Read SEBR SÕNGO, 1998 Sira biiga 51 Bible Online

Sira biiga 51 - SEBR SÕNGO, 1998 bible

Sira biiga 51

¹SEBRA PAASGO A Sira biiga pʋʋsgo [1] M na n pʋʋsa yãmb barka, m Dĩma, la m pẽg yãmba, Wẽnnaam m Fãagda, m pẽgda y yʋʋr sõngo.

²Ade, yãmb yɩɩ mam koagenda, la m sõangda, yãmb fãaga maam yel-beed pʋgẽ, n yiis maam zelem beed bẽdgẽ, la ne neb sẽn tar zirẽ yagbo. Yãmb yɩɩ mam teegda m bɛɛb taoore la yãmb fãaga maam.

³Yãmb nimbãan-zoeer sẽn ka sɛt yĩnga la yãmb yʋʋr sõng yĩnga, yãmb fãaga maam neb niyns fãa sẽn da baood n na n vel maama nugẽ, sẽn da baood-b mam kʋʋba nugẽ; yãmb fãag-m-la yel-pakdem buud fãa sẽn paam-ma,

⁴y fãag-m-la bugum sẽn da gűbg maam tɩ m vʋʋsem tulgdẽ, bugum mam sẽn da ka yõgne.

⁵Yãmb yiis-m-la bog-zulungẽ, n fãag-m ne zelem beedo, la zirẽ,

⁶n fãag-m ne zelem gõaaga. Mam da pẽnega kűum, m da kẽn n taa bʋg-tẽng dignoorẽ.

⁷B da gűbga maam zĩis fãa, la ned da ka be n sõngd maam ye; mam da ket n baooda ned sõngre la m ka paam ye.

⁸M tagsame tɩ yãmb nimbãan-zoeer ka sɛt ye, m tẽega y beoog-beoog fãa yel-sõmda yelle, m tẽegame tɩ y fãagda nin-wẽnsa nugẽ neb niyns fãa sẽn teeg-b yãmba.

⁹Mam kɩtame tɩ m pʋʋsg kul yĩngri; mam yõka b sɛɛga tɩ b sõng-m tɩ m põs kűum.

¹⁰Mam pʋʋsa m Wẽnd la m Soaala tɩ b ra bas-m da-beeda raar ye, wilg-m-meng rãmba sẽn wat n yik ne-m daare, tɩ m zĩi n ka tar sõangd ye.

¹¹M na n pẽga yãmb yʋʋre wakat buud fãa, m na n yɩɩlame n pẽg-y wala sõm-minim sẽn date. Y waa n deega m pʋʋsgo.

¹²Yãmb yiisa maam yel-beedẽ, la y fãaga maam wẽnga wakato. Yaa rẽ yĩnga la m na n pʋʋs yãmb barka yaa rẽ la m pẽgd la m waoogd Soaala yʋʋre. Yam vẽenem baoobo

¹³Mam bi-bɩɩlmẽ, m sẽn waa n nan pa sɩng gõobo mam baoo yam vẽenem ne m sűur fãa, m pʋʋsg pʋgẽ.

¹⁴Wẽnd doog dignoorẽ, mam da kot-a-la ne m sűuri la m na n kell n bao-a lame n ta m yõor tɛka.

¹⁵M waa n paamame t'a bɩ m pʋgẽ wala bugsuntung biis sẽn bɩt b willẽ, la a lebga m sű-nooga sẽn bund n yit zĩig ningã.

¹⁶Mam kɩlla m tʋbre n kelg bilfu, la m paam-a lame, la m bãnga bűmb wʋsgo.

¹⁷Woto m yam vẽnegr paasame, m na n pẽga sẽn kõ-a maam yama.

¹⁸M yeelame tɩ m na n maan a sẽn wilgi n baoo neer maanego ne m sűur fãa, la m tõogame.

¹⁹M mao wʋsgo n na n tall m yam vẽenem, n na n deeg Soaala noora wakat buud fãa. Naoor wʋsgo, m zẽka m nus n tees yĩngri, la m deega Soaala taoore, tɩ m ka pʋg yam vẽenema ne m pãng fãa ye.

²⁰M yaool n kẽn n tees-a lame la m pʋ-peelem yĩnga m paam-a lame. Yẽnda n da vẽneg-m al m yãadmẽ la m da ka maand dabeem t'a na le bas-m ye.

²¹M sẽn da rat-a ne m sűur fãa yĩnga m paama m sẽn get wa kűun sẽn pid yõodo.

²²Mam dolb yĩnga Soaala kõo maam zelemde tɩ m tar-a n waoogd bãmba.

²³Zɩtba, sẽn ka paam-b zãmsgã, kolg-y-maam n bao zãmsgo, m karen-doogẽ.

²⁴Bõe tɩ y na le yaas n kaoos n zãr ne-a tɩ y sɩɩga yaool n tʋll-a wʋsg-wʋsgo?

²⁵Mam yaaga m noor n na n gomd ne yã: “Daa-y yã tɩ ka tű ne ligd ye.”

²⁶Deeg-y yã a zãmsga ba sã n ya toogo, kɩt-y yã tɩ y sɩɩga paam a zãmsgo; a zĩig ka zãr ye, t'a yãeeb ka toe ye.

²⁷Ges-y ne y nini tɩ m naonga ka yɩ wʋsg tɩ looge ye, la m zĩi marsã tɩ m vɩɩma sakdẽ.

²⁸La ba y sã n na n daa-a-la ne ligd wʋsgo ad-y yẽ yĩnga y na lebg arzɛk rãmba.

²⁹Bɩ y noog y sűuri ne Soaala nimbãan-zoeere, la da zoe-y yãnde ne Soaala pẽgr ye.

³⁰Maan-y y tʋʋmde tɩ nan ket n tõe, Soaala na n kõo yãmb y dolbo b sẽn dat wakat ninga. SẼN WAA N TONG A SIRA BIIGA SEBRE Pipi paasgo 51,12 (a) Pẽg-y Soaala tɩ b yaa nin-noanga, tɩ b nonglma ka be sɛɛb ye. (b) Pẽg-y Wẽnd ning sẽn tog ne pẽgrã, tɩ b nonglma ka be sɛɛb ye. (d) Pẽg-y yã a Israyɛl gűudã tɩ b nonglma ka be sɛɛb ye. (e) Pẽg-y dűni wã Naanda, tɩ b nonglma ka be sɛɛb ye. (f) Pẽg-y yã a Israyɛl Fãagdã, tɩ b nonglma ka be sɛɛb ye. (g) Pẽg-y sẽn tigsd-a a Israyɛl kamba sẽn sẽege, tɩ b nonglma ka be sɛɛb ye. (i) Pẽg-y sẽn met-a b tẽngã la b ro-sõngã tɩ b nonglma ka be sɛɛb ye. (k) Pẽg-y sẽn kõt-a a Daviid dooga pãnga, tɩ b nonglma ka be sɛɛb ye. (l) Pẽg-y sẽn kõ-a maan-kʋʋr naam a Sadok yagensã, tɩ b nonglma ka be sɛɛb ye. (m) Pẽg-y yã a Abraam gãongã, tɩ b n(...)

³¹ M sẽn waa n ket n paoodẽ n nan ka sɩng saabo, m bao yam vẽenem.

³² A sig-m-la ne a pidungu, la m kell n talla a pʋgbo n wa paam-a zãnga.

³³ Wala bugsuntung sẽn yot a puugu la a yoosd moama tɩ ninsaal noogd a sűuri, woto me la m naoor tabg-a pʋ-wɛɛgẽ, tɩ al m yãadmẽ, ma me pa vʋʋs ne baoob ye.

³⁴ M tʋbra bal la m kɩll yã la m paama sagl-sõma wʋsgo.

³⁵ Yam vẽenema waa n dɩk-m lame n maan a biiga, la sẽn kõ-a maam bãngra la m na n pẽge, n pẽg-a wa sẽn segde. Sɩngrẽ wã yaa waa m da reemdame,

³⁶ mik m bao sẽn noom-ma ne m sűuri, m ka vʋʋs ne baoob ye.

³⁷ M wɩsga m meng ne yam vẽenem baoobo, m baooba ka naag ne kʋɩɩm ye.

³⁸ M saka toog ne a baoobo m pa zoe tãmsa zut saagr ye. M puka m nugu n gãd-a, a wilg-m-la sẽn solge, la m paam n zãaga m meng ne wẽnga.