Read SEBR SÕNGO, 1998 A izayi sebre 43 Bible Online

A izayi sebre 43 - SEBR SÕNGO, 1998 bible

A izayi sebre 43

¹Ad yaa f Naanda, Israyɛl, yaa sẽn welga foo toorã, Zakoob, yaa Soaala-Wẽnd n yet-f woto: «Da zoe rabeem tɩ m fãag-f lame m boola f yʋʋre, fo lebga m soolem.

²F sã dʋʋgd ko-ralma, m na zĩnd f sɛɛgẽ; f sã dʋʋgd ko-zoetem, a kõn dɩ-f ye. F sã loogd bugum sʋka a kõn yõog-f ye, bug-walma kõn maan-f bũmb ye.

³Mam la fo Soaala, fo Wẽndã, maam, Israyɛl Nin-sõngã, la f Fãagdã. Yaa Ezipt tõre la m kɩs yã, n deeg foom, a Kus la Seba la m kis f zĩigẽ.

⁴Ya m sẽn nand f wʋsga yĩnga, ya f sẽn be yõodo tɩ m nong-fã yĩnga. Neb la m kɩs f zĩigẽ, buud la m kɩs n yao f yõore.

⁵Da zoe rabeem ye, m bee ne foo. M na kit tɩ f yi yaang n lɛɛg wa, m na kɩt tɩ f yi taoore n lɛɛg n wa tigim ka.

⁶M na yeel goabg rãmba: ‹Wa ne-ba!› N yeel dɩtg rãmba: ‹Bas-y-ba!› Yiis-y m kom-dibli wã be n kõ-ma, yiis-y m kom-pugli wã tẽnga sɛtmẽ n kõ-ma.

⁷Le tall-y n wa-y mam sẽn kõ b rãmb m yʋʋrã, la m sẽn naane la m welg toore m pẽgr yĩnga!»

⁸Kɩt tɩ sẽn tar-b nini n ka neẽ wã kolge, tɩ sẽn tar-b tʋba n ka wʋmdẽ wã kolge.

⁹Kɩt tɩ bu-zẽmba fãa tigim, tɩ tẽnsa kẽedba fãa tigim. La sok-y b wẽn-naandsã n gese, bãmb sʋka, ãnda n da pĩnd n gom yɛl niyns sẽn maana, tɩ d wʋme? Yeel-y-b tɩ b wa ne b kaset dãmba tɩ d kelge n kelge la d tõog n yeele: «Yaa sɩda!»

¹⁰M buudu, yaa yãmb la m kaset dãmba, Naaba-Wẽnd n gomde, yaa yãmb la m sẽn tũus b rãmba n yet tɩ b wʋm yɛla võore la b dɩk b saagrã n dell maam. M daab la b bãng la b wilg m sẽn yaa a soaba, la b reeg tɩ wẽnd ba a ye pa reng maam, la sẽn le wẽnda maam me ka ye.

¹¹Yaa maam, la maam bala la Soaala, Fãagda a to ka be sã n ka maam ye.

¹²Yaa maam n wilgi, yaa maam n fãage. Yaa maam n togse ka wẽn-sãang ba a ye. Dẽnd yĩnga, yãmb la m kaset dãmba. Yaa Soaala n togse, la maam, yãmb Soaala, la Naaba-Wẽnde.

¹³M na n kell n yɩɩ wala m sẽn yaa a soabã. M ka tõe gãd bũmbu tɩ ned deeg-a m nugẽ ye. M ka yalsd bũmb tɩ ned tus-a n lub ye.

¹⁴Yaa woto la b gomda, woto la yãmb Fãagdã, a Israyɛl Nin-sõnga gomda: «Yaa yãmb yĩnga la m tʋm neb Babilon tɩ b tɩ kao yemsa rot kʋɩlense. Yaa rẽ me yĩng la Kalde rãmba nengẽ sũ-noog yɩɩl na n lebga wiisgu.

¹⁵Maam la Naaba-Wẽnde yãmb Nin-sõngo, a Israyɛl Naanda, yãmb Dĩma.»

¹⁶Yaa Soaala-Wẽnde n gomd woto, yaa bãmb n tuk sore mogrẽ n tuk sor mogr pʋga, mogr sẽn dãmbd a ko-wiis pʋga.

¹⁷Bãmb n yiis pĩnda bilim-bilm, wiidi, tãb-biis sẽn mi zabre. Bãmb fãa gãandame n ka le yik bada, b fãa rɩɩme n ki wa lam-palg bugum.

¹⁸Soaala koɛɛga la woto: «Da le tẽeg-y pipi yɛla ye, da le tẽeg-y sẽn maan pĩnd ye.

¹⁹M wata ne bõn-bãn-paala, la b zoe n waame, yãmb sẽ n ka ne-ba. N-ye! M na n tuka sore we-raoog tẽnsʋka, n tuk sor zĩ-peen-daasẽ.

²⁰We-rũms na n pẽga m yʋʋre, we-baase la na-neendo na n pẽgame tɩ m na n kõ-b-la koom we-raoogẽ, tɩ ko-zoetem na n saag zĩ-peen-daaga, n yiis m neba ko-yũudu, n yiis buud ning m sẽn kõ m menga ko-yũudu la woto b na kils m yʋʋre.

²¹La buud ning m sẽn gʋʋlã na wilg a sẽn pẽgd maama võore.»

²²Soaala-Wẽnd yetame: «Israyɛl, ka mam sɛɛg la fo yõkr ye, fo maana wala f yama yii ne maam, Israyɛl, m buud nongre.

²³Ad ka mam yĩnga la f ra kʋʋd pe-bi maand ye, ka maam la f ra waoogd woto ye. Bũmb sẽn ka sɩd yaa f sã n tẽed tɩ m kẽes-f-la yembdo tɩ beoog-beoog fãa bɩ m tarẽ: ‹Wa ne maando, wa ne maando!› Da tẽ tɩ m sɛɛsa f pãnga ne beoog-beoog fãa tãsgã: ‹Yõog tɩdare, yõog tɩdare!›

²⁴Ka mam yĩng la f da yiis ligd wʋsgo n na n paam n da wisdu ne yũ-noog ye. F maanda sẽn tosd kaama ra ka mam yĩng ye. Ad yaa foo n kẽes maam yembdo ne f yɛl kɛgã, foom n kẽes maam yaamse ne f yel-wẽna.

²⁵Yaa maam n modge n yĩm f beegrã, yaa maam n modg n bas taale.

²⁶Le maneg n togs bũmb ning sẽn kɩt tɩ d da ka zemsd taabã. D naag taab n bao a tɩɩm. Gome n kõ-f meng bʋʋm.

²⁷F pipi ba wã n deng n maan wẽnga, fo no-rɛɛsdba me taka zabr ne maam.

²⁸Ya rẽ la m ning f maan-kʋʋdba yãnde, n yet tɩ m na n wãa a Zakoob buudu, tɩ m na n basa a Israyɛl t'a bɛɛba paoog-a.»