Read SEBR SÕNGO, 1998 A izayi sebre 3 Bible Online

A izayi sebre 3 - SEBR SÕNGO, 1998 bible

A izayi sebre 3

¹Ad-y bũmb fãa Soaala, yĩngr la tẽng Soaala, na n monga neba bũmb fãa, n mong Zerizalɛɛm dãmba, n mong Zɩɩda rãmba. B na n mong-b-la rɩɩb la koom, b na n mong-b-la b sẽn teeg fãa.

²B na n mong-b-la zabr gãndaoogo, n mong-b tãb-biiga, bʋ-kaooda, bãngda, baga, buud kãsma,

³tãnsoaba, kug-zĩida, sagenda, zʋʋr soaba, tɩ-rɩtba la tɩ-busdba.

⁴B na-rɩtba na n yɩɩ kom-bõonego, sẽn na n zã-b wala b sẽn date.

⁵Neba na n yika zab ne taaba, yãag pat-n-taaga la nin-kẽema, tɩ talg rẽnd yaa na-koambga.

⁶Ned na n yikame n sog a saam-biiga, a ba zakẽ, n yeel-a: «Foom n tar fu woko lebg tõnd naaba, zã d tẽnga sẽn wẽnd raboogã.»

⁷La sẽn yẽeg a soaba na n yeelame: «Ade, m ka tɩɩm soab ye, m ka tar dɩɩbo, m ka tar fu-songo m doogẽ ye. Da rɩk-y tẽnga naam n kõ-m ye.»

⁸Zerizalɛɛm dãmb sɩd kẽnd n lagsdame, tɩ Zɩɩda rãmb tar lʋɩɩse; la ad-y ka bũmb a to, ya b sẽn yaag b noore la b zẽk b nugu n paoog Soaala-Wẽnd ne b ziirã.

⁹B nenga meng pa yãet n sãmb ye, wẽnema lebga b yẽesem, b yel-wẽna yɛdga zĩig zãnga wa Sodom dãmba rẽnna, lebga b zu-zẽkre. Ad-y rẽ n na n wã-b zãnga.

¹⁰Yeel-y tɩ zu-noog soaba la nin-sõngo, a na n dɩ-la a tʋʋm sõma yõodo.

¹¹Yeel-y tɩ far soaba la nin-wẽnga, a na n deega a tʋʋm yooda sɩbgre.

¹²Kato! Bi-bilfr bala n tar m neba n yaandẽ! Katõ! Naama sẽn lʋɩ b rãmb nusẽ wã nan yaa kom-bõonese, ad-y pagbã n dɩt naama. Kato, f soaalba tat-f lame n kẽed moogo! Kẽnda ka tees a sẽn togẽ ye.

¹³Soaala-Wẽnd yikame n na n kao b bʋʋdo, b yik n yɛsa yĩngri.

¹⁴Soaala-Wẽnd sẽn na n bool b rãmb bʋʋdã yaa rĩm-biisi la nin-kẽembã; b na n yeel-b lame: «Yãmb n deeg naong soab bugsuntungu, n deeg a sẽn da so, a sẽn da tar n lut a naongo, yaa rẽ la yãmb yeeg n bas-a.

¹⁵Ãnda n kõ yãmb sore tɩ y nams m nebã, bõe tɩ y sulgd naong rãmb zug n paasdẽ? Dũni fãa Wẽndã n sokde.»

¹⁶Soaala yeelame: «Siõ kom-pugli wã wilg-m-menga waooga. B kẽndame n dõond b yubla, n kẽnd tɩ b nina kamsd kams yoodo, tɩ nao wã solsdẽ, tɩ b bugla wẽed taaba.»

¹⁷Yaa rẽ yĩnga la Soaala-Wẽnd na n bas Siõ pagba zut tɩ b kẽ rasempʋɩɩga, la bũmb kõn lud b rĩir ye.

¹⁸Badaare Soaala-Wẽnd na n piida fan-teedã, nao-zũya, wĩntoog la kiuug sẽn dõog n pit yublã,

¹⁹n paas tʋb-londã, kagsã, pɛɛla sẽn lut nenga,

²⁰zu-vindsi, yãndo, pãnense sẽn mobgd sɛɛga, tɩto, gãn sẽn boond zu-noogo,

²¹nug-bĩnsi, fan-teed sẽn sogd yõore,

²²kibs futu, fut sẽn ka tar nusi, pɛɛl sẽn teegd zugu, kordo,

²³fu-tagdo, fu-yord faase, pɛɛl sẽn tar n vind kokoɛ la bãg-paase.

²⁴Ad-y bõn-põosg yũugu n na n deeg yũ-nooda zĩiga, la wĩir bala n na n lebg sɛɛga sẽbdga. Zoobda sẽn pãnem ne nagra na n kõogame. Fu-neeba na n lebga sũ-pa-noang futu, kut sẽn mooge, la b na dĩ b yɛgdgã, yɛgdga dĩida ne kud moomde n sãam b neerem.

²⁵Sʋʋg n na vɩlem tãb-biisã tɩ gãndaadã pa tãpẽ.

²⁶Wakat kãng marsã la tẽnga tõr na n kelem. B na kʋka zug n kelem kʋʋre. B na n yɩɩ wala pag sẽn menes a sẽn tar fãa, t'a pãs n lʋɩ tẽnga.