Read SEBR SÕNGO, 1998 Sira biiga 48 Bible Online

Sira biiga 48 - SEBR SÕNGO, 1998 bible

Sira biiga 48

¹A Eli [1] Sã n ya bãngda Eli, yẽ da ya wala bugum, la a goama da wita wala bug-vɩlenga.

² [41†] A kɩtame tɩ kom lʋɩ Israyɛl tẽnga, neba kiime n kell fĩyãayõo, a kẽe Wẽnd n zab a zabre.

³Soaala yʋʋr yĩnga a kɩtame tɩ yĩngri saasa ka le ni ye, a kɩtame me tɩ yĩngr bugum sig naoor a tãabo.

⁴ [42†] Eli, fo bõn-bãna yĩnga fo yʋʋr yiime. Ãnna n tõe n dɩk a menga n mak ne foom?

⁵Yĩngri-Soaba yʋʋr yĩnga, fo vʋʋga kũum n yiis-a bʋg-tẽngẽ.

⁶Fo kɩtame tɩ nanams yell sãame, bãmb ne neb niyns sẽn da pẽgd b mense, b siga b bãd gãag zugu n yak b yaoogẽ.

⁷Sinayi tãnga zugu, Orɛb tãnga zugu Wẽnd sãbs-f lame, la rẽ yaa f sẽn da tʋlg n bas raood yĩnga.

⁸Fo zɛɛ nanams kaam, tɩ b na n maan b tʋʋmde, n zɛ bãngdba sẽn na n wa reeg f zĩiga.

⁹Fo dʋʋ yĩngri, bugum sʋka, ne bilim-bilm sẽn sog bugum wiidi.

¹⁰B pĩnd n tũusa foom tɩ f wa yɩ sɛɛg yõkda, yell pakr wakato, tɩ f kos sugri sũ-puur wakato, la f kɩt tɩ ba rãmba nonglem zĩnd ne b kamba, la f kɩt t'a Zakoob buud le lagem taaba.

¹¹Sũ-noog rãmba la neb niyns sẽn yãend-b-f! Sũ-noog rãmb la neb niyns sẽn ki-b ne nonglem! La tõnd me saagdame tɩ d na le wa paam vɩɩma. A Elize

¹²A Eli zĩnda sɩlmand pʋga, n looge, a Elize paamame tɩ Wẽnd pids-a ne a Eli yam. A vɩɩm pʋgẽ, naab ba a ye ka tõog n kẽes-a rabeem, la ned ba a ye ka tõog-a ye.

¹³Bũmb da ka yɩɩd a pãng ye. A sẽn waa n lebg yaoogẽ bũmb menga a yĩnga ra ket n tʋmda a bãngr tʋʋma.

¹⁴A vɩɩm wakato, a maana bõn-bãn wʋsgo, la a kũum poore, a tʋʋm yɩɩ tʋʋm-bãna.

¹⁵Ne rẽ fãa neba ka tek b zʋg ye, b ka bas b yel-wẽna maaneg ye, al n tol n ta wakat ninga b sẽn waa n dig-ba n yiis b tẽngẽ tɩ b sẽeg zĩis fãa, tẽng zugu.

¹⁶Neb kẽer n kelle, dĩm biig n paa a Daviid doogẽ. Bãmb sʋka kẽer kell n maana neere, tɩ kẽer me da ket n maan yel-wẽna n paasdẽ. A Ezekiyas la a Izayi

¹⁷Dĩm a Ezekiyas paasa a tẽnga lal-gũbr pãnga, a taka koom tɩ wa Zerizalɛɛm tẽnga pʋga. A baoo kutu n wedg pĩiga, n tuk ko-sorã. La a manega zĩisi tɩ b na n bĩngd kooma.

¹⁸Yẽ wakatẽ a Senakerib boba tãpo, la a tʋma a Rabsakɛs, a zẽka a nugu, n na n maan a Siõ pãnga, a da pẽgd a meng ne wilg-m-menga.

¹⁹Dabeem kẽ-la a Ezekiyas t'a nus la a sũur da rigda, tẽnga rãmb fãa da namsdame, wa pag sẽn kũmd rogem.

²⁰B tẽega b nusi n tees Soaala n tees sẽn pida ne nimbãan-zoeerã, n pʋʋs-ba n yõk b sɛɛga. Soaala zĩnda yĩngri n deeg b kosg tao-tao, la b fãag-b lame ne a Izayi sõngre.

²¹Soaala kɩtame tɩ malɛk pãb Asiri rãmba tãb-biisi, la malɛkã wa n kʋ-b-la fãa.

²²A Ezekiyas ra maanda sẽn ta Soaala yam, a ra tũudame n ka bʋdg ba bilfu, sor ning a yaab a Daviid sẽn tũ a soabã, wala bãngd kãseng a Izayi sẽn da sagenda. A Izayi me ra ka mi sagl n kẽes moog ye.

²³Yẽ wakatẽ a Izayi kɩtame tɩ wĩndg targ n leb poorẽ; a wogla naaba yõore.

²⁴A paama yam vẽnegre sẽn kɩte t'a bãng sẽn wat beoogo, n maag a Siõ kʋ-yãbdba sũuri.

²⁵A wilga bũmb ning fãa sẽn na n zĩnd ka ne dũni wã sɛɛbo, a puka yɛl sẽn solge n nan ka yao waoong ye.