Read SEBR SÕNGO, 1998 A izayi sebre 37 Bible Online

A izayi sebre 37 - SEBR SÕNGO, 1998 bible

A izayi sebre 37

¹Dĩma Ezekiyas sẽn wʋm goama, yẽ me kẽesa a futu, n bao sũ-pa-noang fuug n yeelge n dɩk wẽnd doogã sore.

²A kɩtame t'a Eliyakim, a Sebna la maan-kʋʋdba taoor-dãmb me yeelg sũ-pa-noang futu t'a tʋm-ba a Amos biiga, a Izayi, nengẽ.

³B yeela a Izayi: «A Ezekiyas koɛɛg la woto: ‹Dũnna yaa sũ-sãanga, sɩbgre la yãnd daare. Pʋga bɩɩme la pãng ka n dogdẽ ye.

⁴Daare Wẽnnaam f Soaala wʋma tʋɩ niyns Asʋr dĩma sõgen sẽn wa n tʋ Vɩɩm-Naabã la daare b na sɩbg-a. Woto wã maan pʋʋsgo m neba sẽn kella yĩnga.› »

⁵A Ezekiyas sẽn tʋm b rãmba sẽn ta a Izayi taoore,

⁶a Izayi yeel-b lame: «Y na tɩ togs y zu-soaba tɩ Wẽnd koɛɛg la woto: ‹Da maan dabeem ne goam niyns f sẽn wʋma, ne tʋʋr ning Asʋr dĩma sõgna sẽn tʋʋs maama ye.

⁷Ad-m sẽn na n walma bũmb ninga: a na n wʋma bũmbu n zoe n leb a tẽngẽ la a sã ta a tẽngẽ, m na n kɩtame tɩ sʋʋg kodg-a, a meng tẽngẽ.› »

⁸Asʋr tãnsoaba sõgna leba a tẽngẽ la a tɩ yãenda rĩma. Wakat kãng tɩ rĩma ra takda zabre ne a Libna. Sõgna ra wʋmame tɩ dĩma da yii Lakis n wa.

⁹La rẽ yaa a sẽn da wʋm kibare tɩ Nubi dĩm a Tiraka bobame n wat n na n zab ne-a. Asiri dĩma wʋma kibarã la a tʋma neba tɩ b tɩ yeel Zɩɩda dĩma, a Ezekiyas:

¹⁰«Da bas tɩ f sẽn teeg Wẽnd ninga wa belg-fo n yeel-f tɩ Zerizalɛɛm kõn lʋɩ Asʋr dĩma nugẽ ye.

¹¹Fo wʋma Asʋr dĩm dãmba sẽn maan ne tẽnsã fãa, b sẽn kãab beedã la fo tẽedame tɩ fo na põse?

¹²Tẽns niyns m ba sẽn wã wã, b wẽnd dãmba tõogame n deeg-ba? Tẽeg Gozã, Arã, Resɛf la Telasar, Edenitsa na-tẽnga!

¹³Sok f memg n gese: Amat dĩma bɛɛ, Arpad dĩma bɛɛ? Layir, Sefarwayim, Ena la Iwa dĩm dãmba bɛɛ?»

¹⁴A Ezekiyas deega sebrã b sẽn tʋm b rãmba nugẽ, n karem la a yikame n kẽng wẽnd doogẽ, a laka sebrã n dɩgl Wẽnd taoore.

¹⁵A pʋʋsa woto Wẽnd taoore:

¹⁶[68†] «Dũni fãa Wẽnde, Israyɛl Wẽnnaam, yãmb vigla y zaoora al yĩngr-yĩngri, yãmb y ye la dũni wã fãa Wẽnnaam, yãmb n maan yĩngri la tẽnga.

¹⁷Bɩ y yoog y tʋbre, m Soaala, n kelge; puk-y y nini, Soaala, n gese. Kelg-y yã a Senakerib goama, t'a tʋmame tɩ b wa tʋʋs yãmba, Vɩɩm Naaba-Wẽnde.

¹⁸Yaa sɩda, Asʋr dĩma wãa buud ka tɛka, a wãa tẽns ka tɛka.

¹⁹B loba b wẽnd dãmba bugmẽ tɩ ra yaa wẽn-faado; ninsaal nugu n da pees raad bɩ kuga, yaa rẽ la b tõog n menes-ba.

²⁰La marsã Soaala, tõnd Wẽnnaam, fãag-y-do a Senakerib nugẽ, tɩ tẽng zug rãmb fãa na bãnge, Soaala, tɩ yãmb bal la Wẽnde.»

²¹A Amos biiga, a Izayi, tʋmame tɩ b tɩ yeel a Ezekiyas: «Woto la Israyɛl Wẽnnaam leokd kosgã f sẽn kos dĩma a Senakerib yĩnga.

²²Kelg kãab beed niynsi Wẽnd sẽn kãabd-a:

²³Ad Siõ bi-pugla laada foom, a pursda foom, Zerizalɛɛm bi-pugla yĩgsda foom. Ãnda la fo tʋʋs yã n paoog-a? Ãnda poorẽ la fo gom beedo? Ãnda taoore la f zẽk f zug ne nagre? Ad yaa maam, a Israyɛl Nin-sõngã.

²⁴Fo tʋma neb tɩ b wa tʋʋs-ma, maam Naaba-Wẽnde, fo yeelame: Maam a Senakerib, m tara bilim-bilm ka tɛka, la yaa ne bãmb la m dʋ tãms ka tɛk zug tẽnsʋka, m taa Libã sẽn lug n sãdẽ wã, m kʋʋsa tɩ bɛda googo, m kʋʋsa a tɩ neebã, m bʋʋg-a-la a soondg zĩigẽ, a tʋgra pʋgẽ.

²⁵Maam a Senakerib, m tuu bulsi la m yũu tẽn-zẽng koom, m nao kẽe Nil kʋɩlga pʋgẽ n kʋɩɩs-a m naoor sẽn tabg Ezipt bala.

²⁶Sãnd fo miime, Senakerib, tɩ al daar zãra mam segla m seglgo n na n wã foo? M sẽn zĩnd n bʋgsã la m na pids rũnna Mam da kõo foo tõogo tɩ f kɩt tɩ tẽn-bɛd lebg raboodo.

²⁷Tẽnsa rãmb nus da maagame, b pãng ra sɛɛme, rabeem la yãnd tar-b lame tɩ b lebg wala pʋt moodo, wa mood sẽn sele, wa tɩɩs sẽn yit roog zugu, bɩ pʋ-wees mood sẽn nan ka bɩ n yãg n sʋʋgdẽ.

²⁸Ad mam mii f sẽn yikd wakat ninga, m mi f zĩndigu wakato, f kẽed bɩ f yita m miime, m mi f sẽn wuk n zĩ ne sũ-puur wakato,

²⁹La f sẽn puug f sũurã ne maama yĩnga, f sẽn yiis tɩtaam goam tɩ lʋɩ m tʋbrẽ, m na vʋdg f yõore n sog bãnga, n ning salbre f noorẽ, n kɩt tɩ f rɩk sor ninga f sẽn tũ a soab n wa wã.

³⁰Woto n na n yɩ makre f yĩnga: rõanna, ka-yiisem la y na n dɩ; vẽere, ka-yogdo biisi, la yʋʋm yita bʋd-y-la y tigsi, sel-y tɩɩse la y rɩ b biisi.

³¹Sẽn na põs Israyɛl kamba sʋka m na n yiisa yẽgen paal tẽngre, la b na n wom biis b wilẽ.

³²Kelle n na n kell Zerizalɛɛm, bũmb n na n põs Siõ tãnga zugu.» A Izayi paasame: «Yaa woto la dũni fãa Wẽnd na n maan b nonglma sẽn ka mi maagra yĩnga.

³³Yaa rẽ me yĩnga la Soaala-Wẽnd gomd woto Asʋr poorẽ: ‹A kõn kẽ tẽn-kãnga ye, a kõn tão a pĩim ye, a kõn zẽk a gãong ye, a kõn sam tãndo n gilg-a ye,

³⁴sor ninga a sẽn tũ n wa wã a na tũ so-kãng n lebe, a kõn kẽ tẽn-kãnga ye. Dẽ yaa maam a Wẽnd n yeele.

³⁵M na n gũu Zerizalɛɛm la m na fãag-a lame, m meng yĩnga la m sõgen a Daviid yĩnga.› »

³⁶Badaare yʋngo, Soaala-Wẽnd malɛka kẽnga Asʋr dãmba gãagẽ n kʋ neb tus koabg la pis-nii la a nu. Yibeoogo, sẽn loog-b be yãenda kũum bala.

³⁷Asʋr dĩm a Senakerib yika a tãpã n looge, a tees n paa Niniv, a na-tẽnga.

³⁸Daar a ye, a Senakerib kẽ a wẽnd a Nisrok roogẽ n pʋʋsdẽ t'a meng kamb a yiibu: a Adramelɛk ne a Sarezɛr n kɛɛ-a ne sʋʋga n lɛɛg n zoe n dig Ararat. A Asaradõ, a Senakerib biig a ye, n led a zĩiga.