Read SEBR SÕNGO, 1998 A izayi sebre 51 Bible Online

A izayi sebre 51 - SEBR SÕNGO, 1998 bible

A izayi sebre 51

¹Soaala-Wẽnd gomda woto: «Yãmb fãa sẽn baood-b fãagre, yãmb fãa sẽn baood-b maama, kelg-y m koɛɛga: Ges-y pĩig ninga b sẽn dɩk n pees yãmbã, ges-y b sẽn tu n buk yãmb zĩig ningã!

²Ges yã a Abraam, yãmb ba, ges yã a Sara, y ma! M sẽn waa n bool a Abraam t'a nan ka rog biig ye, la m ning-a-la barka, n kɩt t'a lebg bu-yaleng ba.»

³N-ye, Wẽnd zoe-la a Siõ nimbãanega, b zoe-la a rota sẽn wã nimbãanega! Soaala-Wẽnd na n kɩtame tɩ zĩ-peen-daaga lebg Eden, n kɩt tɩ rasempʋɩɩga lebg Wẽnd zẽedo. Yaa sũ-noogo la kɩdeng bʋʋre la b na n wʋm be, na n yɩɩ bark pʋʋsgo sẽn tũnug ne yɩɩla.

⁴Woto la Soaala-Wẽnd na n gome: «Kelg-y m goama neere, m buudu, yoog-y y tʋb n kelg-ma, Noorã na n yii mam nengẽ, sor ning m sẽn yet tɩ b tũ wã n na n yɩ dũni wã vẽenem.

⁵M sẽn wat n na n kõ-f fãagr ningã, ad-a wakata kolgame, a pukra wakata zoe n taame. M na n kɩtame, m na n modgame tɩ buuda fãa tũudma yɩ tɩrga. Ba tẽn-zãorgẽ dãmba na n teega maam, b na n teega m pãnga.

⁶Doog-y nini n ges yĩngri, sulg-y y menga n ges tẽngre, saaga na n looga wala bug-zõose, tɩ tẽnga tõose wala kʋdse. Ninsaalba na n kii wa zõose. La m na n yalsa m fãagra daar buud fãa yĩnga, a ka na n tol n zĩnd sɛɛb ye.

⁷Kelg-y-ma, yãmb fãa sẽn mi sẽn zemse, yãmb fãa sẽn deegd m noya y sũurẽ. Da zoe-y ninsaal tʋʋr ye, da sak-y n bas raoodo, tʋʋra yĩng ye.

⁸Tɩ sẽn tʋʋsd-b yãmba yelle na n baasa wa pe-kõbd fuugu sẽn kẽ bugdu, bugd a nare. M sẽn wat ne fãagr ninga na n yalsame, a na n yɩɩ fãagr daar buud fãa yĩnga.»

⁹Nek-y wɛ, Soaala, nek-y tao-tao, yẽeg-y y gĩini, nek-y wala pĩnda, nek-y wa kʋdem-wẽnnẽ zamaana. Ka yãmb sʋʋga n kɛ rũm-bãndã ka yamb sʋʋgã n pas a Raab?

¹⁰Ka yãmb n fẽbg mogra koom, ka yãmb n kʋɩɩs-a zãnga? Ka yãmb n kɩt tɩ sor tuk a pʋgẽ tɩ y sẽn fãag b rãmba tõog n looge?

¹¹Ad Soaala-Wẽnd na n fãaga b neba tɩ b le lɛɛg n wa Zerizalɛɛm, tɩ b le wa kẽed Siõ, la b kilsd b sũ-noogo kilsgu. Sũ-noog sẽn kõn sɛ sõore n na n puk b nini, langre la kɩdengo n yãagd-ba, yãbre la sũ-beed zoe n menemame.

¹²Yaa maam la maam bala, yaa maam y Soaalã n tõe n sigs y sũuri. Yaa bõe la m buuda maand dabeem, ninsaal taoore, ned sẽn be dũnna n ka beoog taoore? Sẽn yaa wa mooga soab taoore?

¹³Fo yĩma Soaala-Wẽnde, f Naanda, bãmb n yals yĩngri la tẽnga. Beoog sẽn vẽege, fo rigda rabeem f na-toaaga taoore, wala a menes-f lame la bala. A puugda a sũuri la bõe n pʋgde?

¹⁴Keta bilf bala tɩ sẽn be a roogẽ wã yi, a kõn le yaal likẽ wã ye, rɩɩb kõn le paoog-a ye.

¹⁵Yaa maam f Soaala la f Wẽnde, maam n dãmbd mogre t'a ko wiisa bʋʋr sãta, m yʋʋr la dũni fãa Wẽnde.

¹⁶M le yɛdgda saagã, n le vigind tẽngã a zĩigẽ la m yeta Zerizalɛɛm: «Foo la mam buudu fo n na n deeg m koɛɛgã n taase, fo la m na n solg m nugẽ.»

¹⁷ [98†] Zerizalɛɛm, nek tao, yik yĩngri! Wẽnd yũnug-f-la b sũ-puur dãam, la rãama yɩɩ rã-toaaga, n lebgd zugu, fo yũ-a lame, fo yũ-a-la zãnga, fo yũume tɩ neng yilimdẽ.

¹⁸F sẽn dog kamb niynsa sʋka ba a ye ka wa wilg-f so-sõnga ye. F bi-wubdg ba a ye ka wa gãd f nug ye.

¹⁹Yɛla lʋɩta f zugu a yiib-yiibu: tẽnga wãab la a zũnd-zãnde, zabr sʋʋga la kom. Ãnda n na n wa yãb-fo, ãnda n na n wa maas f sũuri?

²⁰Ad-f kamb sẽn gãe vãna soya zutu, b gãee wala walga sẽn lʋɩ bẽdgẽ, tɩ Soaala-Wẽnd sũ-puura rɩt-ba, n yɛ ne Wẽnd tãsga.

²¹La ade, Zerizalɛɛm sẽn gãe ne pɛta, kelg neer marsã, foom a ka yũ rãam n yaool n kẽnd n tuumnẽ:

²²Soaala, f zu-soaba, f Wẽnda na n sõnga b buudã la b gomda woto: «M na n deega f nugẽ f wamdã, rã-toaaga sẽn yũud n tuumnẽ wã wamde m sũ-puura wamde la f kõn le yũ a pʋgẽ ye.

²³M na ning-a-la f bɛɛba nugẽ, bɛɛb niyns sẽn da yet-b fooma: ‹Zõond tɩ d tabe n looge.› Tɩ fo sɩd zõond tɩ b tabe, tɩ fo po-raooga sɩd lebg b sore.»