Read SEBR SÕNGO, 1998 Maan-kʋʋr sebre 15 Bible Online

Maan-kʋʋr sebre 15 - SEBR SÕNGO, 1998 bible

Maan-kʋʋr sebre 15

¹Naaba-Wẽnd yeela a Moyiiz ne a Aarõ

²tɩ b wilg Israyɛl kamba woto: Rao sã n bẽed a taoorẽ, a bãng t'a menga zãng n ya rẽgdo.

³Bũmb yit bɩ pa yit be, a lebga rẽgdo.

⁴Raoã sẽn gãand bũmb ning zugu, a sẽn zĩnd bũmb ning zugu, lebgda rẽgdo.

⁵Ned sã n sɩɩs a gãagã, a tog n peka a futu, n so koom, la ne rẽ fãa, a na n kell n yɩɩ rẽgd n ta zaabre.

⁶Ned sã n zaoonda a goeelã, a tog n peka a futu, n so koom, la ne rẽ fãa a na n kell n yɩɩ rẽgdo n ta zaabre.

⁷Ned ninga sẽn sɩɩsa nin kãng tog n peka a futu, n so koom, la ne rẽ fãa a na n kell n yɩɩ rẽgdo n ta zaabre.

⁸A sã n sẽnes ned kolkoodo, ned sẽn ya yɩlemde, nin-kãng tog n peka a futu, n so koom, la ne rẽ fãa a na n lebga rẽgdo n ta zaabre.

⁹A sẽn zaond gaar ning n tog sore, gaar kãng lebga rẽgdo.

¹⁰F sã n sɩɩs a sẽn zaoond n bʋʋg bũmb ning fãa, f me lebga rẽgdo n ta zaabre la f sã n dɩk bũmb a sẽn zaond n bʋʋge, f tog n peka f futã, n so koom, la ne rẽ fãa, f paada ne rẽgdo n ta zaabre.

¹¹A sẽn na n sɩɩs ned ninga fãa n ka reng n pek a nusã ne koom, a soab tog n peka a futã, la a so koom la ne rẽ fãa, a kelld n paa ne rẽgd n ta zaabre.

¹²B wãada tãnd laok fãa a sẽn sɩɩse, laoka sã n ya raoog laoko, b pekd-a lame.

¹³Neda sã n dat t'a rẽgda peke, a sõta rasem a yopoe. Rasem a yopoe wã poore a pekda a futu. Dẽ poore a sooda koom kʋɩlgẽ n yaool n yɩlge.

¹⁴Dasem a nii soaba, a wat n kɩsa maan-kʋʋda wal a yiibu bɩ malwal a yiibu, sɛka roog noore.

¹⁵Maan-kʋʋda reegda a ye n maan yel-wẽnd sugr kosg maoongo la a reeg a ye n maan yũ-noog maoongo, la woto, maan-kʋʋda kota sugr a yĩnga la a pekdame.

¹⁶Rao zɩɩm sã n mad-a, bɩ a pek a yĩnga tõr ne koom la ne rẽ fãa a paada ne rẽgd n ta zaabre.

¹⁷Zɩɩma sẽn sɩɩs bũmb ninga, fuug bɩ gãongo, tog n peka ne koom la a na n kell n yɩɩ rẽgd n ta zaabre.

¹⁸Pag ne rao sã n zĩnd ne taaba, b tog n soo koom la b na n kell n yɩɩ rẽgd n ta zaabre.

¹⁹Pag me sã n kiuudẽ, yaa dasem a yopoe tõre la a paad a rẽgdẽ; ned sã n sɩɩs-a, a soab me rẽgemdame n ta zaabre.

²⁰Gãag ning a sẽn gãe a soab zugã, goeel ning a sẽn zao a soab zugã, lebga rẽgdo.

²¹Ned ninga sẽn sɩɩs a gãaga tog n peka a futu, n so koom la a na n kell n yɩɩ rẽgd n ta zaabre.

²²Ned ninga fãa sẽn sɩɩs a sẽn zaonde, tog n peka a futu la a so koom la ne rẽ fãa a na n kell n yɩɩ rẽgd n ta zaabre.

²³Bũmb sã n be a gãagã bɩ a goeela zugu, tɩ fo wa sɩɩs bõn-kãnga, fo lebgda rẽgdo n ta zaabre.

²⁴Ned sã n gãand ne-a, a me lebgda rẽgdo, a na n yɩɩ rẽgd dasem a yopoe la a sẽn na n gãand zĩig ning fãa, zĩ-kãng me lebgda rẽgdo.

²⁵Pag sã n ne a kiuug t'a pukr yaool n nan pa ta, bɩ kiuuga sã n loogame t'a ket ne-a, a bãng t'a yaa rẽgd wakat kãnga. Daara sẽn paasã le paasa a rẽgdo.

²⁶Daara sẽn paasã, a gãagã, a goeela kelld n paa ne rẽgdo.

²⁷Ned ninga sẽn na n sɩɩs-ba, a soab tog n peka a futu, n so koom la a na n paa ne rẽgd n ta zaabre.

²⁸A kiuuga sã n kẽ, paga sõta rasem a yopoe n paam n yɩlge.

²⁹Daar a nii soaba, a wata ne wal a yi bɩ malwal a yi, sɛka roog noore n wa kɩs maan-kʋʋda.

³⁰Maan-kʋʋda yãkda a ye n maan yel-wẽnd sugr kosg maoongo, n yãk a ye n maan yũ-noog maoongo; maan-kʋʋda kota sugr a yĩnga, Soaala-Wẽnd taoore, t'a tɩlg ne a rẽgdo.

³¹Wilg-y Israyɛl kamba tɩ b bãng tɩ b sẽn ya rẽgd wakat ning fãa, bɩ b leb kɛɛnga la woto b kõn ki, b sẽn dẽgma yĩng ye, b sẽn kɩt tɩ m dooga lebg rẽgda yĩng ye.

³²Yaa woto la Soaala-Wẽnd wilg, rao poorẽ, bũmb ning sẽn wat ne a rẽgdo, wakat ning a sẽn paad ne rẽgdo.

³³Woto me la b wilgd, pag poorẽ, bũmb ning sẽn wat ne a rẽgdo la bũmb ning sẽn kis ne-a, a kiuug sã n puki.