Read SEBR SÕNGO, 1998 Sira biiga 9 Bible Online

Sira biiga 9 - SEBR SÕNGO, 1998 bible

Sira biiga 9

¹Paga [1] Da maan bõn-zoeere ne f pʋg-nongr ye, la f da zãms-a t'a wa tʋlg foom ne wẽng ye.

²Da rɩk f meng n ning pag nugẽ ye, t'a wat n soog-f lame.

³Da kẽng pʋg-yoodre zĩigẽ ye, t'a bẽdga na n wa yõk-f lame.

⁴Da kẽng pʋg-yɩɩn-yɩɩnd nengẽ ye, t'a na n wa kʋɩɩb-f n tõoge.

⁵Da ges bi-pugl n kaoos ye, ka rẽ b na naag foom n paalg bʋʋdo.

⁶Da rɩk f meng n kɩs pʋg-yoaad ye, fo na n sãama f paoong fãa ne-a.

⁷Gũus f meng ne tẽng pʋgẽ soya zut gesgo, la f da gõod neb sẽn ka beẽ ye.

⁸Da ges pʋg neer ye, neb wʋsg sãama b yelle ne pʋg-neeb gesgo, b gesgo wata ne nonglem sẽn dɩt wa bugum.

⁹Da sak n zĩnd n yegl pag ye, la f da zĩnd ne a rãam yũub zĩigẽ ye, t'a nonglem na n wa kẽ f sũurẽ, tɩ f wa tʋlg n tʋm tʋʋm-yood ne-a. Neb ne taaba

¹⁰Da bas f zoa kʋdg ye, tɩ zoa paalga ka na n yɩ wa yẽ ye. Dãam sẽn kõg paalem, wẽnda zoa paalga, fo sã n bas-a t'a kʋdge fo yũud-a-la ne sũ-noogo.

¹¹Yel-wẽn-maand tʋm n paam yõodo, da yet tɩ f nongẽ lame n be a zĩigẽ ye, tɩ fo ka mi a sẽn na n baas to-to ye.

¹²Da noog f sũuri nin-wẽns tʋʋmd yĩng ye. Bãng tɩ b na n paama b sɩbgre tẽng zug ka.

¹³Zãag f meng ne nin-kʋʋda, tɩ woto f kõn zoe kũum dabeem ye. Fo sã n pẽneg-a, bɩ f gũus f menga t'a tõe n wa kʋ-f lame. Bãng t'a gũbg-f-la ne a bẽdgo, la f wẽnda ned sẽn kẽnd lalg zugu, n ka lill bũmb ye.

¹⁴Fo sã n tõe, mii n kẽng f taab nengẽ, la f kelg nin-sõma saglgo.

¹⁵Sã n ya sõasg yelle, bao neb sẽn tar yam n sõs ne-ba, la y sõasga yɩ Yĩngri-Soaba noya poorẽ.

¹⁶Kɩt tɩ f rɩt-n-taase yɩ nin-tɩrse, tɩ Wẽnd dabeem sẽn kẽ-fa yɩ f zu-zẽkre.

¹⁷Tʋʋm-tʋmd sã n tʋm a tʋʋmde yaa a tʋʋmna n wat ne a pẽgre. Naab togame n gom ne yam vẽenem, tɩ yam vẽenema a sẽn pukã n wat ne-yẽ me pẽgre.

¹⁸Tẽng pʋgẽ dãmba zoeta gom-to-neda, la b pa nong sũ-to-ned porb ye.