⁰A Aarõ ra yera fuug sẽn tar barka; fuug sẽn wʋg ne sãnem gĩsi, ne gĩs miidu, ne gĩs mismiidu, sulg-mit tʋʋmde. Fu-kãng zug marsã la a sẽbgd sãnem-pɛ-m-yãoogo, yaa gɩf ne tenteese sẽn lobd n bãng Wẽnd leokra yaa n-yẽe bɩ ayoo.

¹¹Sãnem-pɛ-m-yãooga yaa peende, sulg-mit sẽn maneg n buk tɩ ya sõma. Kug bõonego sẽn daad toogo, b neerma yĩnga, la yõak maag a meng n dõog sãnem n gilgi tɩ wẽnd dĩma sẽn tar n tikd a sɛba, kaset yĩngã, la kugr fãa makda Israyɛl buud sak a ye.

¹²A Aarõ zu-vɩndga ra mobga ne sãnem paklga. La ad b sẽn da gʋls a zugu: «Wẽnd dẽnna.» Fãa da nagsame al tɩ b gesgo da be yamleoogo, da yaa fan-teoogo, tʋʋm-mit tʋʋmde.

¹³Nif pa yãe tɩ ned ning te-neeba wala Aarõ dẽnna ye; nif pa yãend bu-zẽn-ned ba a ye sẽn yeelg a taare, dũni wã sẽn yet t'a yaa dũni, sã ka yẽ kamba la a yagense.

¹⁴Wẽnnaam beoog sẽn vẽeg fãa, a da kʋʋda maoong naoor a yiibu n yõog bugum tɩ fãa rɩ bugum buga.

¹⁵A Moyiiz n sõog-a kaam sõngo, n kõ a maan-kʋʋr tõogo. Yɩɩ woto la a kẽes maan-kʋʋr tʋʋmde la daar fãa yĩnga, a Aarõ ne a kamba. B na n lʋɩ taoore n maand maan-kʋʋr tʋʋmde la b ningd neb barka Soaala yʋʋr yĩnga.

¹⁶Wẽnd tũusa a Aarõ a taaba sʋka, t'a na n dɩgl kũuna maan-kugra zugu, tɩdara kũuni, pʋtẽer nekr kũuna, la a kos sugri, buuda yel-wẽna yĩnga.

¹⁷Sã n ya noya, Wẽnd kõ-la a Aarõ tõogo t'a tũ-ba n kaood bʋʋdã la a wilgd b raabo, la a teesd so-sõng ninga a Israyɛl sẽn tog n dɩke.

¹⁸Sẽn da ka-b sak a ye ne yẽnda maana sũ-kiir ne-a, zĩ-pɛɛlẽ, b lagma taab n na n kisg-a. Yɩ-la a Datã ne a Abiram nebã a Kore ne a poorẽ dãmba n da puug b sũur ne-a.

¹⁹Soaala me yãenda bãmb dãmba, tɩ b sũur puug al wʋsg-wʋsgo ne-ba. Soaala maana bõn-bãnde la fãa kii pẽs la yɩɩ bugum n dɩ-ba.

²⁰Wẽnd le gesame n paas a Aarõ kũun a to: b kõ-a lame t'a sooge, yẽ ne a kambã, kood-rẽemsa kũuna. La woto b ra paamdame tɩ sek b raabo.

²¹Maan-kʋʋdba rɩɩbo da yaa maanda sẽn da kʋʋd Soaala yĩngã dẽ la Wẽnd da kõ a Aarõ ne a kamba.

²²La tẽnga pʋgẽ b da ka tar pʋɩɩr ye, tɩ Soaala meng n yeel a Aarõ: «Yaa mam menga la f pʋɩɩre la f arzɛka.» A Pinas

²³Sã n ya pẽgra sẽn tog ne b rãmbã, ad-y yaa a Pinas, a Elazar biiga, la b zaoolg goeel a tãab soaba zugu. A ka reem ba bilfu ne kõ Wẽnd b pipi zĩiga ye. A yika zabre ne buuda sẽn da ya tõatã, la a paama Wẽnd sugri a Israyɛl yĩnga.

²⁴Woto Wẽnd sẽn tʋlg n dol a tʋʋmd sõngã b kɩtame t'a lebg wẽnd dooga taoor soaba, la a buuda me kãsma. Wẽnd kõ-la a Pinas ne a yagensã maan-kʋʋr kãsengo, zamaan woo zamaana, n ta dũni sɛɛbo.

²⁵Wẽnd yalsa ne a Daviid, a Zese biiga, a Zɩɩda roogẽ, t'a na n lebga dĩma. Ba wã sã n wa kaẽ, a biig a ye n na n led-a; ka a sẽn dog kamb niynsa fãa n na n yɩ dĩm dãmb ye. Sã n yaa a Aarõ, a naama yaa a kamba fãa naam.

²⁶Sã n ya yãmba, Aarõ kamba, m pʋʋsda Wẽnde tɩ b pids y sũur ne yam vẽenem tɩ y kao buuda bʋʋdo ne zemsgo, n da wa kong pʋɩɩra la ziira Wẽnd sẽn kãab y buuda ye.