Read SEBR SÕNGO, 1998 Sira biiga 8 Bible Online

Sira biiga 8 - SEBR SÕNGO, 1998 bible

Sira biiga 8

¹Gũus-m-menga [1] Da mao ne sẽn yɩɩd-a foom ye, tɩ f na n wa paa a nugẽ.

²Da zab ne arzɛk soab ye, t'a pãng na n wa yɩɩg-fo; sãnem sãama neb wʋsg yɛla, la a golma nanams sũyã.

³Da wẽ no-koeemde ne gom-to-ned ye, da rɩk raado n ning a bugmẽ ye.

⁴Da reem ne nin-yaalg ye, t'a na n wa tʋʋs f yaab rãmba.

⁵Da zab ne yel-wẽn-maanda sẽn tuubd a yel-wẽna ye, tẽeg tɩ tõnd fãa yaa yel-wẽn-maandba.

⁶Da paoog nin-kẽem ye, tɩ daar ninga tõnd me na n wa lebga nin-kẽemse.

⁷Da kɩdem f to kũum ye, tẽeg tɩ tõnd fãa na n kiime.

⁸Dã sãbs nin-kẽem goam ye, dɩk b yelbũna n ning f yamẽ; tɩ bãmb na wilg foom yam tɩ f bãng f sẽn tog n maan bũmb ninga ne nin-bɛda.

⁹ [9†] Da sãbs nin-kẽems sagls ye, tɩ b sẽn togsd bũmb niynsã, ya b ba rãmb n zãms-ba. Bãmb n na n zãms foom gũus-m-menga la f sẽn na n maan bũmb ninga tɩ f leokr yɩ neere.

¹⁰Da pirs nin-wẽng ye dẽ wẽnda tus a bugum daado, tɩ f wat n yõoga f menga, tɩ bugma f sẽn yõgna tõe n lɛɛg n dɩ-f lame.

¹¹Da bas tɩ sũ-pu-ned goam kẽes-f moog ye, ka rẽ f bas-a lame t'a rɩgl bẽdgo n na n wẽneg n yõk foom f goamẽ.

¹²Da rɩk f bũmb n peng ned sẽn yɩɩd foom ye, tɩ ka gũusi, fo kõn le paam-a ye.

¹³Da yeele tɩ f na reeg ned zĩig n yao ye, fo sã n yeele, bɩ f pĩnd n tem n wa yao.

¹⁴Da bʋ ne bʋʋd soab ye, tɩ f mi tɩ ned kõn mong a meng bʋʋm ye.

¹⁵Da tũ bi-bɛɛg n tog sor ye, t'a na n wa kɩt tɩ f naage n tʋm tʋʋmd sẽn ka neere, n wa sãam f yelle.

¹⁶Da zab ne sũ-puur soab ye, da tũ-a n kẽng weoogẽ ye, t'a ka zoet zɩɩm daagr ye, la a sã n mi tɩ ned ka pẽ n na n fãag-fo, a kʋʋd-f lame.

¹⁷Da pelg f pʋg ne yalma ye, a wat n n dɩka yãmb yɛla n togs neba.

¹⁸Fo sã n be sãan taoore da soos n maan bũmb ye, tɩ f ka mi a sẽn na n zĩnd tẽngre n yiis bũmb ning ye.

¹⁹Da rɩk f sũur yelle n togs yaar ye, la f da tags tɩ b na waa n yãend bũmb n dol-f ye.