Read SEBR SÕNGO, 1998 Sira biiga 7 Bible Online

Sira biiga 7 - SEBR SÕNGO, 1998 bible

Sira biiga 7

¹Sagls buud toor-toore [1] Da maan wẽng ye, tɩ wẽng me kõn lʋɩ f zug ye.

²Zãag f meng ne yɛl kɛga, tɩ yɛl kɛg na zãag ne-fo.

³M biiga, da rɩk yɛl kɛg sor ye, tɩ yɛl kɛg wa paam n dɩ-f ye.

⁴ [7†] Da kos Soaala pipi zĩig ye, la da kos naab a naam goeel ye.

⁵Da maan wala fo yaa nin-tɩrga, Soaala taoor ye, bɩ f yaa nin-sõng, dĩma taoor ye.

⁶Da tʋlg bʋ-kaood zĩiga fo sã n ka tõe n bas yɛl kɛga; ka rẽ pãng soab wat n waa fo nengẽ, tɩ fo bʋ kɛga.

⁷Da beeg tẽng rãmb ye, la f da yaal f meng neb taoor ye.

⁸Da sak n lʋɩ yel-wẽnd pʋgẽ naoor a yiib ye, tɩ vugri menga, fo ka na n põs ye.

⁹Da yeele: Wẽnnaam na n gesa m kũuna sẽn bɛdma m sã n tɩ kɩs-b Wẽnde, Yĩngr-Soaba, b na n deeg-b lame.

¹⁰Da maan sãmbs pʋʋsg pʋgẽ ye, la f da bas wẽn-kosg maaneg ye.

¹¹Da la ned sẽn be toog pʋgẽ ye, ad ned ninga sẽn kɩt t'a ya woto wã, tõeeme n le wa kɩt t'a yell yɩ neere.

¹²Da yag zirẽ f yao bɩ f kẽem poorẽ ye, la f zoa poorẽ ye.

¹³Da sak n yag zirẽ, tɩ zirẽ ka manegd bũmb ye.

¹⁴ [8†] Da gom wʋsg nin-kẽems sʋk ye.

¹⁵Da zoe tʋʋm tood ye, la f da zoe koob ye, tɩ yaa Yĩngri-Soaba n wa ne-a.

¹⁶Da zĩndg f meng yel-wẽn-maandb sʋk ye. Tẽeg tɩ Wẽnd sɩbgre ka na kaoos n wa ye.

¹⁷Sulg f meng al wʋsgo, tɩ nin-wẽng sɩbgre yaa bugum ne zũnzũi.

¹⁸Da rɩk zoa n tek ne ligd ye, la f da rɩk f saam-biiga n tek ne Ofir sãnem ye.

¹⁹Da kisg pʋg-sõng sẽn ya yam soab ye, t'a bee neer n yɩɩd sãnem.

²⁰Da nams yamba sẽn tʋmd ne pʋ-peelem, la dakõor sẽn tʋmd ne a sũur fãa ye.

²¹Nong f sũurẽ f yamb sẽn tar yam, la f da mong-a soog-m-meng sor ye.

²²Fo tara rũmsi, bɩ f ges-b neere, fo sã n dɩt b yõodo, tall-b neere. Kamba

²³Fo tara kamba, gʋʋl-b neere, la b yãadmẽ, sõng tɩ b yɩ neba.

²⁴Fo tar kom-pugli, ges b yelle, la f da bas-b yol-yol ye.

²⁵Fo sã n kuls f bi-pugla, fo maana yel-sõngo, la yaa f sẽn na n kuls-a nin-tɩrga.

²⁶Fo tara pag sẽn ta f yam, da rig-a ye, la fo sã n ka nong-a, da pelg f pʋg ne-a ye. Ba rãmba

²⁷Waoog f ba ne f sũur fãa, la f da yĩm f ma namsg ye.

²⁸Tẽeg tɩ yaa bãmb n dog foom. Fo na n kõ-b-la bõe n lebs bũmb ning fãa b sẽn maan f yĩnga? Maan-kʋʋdba

²⁹Zoe Soaal ne f sɩɩg pãng faa, la waoog b maan-kʋʋdba.

³⁰Nong sẽn naan-a foomã ne f sũur fãa, la f da yĩm b tʋʋm-tʋmdb ye.

³¹Zoe Soaala, la f waoog maan-kʋʋd, la f kõ-a a pʋɩɩre wala b sẽn yeel foom tɩ f maane: sugr kosg maoongo, sõmblem baoob maoongo, la bõn-dẽems sõma kũumi. Naong la pɛt rãmba

³²Sõng naong soaba tɩ f na paam bark kẽenga.

³³Kelg nin-vɩɩs fãa yelle, la f sõng sẽn ki-bã ne yaoolem do-sõngo.

³⁴Da bas sẽn yãbd-b ye, sãam f sũuri ne sũur sẽn sãam b rãmba.

³⁵Da yɛ ne bãad dãmb gesg ye. Fo sã n maan woto, fo paamda neb nonglem.

³⁶Fo sẽn maand bũmb ning fãa, tags f baasg yelle, woto fo kõn maan yel-wẽnd bada.