Read SEBR SÕNGO, 1998 A izayi sebre 58 Bible Online

A izayi sebre 58 - SEBR SÕNGO, 1998 bible

A izayi sebre 58

¹Da zoe yaamse la f tãs ne pãnga. Yaa Wẽnd n gomde. Zẽk f koɛɛg wala baorgo, n wilg m neba b yel-wẽna, n wilg a Zakoob a kongre.

²Beoog sẽn vẽeg fãa b baood n na n bãngame, yaa bõe la m dat tɩ b maane. B maanda wala buudu sẽn nong zemsgo, sẽn ka mongd Wẽnd bũmb ye. B ratame tɩ m bʋʋda tũ zemsgo sore, B sũ-noog wa fãa-fãa yaa b yẽrg n kolg Soaala-Wẽnde.

³B yaool n sokdame: «Bõe yĩnga la d na n loe d noore? Soaala-Wẽnd sã n ka ne-do? Bõe yĩng la d na sɩbg d menga bãmb sã n ka mi tɩ d sɩbgda d menga?» Dẽ la m leokda: Yãmb sẽ n pa ne tɩ y loeta y noore la y ket n leebdẽ, n baood yõodo, la y ket n namsd y tʋʋm-tʋmdba.

⁴Y loeta y noore tɩ mobeed ketẽ, tɩ pãb taab ket n pãbda! Y noora sã n loet woto ad-y y pʋʋsga ka tat-m ye.

⁵M sẽn dat no-loeer ningã, sulg-m-meng ningã, tõe n yɩɩ woto bɩ? Yeelame tɩ f sulg f zugu wa moog sẽn kaooge, n tʋɩ yondo tompɛglmẽ n lʋɩ n gãande? Yaa rẽ la fo boond tɩ no-loeere, la f yet t'a tara bark Soaala-Wẽnd nengẽ?

⁶Y ka mi tɩ no-loeer ninga m sẽn data la woto: Y sẽn yõg b rãmb n sẽbe tɩ yaool n ka segdã, lood-y bãmb dãmba wĩ. Sik-y zɩɩb ning y sẽn zɩlg b bãgdã. Yiis-y sẽn tar-b toogo b pɛta pʋga; zãag-y-ba ne yembd buud fãa.

⁷ [122†] No-loeer ning m sẽn datã yaa: Kaoog f buri n kõ kom sẽn tar a soaba, pak f roogo n deeg sãana, yeelg sẽn kẽnda a zaala, kũm f meng roagda.

⁸Sã n ya woto f vẽenem na n puka wala wĩntoogo la f noadã na n wẽneg n maagame; f sõmblema na n kẽna f taoore, la Soaala-Wẽnd pẽgra na n pʋga f poore.

⁹F sã n yiis f koɛɛga, Soaala-Wẽnd na n kelgame, f sã n boole b na n leokame: «Ad-ma!» Moadg sã n kaẽ, mobeed sã n kaẽ, kãab yood sã n kaẽ,

¹⁰kom sẽn tar a soaba sã n paamd f dɩ-võre, far sẽn tar a soaba sã n paamd bũmbu n ningd a noorẽ, f vẽenema na n puka likẽ, f lik na n lebga vẽenem wa wĩnto-sʋka.

¹¹Soaala-Wẽnd n na n lʋɩ f taoore wakat buud fãa, la bãmb n na n kiis f ko-yũud wĩnto-sẽengẽ. B na n paasa f kõaba keelem. F na n lebga wa zẽed sẽn tɩg koom, f na n lebga wala ko-bundga sẽn bund n ka vʋʋsdẽ ye.

¹²Fo maasem yĩnga, b na n leb n yika pĩnd raboodã. B sẽn na n le yik-b zĩig ningã, yaa meeba sẽn da tʋɩɩs zĩig ning pĩnda la b yaool n ka me fɩ n tãag rũnna wã. Zĩ-kʋd kãens zutu la b na n le yik ro-paala. B na bool foom tɩ yi-wãoong maanegda, rabood yikda.

¹³Ad Soaala-Wẽnd sẽn yete: «Fo sã n vẽ vʋʋsg daare ne bũmb raabo bɩ koosgo, f sã n yãend ra-sõnga raare bũmb sẽn be yõodo, n dat-a, la fo sẽn boond vʋʋsga raare tɩ f sũ-noogo yĩnga, n boond Soaala-Wẽnd daarã tɩ raar sẽn tog ne pẽgrã, fo kʋʋga f naoore, ad-f zug na n sɩd zẽkame, f sã n bas bõn-yõoda pʋgbo n bas tʋʋm buud toor-toore, la f bas goam sẽn pa gomd n sɛtẽ.

¹⁴Wakat kãnga, Soaala-Wẽnd na pids-f ne sũ-noogo, b na tall-fo n dʋʋs tãnga zugu tẽnsʋka ne kilsgu; Soaala-Wẽnd na lebs foom f ba a Zakoob pʋɩɩre.» Woto yaa Wẽnd n togse.