Read SEBR SÕNGO, 1998 A izayi sebre 61 Bible Online

A izayi sebre 61 - SEBR SÕNGO, 1998 bible

A izayi sebre 61

¹ [130†] Soaala-Wẽnd pids-m-la ne b Vʋʋsem, b taaga maam b kaam la b kõ-m-la tʋʋmd kãnga: tɩ m taas naong rãmba koe-noogo, tɩ m maas sũ-sãang sẽn tar b rãmb sũuri, tɩ m wilg pa-weto tɩ b pa-weer sɛɛme, n wilg sẽn be-b roogẽ, tɩ b bãeensa na n loodame;

² [131†] [132†] tɩ m moon Soaala yʋʋmde, yʋʋmd ning b sẽn na n wilg b buudã b nonglem, raar ning tõnd Soaala sẽn na n dok b sũur ne bɛɛbã, la b wa menes sũ-sãanga, sẽn zĩ-b n yãbd kʋʋr sũ-sãanga.

³B rɩta Siõ kʋʋre, la mam waame n na n yẽes makr buud fãa sẽn da wilgdi tɩ b bee sũ-sãang pʋgẽ n lebs makr niynsi sẽn na n wilg marsã tɩ b bee sũ-noog pʋgẽ. Tɩ m ledga b zuta tompɛglem ne zu-vindg sẽn be neere, n tek b nintãm ne kaam sẽn tar yũ-noogo; tɩ m teka b nimbãan-nenga ne fuug sẽn ya kibs fuugu. Wakat kãng marsã la b na n mams-ba, n mams-b ne tɩɩse, sẽn pẽgd Soaala-Wẽnd ne b woglem, n mak-b ne zẽed tɩ-neeba, sẽn pukd Soaala ziiri.

⁴Kʋdem-wẽnnẽ lalsã na n le yikame, kʋdem-wẽnnẽ dotã na n le meeme, raboodã na n le maneg n yikame, tẽns niyns sẽn da wã n dʋr al daar zãra na n le maneg n mee paala.

⁵Sãamb n na n wa kɩɩm y rũmsi, neb sẽn yi tẽng a to n na n wa ko y pʋto la b ges y bugsuntundu.

⁶B na n boola yãmba tɩ Soaala-Wẽnd maan-kʋʋdba, b sã n gomd y yelle b na n goma woto: «Tõnd Soaala-Wẽnda sõgen-kamba.» Y na dɩɩ dũni rãmba arzɛgse, y fan-teedã na n yii bãmb laogẽ.

⁷Soaala-Wẽnd n gomd woto: «Yãmb paama yãnd wʋsgo, yãmb paam-a lame n bãge; yãmb sẽn da reegd yaa paoore, neba ra tʋbsda y nenga. Yaa rẽnd me yĩnga, la b na n dol-y naoor a yiibu nin-bãmba rãmb tẽngẽ, la y na n bãnga sũ-noogo, sũ-noog sẽn ka be sɛɛbo.

⁸Maam, Naaba-Wẽnde, m baooda zemsgo. M kisame la m yetame tɩ pa segde tɩ b reeg bũmb ne pãng ye. Woto wã m na lebs-y b sẽn yõk n deege, la m na yõg ne yã, zood sẽn ka tõe n le sãame.»

⁹Y yagensã, b na bãng-b zĩig zãnga, b na bãng-b bu-zẽmba tẽnsẽ fãa. Sẽn na n yãend-ba, na n bãng-b lame n welge tɩ yaa buudu Soaala-Wẽnd sẽn ning barka.

¹⁰ [133†] Soaala-Wẽnd pidsd-m-la sũ-noogo, M Wẽnda pidsd-m-la ne kɩdengo; sõngr ning b sẽn sõng-ma, wẽnda fuug b sẽn yeelg-ma. M sũ-noog yaa pʋg-sɩd sũ-noogo, pʋg-sɩd sẽn ning a kibs pugla, m sũ-noog yaa pʋg-paal sũ-noogo, pʋg-paal sẽn ning a fan-teedo.

¹¹Wala koodã sẽn bund n yit tẽnga, wala zẽedo sẽn sakd koobo, woto me Soaala-Wẽnd na n kɩtame tɩ b fãagre la b pẽgre pusgi n yi ãndũni rãmba sʋka.