Read SEBR SÕNGO, 1998 Sira biiga 50 Bible Online

Sira biiga 50 - SEBR SÕNGO, 1998 bible

Sira biiga 50

¹Maan-kʋʋd a Simo [1] Yaa a Simo, maan-kʋʋd kãsenga a Oniyas biiga, n le maneg Soaala roogo a sẽn waa n deeg a tʋʋmde. Yaa yẽ n le paas rooga pãnga.

²Yẽ n kɩt tɩ b reng n tuk boko n zulg-a wʋsgo, n yaool n le tʋɩɩs lalsa yikri bũmb zãnga lals niyns woglem sẽn paas naoor a yiibã.

³Yaa yẽ wakatẽ la b me ko-baoor n bĩngd koom. Taa sĩng kãsenga wala sẽn da rɩga wẽnd dooga sɩmannẽ wã.

⁴A sẽn da rat ne a sũur fãa t'a neba yell da sãam, zabr wakato, a kɩtame tɩ b me lalga n gũbg tẽngã.

⁵Ad-y yã a Simo ra pida ne ziiri, a sã n da yit sõmblem pid sõmblem doogã, n gilgd wẽnd doogã!

⁶A Simo da wẽnda tõd-beoog ãdga sẽn yãgd sawat sʋka, n wẽnd kiuug sẽn pelge wa pak kiuugu.

⁷N wẽnd wĩndg sẽn yãgd Yĩngr-Soaba roog zugu, n wẽnd saag-gomtɩʋʋg sẽn sõog a roog sawat zugu.

⁸N wẽnd sig-noor wakat puugu sẽn ya neer to-to; wala lɩɩng puugu sẽn be koom sɛɛga, wala Libã tɩɩs, tʋʋlg wakato.

⁹N wẽnd tɩdar sẽn yõgen a laagẽ, n wẽnd sãnem laaga, sẽn pɛ ne kug buud toor-toore sẽn ya neer al wʋsg wʋsgo.

¹⁰N wẽnd oliviye tɩɩga sẽn wom biis wʋsgo, wẽnd tɩɩg ning vãad sẽn ka sʋʋgdã t'a wila lug n tãag sawato.

¹¹A sã n yeelg maan-kʋʋra fu-neerã, a sã n ning a fan-teeda fãa, a sã n wa rʋ maan-kugr sõngã, do-sõnga sɩmand pita ne ziiri.

¹²A sã n da yɛs yĩngri, maan-kugra taoore, t'a saam-biisa gũbg-a tɩ b na n deeg maoonga bũmbu maan-kʋʋda nugẽ b gũbra ra wẽnda Libã tɩ-bɛda sẽn gũm taaba. B da wẽnda kooms googo.

¹³A Aarõ kamba fãa ne b te-neeba, ra tong n yɛsa Israyɛl kamba fãa taoore n zãad b nusẽ kũun niyns b sẽn na n kõ Soaala.

¹⁴A Aarõ da maanda a maan-kʋʋr tʋʋmde n da rɩgend maan-kugra zugu, Yĩngr-Soaba la dũni dĩma kũuna,

¹⁵n da reegd rãama wamde n daagd maan-kugra sɛɛga wala yũ-noog bũmb sẽn sigsd dũni fãa Soaala sũuri.

¹⁶Wakat kãnga, a Aarõ kamba sɩnga kilsgu, la b peebd zũud tõntõodo ne pãnga, Yĩngr-Soaba taoore. B ra kelemdame tɩ sãta wa b na n neka Soaala pʋ-tẽere.

¹⁷Sã n da maan boto n sɛ, neb fãa naagda taaba n vabende, n waoog Soaala, Pãng kãseng soaba, Wẽnnaama, Yĩngr-Soaba.

¹⁸Yɩɩn-yɩɩndba da zodgdame n pẽgd Wẽnde, sẽn da maanda fãa yaa noog wʋsgo n sakd kelgre.

¹⁹Neba da yõkda Yĩngri-Soaba sɛɛga, n pʋʋsd Wẽnnaam, nimbãan-zoetã. B da maanda woto n tol n ta pʋʋsga fãa sɛɛbo.

²⁰Dẽ poore maan-kʋʋd kãsenga sigdame la a zẽkd a nus yĩngri n tees Israyɛl kambã, n zẽk a koɛɛga n na ning b barka la a paam n pʋd Soaala yʋʋre.

²¹Dẽ sã n sɛ, nebã wõgemda naoor a yiib soaba n deeg Yĩngr-Soaba barka.

²²Marsã pʋʋs-y dũni fãa Wẽnd barka! B maana bõn-bãna wʋsgo zĩis fãa. B zẽka tõnd yʋʋre, rẽ tɩ d ket n be d ma pʋgẽ; la b gesa d yelle ne nimbãan-zoeere.

²³D kotame tɩ b kõ d sũ-noogo, n sik laafi d zamaana, n sik laafi a Israyɛl pʋga, wa sẽn da be pĩnda.

²⁴D kota b nimbãan-zoeera kũuna, d kotame tɩ b sõng-do tɩ d yell maneg d vɩɩma fãa pʋgẽ. Tẽn-yoodo

²⁵Tẽns a yiib n be tɩ mam kis b nebã, la a tãab soabã n pʋs n ka tẽnga:

²⁶Yaa Seyir tãng zugu neba, Filisti rãmba, la ninsaan-gãeemsa sẽn be Sikɛm. Baasgo

²⁷Sẽn be sebr kãnga pʋga, yaa ninsaal sẽn tog n zãms la a wʋme. La sẽn gʋlsa sebra yaa a Zezi, a Sira biiga la a Elazar yagenga. A ra kẽeda Zerizalɛɛm. Yaa yẽ n bas tɩ rʋʋg wa saaga, a sũura sẽn da pid ne bãngr ningã.

²⁸Ned ning me sẽn na n bas tɩ sa-kãnga madg-a a bãng t'a na n pida ne yam vẽenem.

²⁹A vɩɩma na n pida ne bãngr buud fãa, a na yɩ ned sẽn zoet Soaala nifu, la so-sõnga meng la rẽnna.