Read SEBR SÕNGO, 1998 A izayi sebre 20 Bible Online

A izayi sebre 20 - SEBR SÕNGO, 1998 bible

A izayi sebre 20

¹Yʋʋmd n zĩndi tɩ Asʋr dĩm a Sargõ tʋm a tãnsoaba t'a wa zab ne Asdod, n tõog-a.

²Yaa yʋʋm kãnga la Soaala-Wẽnd taas b gomdã a Amos biiga, a Izayi, n yeel-a: «Ade, sẽk sũ-pa-noang fuugã f sɛɛgẽ la piid f nao wã gãndalsa.» T'a Izayi sɩd maan wala Soaala-Wẽnd sẽn yeele, n da kẽnd a zaala, la a ka wid neooda ye. Asdod lʋɩɩsa wakato, Soaala yeela a Izayi t'a togs woto:

³«M sõgna, a Izayi, kẽna a zaala la a ka wid neoodr yʋʋm a tã ye. Rẽ n na n yɩ makre Ezipt la Kus yĩnga.

⁴Ade, Asʋr dĩma na n talla Ezipt rãmb n tɩ pag roogo la a loog ne pa-weere Nubi rãmba, b kom-bɩɩb la b nin-kẽemse neodr kõn ningi la fuug kõn lud kɩgbr ye. Na n yɩɩ yãnde, yãn-pʋ-lʋʋmd ne Ezipt rãmba!

⁵Sẽn da teeg-b Kus, sẽn da get-b Ezipt wa b zu-zẽkre, bãmb dãmb zĩi ne rabeem la yãnde.»

⁶Mogra noorẽ dãmba na n yeela badaare: «Ges-y tõnd saagra sẽn sãam zãnga! Tõnd da teega bãmba n zoe n wa soond bãmb tẽngẽ, n paam sõngre, n põs Asʋr dĩma; woto wã marsã d yɩta wãna n põse?»