Read SEBR SÕNGO, 1998 Sira biiga 47 Bible Online

Sira biiga 47 - SEBR SÕNGO, 1998 bible

Sira biiga 47

¹A Natã ne a Daviid [1] A Samwɛl poore, a Natã n deeg zĩiga n gom bãngr goama, a Daviid naamẽ.

² [40†]Wala b sẽn wolgd rũng kaam n na n maan laafi kosg maoongo, boto me b tũusa a Daviid Israyɛl kamb sʋka.

³A gesame tɩ zabr ne bõnyẽega bɩ gɩgemd-padre ka toog n yɩɩd wudg n yõk bull bɩ pe-bil ye.

⁴A sẽn wa n ket n ya bi-bilfu, a kʋʋ nin-daoogo n dok buud a Israyɛl yãnde a rɩka a loaabga n ning kugri n lobg n lub tẽnga nin-daoog a Goliyat sẽn da pid ne wʋglem,

⁵la rẽ t'a reng n yõka Soaala sɛɛga. La Yĩngr-Soaba kõ-a-la pãnga t'a kʋ tãb-biig la gãndaoogo, la woto paasa a neba sũ-keelem.

⁶Bɛɛba sẽn dʋʋg badaar taa tus piiga. Woto b pẽg-a-la Soaala sẽn ning a bark yĩnga, la b kõ-a-la naam pugla.

⁷A Daviid tõoga a bɛɛba zĩig zãnga, a tõoga Filistĩ rãmba, a zabd-n-taase, a waa n komsa Filisti rãmb pãnga.

⁸A vɩɩma fãa yɩɩ Wẽnd sõmblema kilsgu yɩɩ Yĩngr-Soaala pẽgre. A sũur waa n pida ne Soaala nonglem t'a maan yɩɩn-noodo.

⁹A baoo yɩɩn-yɩɩndba n ning maan-kugra taoore, tɩ b na n zodg b yɩɩn-noodo.

¹⁰A kɩtame tɩ kibs rãmb noog le paase. Bũmb da ka le maand yaar ye, fãa ra sigla Wẽnd yʋ-sõnga pẽgr yĩnga. Sõor ne a na n puki, tɩ yɩɩla ra zoe n tara wãgbo wẽnd doogẽ.

¹¹Soaala basa a Daviid yel-wẽna fãa taale; b gesame n paas a pãng la a raoodo, b kõ-a-la naam, a rɩɩ naam sẽn tall pãnga Israyɛl tẽnga. A Salomo

¹²A Daviid poore, a biig sẽn ya mita n deeg a zĩiga. Wẽnd sẽn da nong a Daviid yĩnga, a biig a Salomo vɩɩnda rakãar-vɩɩm.

¹³A Salomo zamaana yɩɩ laafi zamaana. Wẽnd kõ-a-la laafi a soolma fãa pʋgẽ. Woto a tõog n me roogo bãmb yĩnga, la roog sẽn na n yals wakat buud fãa.

¹⁴Sɩda, Salomo, fo pida ne yẽesem tɩ f nan paooda, fo ra pida ne yam wa kʋɩlg sẽn pid ne koom.

¹⁵Fo bãngra toaaga, tẽnga sẽn tekẽ, la fo sɩd pids-a-la ne yelbũna, yelbũn ne pagd sẽn tagme.

¹⁶Fo yʋʋr zãaga zĩig wʋsgo, n tol n tɩ wãgd tẽns sẽn puk koom sʋka. F yʋʋra meng sɩd da toga ne-fo.

¹⁷Mooga tõr ra pẽgda f yɩɩla, f yelbũna, n pẽgd f bʋ-kaoore, la f gom tɩrse.

¹⁸Soaala-Wẽnnaam sẽn nong-f yĩnga, a Israyɛl Wẽnnaama yʋʋr yĩnga, fo paama sãnem wala zũudu, n wʋk wanzurfu wʋsg-wʋsgo wala namdo.

¹⁹Fo rɩka f meng n kõ pagba, la f waa n lebga f yĩnga sũ-noog baoob yem-daoogo.

²⁰Woto fo rẽgma f ziiri, n dẽgem f roogo, n tak Wẽnd sũ-puuri a zugu. M pa tẽed tɩ f kamba na pẽg rẽ ye.

²¹Tũu ne rẽ me tɩ f rĩunga welg sags a yiibu, Efrayim tẽng rãmb yik n mursame.

²²Soaala yaool n pa yeel tɩ b na n yĩma b nimbãan-zoeer sẽn ka sɛta ye, b pa yeel tɩ b na n basa b sẽn kãabã n ka pids ye, b pa yeel tɩ b sẽn da tũus a soaba roog na wã ye, b pa yeel tɩ b sẽn da nong a soaba fitil na ki ye. Wala bũmb sẽn kell a Zakoob buudẽ, woto me b keesa a Daviid kamb sẽn na n dʋ a zaoore. A Roboam ne a Zeroboam

²³A Salomo babsa a yaab rãmba; a basa a biig a ye la sɩda yam paooga nin-kãnga, a sẽn da pid yaa gãeemdo, a yʋʋr la a Roboam. A goam sẽn pa yɩ sõmb yĩnga, neba zẽka b zugu. Sã n yaa a Zeroboam, a Nebat biiga, yẽ n kɩt t'a Israyɛl nug goabg tẽn-peelmẽ dãmba maan yel-wẽna, n zãag ne Wẽnde, yẽ n wilg a Efrayim wẽng sore.

²⁴Yel-wẽna sõor da tara paasgo ne paasg bala. Dẽ n kɩt tɩ b wʋk a Zɩɩda n loog pa-weere.

²⁵Yel-wẽna sẽn da tar paasg yĩnga, Wẽnd me waa ne b sɩbgre.