Read SEBR SÕNGO, 1998 A izayi sebre 45 Bible Online

A izayi sebre 45 - SEBR SÕNGO, 1998 bible

A izayi sebre 45

¹Woto la Soaala-Wẽnd koɛɛga ne b sẽn tũus a soabã, ne a Sirus, ne bãmb sẽn gãd a soab nug rɩtgã. Soaala-Wẽnd gomda woto: «M na n wãa tẽnsã, f taoore, n deeg dĩm dãmb naam, n pags fo taoore tẽns kʋɩlens sẽn da maneg n sog kẽnkẽ.

²Mam meng na n kẽna f taoore m na n sarma tãmsa fãa, m n na kaoo kuta kʋɩlensã la m na n kaoo b kuta sogdsã.

³M na n yiisa f yĩnga, arzɛk sẽn da solge, m na n yiisa laog sẽn da bĩngi, tɩ f bãng tɩ maam la f Wẽnde, a Israyɛl Wẽnnaam, sẽn bool foom ne f yʋʋre.

⁴Yaa m sõgen a Zakoob yĩnga, m zoa a Israyɛl yĩnga la m bool foom ne f yʋʋre, n waoogd foom tɩ f yaool n ka mi maam ye.

⁵Yaa maam la Soaala-Wẽnde, m ka be taare, Wẽnd a to ka be n zʋʋg maam ye. Maam n sog f sɛɛg sẽbdga tɩ f yaool n ka mi-m ye.

⁶M datame tɩ b bãng al yaanga la nin-taoore tɩ sã n zʋʋg maam, Wẽnd a to ka ye. Yaa maam la Soaala, a to ka ye.

⁷Maam n naan lik la vẽenem, n wat ne sũ-noog la sũ-beedo. Yaa maam, Naaba-Wẽnd, n maan dẽ fãa.

⁸Bɩ zemsga yi yĩngr n dʋʋge, n yi yĩngr n dʋʋg wa meenem; bɩ sawata sik saaga tɩ tẽnga yaag a noor n koke, tɩ zemsga la fãagra bul n yi! Maam, Naaba-Wẽnd, n yag m daoa.»

⁹ [84†] Yãb-y ninsaal sẽn ya tãnd rʋko wala rʋgd a taaba bala, la sẽn yik n na n zab ne a yagda. Yagd sã n nomd a yagdo tãnda na sok sẽn nomd-a wã: «Bõe la f maanda?» Yagda sẽn yag laok ninga na wẽneg n yeel-a: «Fo yaa nug-kɩɩng laa?»

¹⁰Yell ne ned ninga sẽn yet biig ba-roaka: «Yaa bõe biig la f rog yã?» N yet biig ma: «Yaa bõe la f yiis dũniya?»

¹¹Soaala-Wẽnde, a Israyɛl Nin-Sõngã, bãmb sẽn naan b buudã, n sokde: «Yaa ne maam la y gomd m kamba poorẽ bɩ, la y wilgd-m m sẽn tog n maan ne b bɩ?

¹²Yaa maam n naan tẽnga ne ninsaalba sẽn be a pʋgẽ, yaa maam n yɛdg yĩngri ne m nugu, maam n so yĩngri tãb-biisã fãa yaa maam n kõt b noore.

¹³Yaa maam n yiis m gãndaoogo sẽn na n waa ne fãagrã. M na zĩnd a sɛɛgẽ, t'a tʋʋmda yi naana ne-a. A na le mee m tẽnga, a na n le mee Zerizalɛɛm, m kamba sẽn kẽng yembdã na lɛɛg n wa tɩ pa tũ ne yaood ye. Dũni fãa Wẽnd n yeele!»

¹⁴Woto la Soaala-Wẽnd le gomda: Ezipt rũm-kɩɩmba, Kus toandba, Seva dãmba, nin-wogd buudu, na n tong n wa f nengẽ la foom n na n soog-ba, f na n ning-b-la wĩiri tɩ b pʋg foom, b na n wõgemda f taoore, b na pʋʋsa foom n yetẽ: «Yãmb Wẽnda bal la Wẽnde, Wẽnd a to ka ket zĩig a to ye.»

¹⁵Israyɛl Wẽnd sẽn wat ne fãagre yãmb yaa Wẽnd sẽn solgd a menga.

¹⁶Sẽn yagd-b wẽn-faada sã n ningd-b mens yãnde la b paoogd b mense b nenga sã n surẽ n le ka tõe n dooge,

¹⁷ad-y ka boto ne Israyɛl buud ye. Yẽ paama Wẽnd fãagr zãnga, yẽ kõn tol n yãend yãnd la paoor ye.

¹⁸Soaala n naan saaga bãmb la Wẽnd ninga sẽn naana tẽngã; bãmb n yɛdg-a la b kɩʋʋlem-a bãmb n pids-a ne teedo, bãmb n naan-a n na n kẽes ninsaalba. Woto la b gomd marsã: «Maam la Soaala, Wẽnd a to ka ye.

¹⁹M ka soos n gom ye, m pa bao pẽk n solg ye. M pa kos a Zakoob kamba tɩ b bao-ma m sẽn ka be zĩig ning ye. Maam, Naaba-Wẽnde, m goma vẽenega, m sẽn yet tɩ bũmb ning n na n yɩ wã n ka be sãmbga.»

²⁰Naag-y taab n wa, naag-y taab n kolge, yãmb fãa sẽn paam n põsã. Sẽn ka mi-b bũmbu, yaa neb niynsi sẽn tʋk-b da-peesdi n kẽnda, neb niyns fãa sẽn pʋʋsd wẽnd sẽn ka tõe n fãag-ba.

²¹Gom-y-yã, wa-y ne kaset dãmba, yẽs-y ne taaba. Ãnda n dag n wilg al pĩnd-pĩnda bũmb ning sẽn maand marsã wã? Ãnda n da zoe n togse? Ka maam, Naaba-Wẽnd laa? Wẽnd a to ka paas maam ye. Wẽnd sẽn mi zemsgo la sẽn ya Fãagda, ned a to ka le paas maam ye.

²²Dũni wã sɛtmẽ dãmba, wẽnemd-y y neng n tees maam tɩ m fãag yã, y sẽn be zĩig ninga fãa, wẽnemd-y y neng n tees maam, Naaba-Wẽnd ka be taar ye.

²³ [85†] M wẽenda ne m menga, m noor sẽn yiis yaa sɩda, yaa gomd sẽn ka tõe n ka pidsi. Yaa mam taoor bala la rũmd fãa tog n yĩgimdi yaa ne mam yʋʋr bala la zelemd fãa na n wẽene,

²⁴n na wẽene n yeele: «Ne Wẽnd tõogo, ne Wẽnd pãnga!» Sẽn da yik-b zabr ne bãmba na n lɛɛg n waa ne yãnde.

²⁵Wẽnd maasem yĩnga, a Israyɛl buuda na paam tõog la ziiri!