Read SEBR SÕNGO, 1998 A izayi sebre 22 Bible Online

A izayi sebre 22 - SEBR SÕNGO, 1998 bible

A izayi sebre 22

¹Naaba-Wẽnd sẽn yeele b likra bãg-faag poorẽ. Yaa bõe n wate Zerizalɛɛm? Bõe tɩ f neba fãa zoet n dʋʋd b bɛɛndo?

²Bõe tɩ tẽng pid ne bʋʋre n pid ne kaasgo? Bõe tɩ tẽnga wulumd zãnga? Sẽn ki-ba n gãe f tẽn-peelmẽ wã, ka zabrẽ la b kʋ-b ye ka zabr zĩigẽ la b lʋɩ ye.

³F tãnsoaben-dãmba naaga taaba n zoe. Tãp sẽn yãage, zabr sɛɛme, tɩ bɛɛba na n yõg-ba n pag roogo, b tol n yõga sẽn da paam-ba n zoe n zãagã.

⁴Yaa dẽ la m yet-y marsã: «Zãag-y ne maam, bas-y tɩ m yãb m yãb toogo, da mak-y m belgr ye, maam ne m buuda sẽn dɩ bõna belgr ye.

⁵Dũnna, Soaala, dũni fãa Wẽnda, waa ne d sũ-bondgre, tɩ d konga raoodo n zĩ ne yãnde.» Bãngda sẽn yɛs bãg-faag ninga noorã n yãet a yãeebã, bãg-faag kãng wulumda ne bʋʋre kelensa sãt n kuiisa yĩngri.

⁶Elam tãb-biisa dɩka b tãbd la b logdo, bilim-bilma pida ne neb tɩ wiid tatẽ, Kir tãb-biisa segenda b gãndo.

⁷Zerizalɛɛm tẽnga, ad bãg-faag neerem sẽn yɩɩd a taaba, pida ne bilim-bilm la wiidi; fãa tonga tẽnga noore.

⁸A Zɩɩda ka le tar sõngr ye. Badaare yãmb wẽnemda y nenga, n tees zab teeda sẽn bĩngd doog ningã, n tees na-zaka, Libã googã.

⁹Y yãeeme t'a Daviid tẽngẽ lalsa poo zĩis ka tɛka, y koka koom n pids pipi ko-baoorã,

¹⁰y sõda Zerizalɛɛm dota fãa; y wãa rot kẽere n na n paam n zab tɩ lal-gũbrã ra lʋɩ bɛɛba nusẽ ye.

¹¹Y mee ko-baoor lals a yiiba tẽnsʋka n na kok zugẽ soaba koom. Y nenga sẽn pa wẽnemd n ges a soab bala, yaa Soaalã, sẽn tara bũmb fãa tɩɩma. Soaala sẽn da segl yɛla al pĩndã yaa bãmb bal la y pa yãende.

¹²Ad-y marsã wã, dũni fãa Soaala da ratẽ lame tɩ y yãbẽ, n kelmẽ kʋʋre, n põngẽ y zugu la y sẽgnẽ sũ-pa-noang futu.

¹³ [46†] La ayoo! Yãmb maanda sũ-noog la kɩdengo; yãmb koota y niisi la y piisi, yãmb wãbda y nemdo la y yũud y rãam, la y yetẽ: «D dɩ la d yũ tɩ beoogo d na n loogame.»

¹⁴La dũni fãa Soaala menga n kõ maam koe-kãnga: «M wẽendame tɩ yell a woto ka tõe n manege, tɩ yãmb ka reng n ki ye.»

¹⁵Dũni fãa Soaala goma woto: Kẽng sõgen kãsenga a Sebna nengẽ, kẽng sẽn geta dĩma zaka nengẽ.

¹⁶Sok-a n gese a soo bõe ka, a kĩi ne ãnda ka, t'a tol n kɩt tɩ b wedg pĩiga, n ning a yaoogo tãnga lʋgrẽ, la a maneg n pees-a n gilgi, tɩ be n na n yɩ a yaoolem doogo?

¹⁷Ade, vugr bala Soaala-Wẽnd na n lub-f lame, nin-sõngo, b na n baoo bũmb n sagl-fo,

¹⁸b na n lob-f lame tɩ f bilim wa koaasga, n tees-f tẽn-yalengẽ. Be la f na n ki, be la f na n pa ne f bilim-bilma sẽn ya f zu-zẽkrã, tɩ fo meng yaool n ya f zu-soaba yãnde!

¹⁹M na n vik-f-la f zĩigẽ, yaa Soaala n gomde, m na n yiis-f-la f tʋʋmnẽ.

²⁰Badaare bala m na n boola m sõgne, a Ilkiya biig a Eliyakim.

²¹Yẽnda la m na yeelg fo fu-yorgo n sẽbg-a fo sẽbdga, n deeg fo naama n kõ-a, la a na n lebga wa ba Zerizalɛɛm dãmb yĩnga, a Zɩɩda rĩunga yĩnga.

²² [47†] M na n dɩka kʋɩlen-bila, a Daviid dooga kʋɩlen-bila n bobl-a a sã n pake, ned kõn page, a sã page ned kõn pake,

²³M na n vigla a naama zĩig sẽn ya kɛgengẽ; a naama zaoor na n viglame a na n lebga a buuda zu-zẽkre.

²⁴Bũmb ning sẽn be, yaa a Eliyakim sẽn base t'a buuda neba fãa, bɛd la bõonese, wa n fãoog yẽnda wala b sẽn mii n naag n yagl zĩ yɛnga: leense, laase, yʋya, tɩ lebg zɩsgo.

²⁵La ade, dũni fãa Wẽnd n gomde, daar n wate, tɩ kaadga menga, ne b sẽn ka-a zĩ kɛgengẽ wã, na n feoogame n lʋɩ tẽnga, la teeda fãa sẽn da yagla na n wãame. Soaala-Wẽnd n yals rẽnna.